សុខភាព - អប់រំ អប់រំ

10/10/2022 - 10:51

ការអប់រំតំបន់ជនជាតិខេត្តគៀងយ៉ាងអភិវឌ្ឍន៍ឥតឈប់ឈរ

រយៈពេលកន្លង ខេត្តគៀងយ៉ាងបានផ្ដុំកម្លាំងអភិវឌ្ឍការអប់រំតំបន់ជនជាតិភាគតិច តំបន់ព្រំដែន កោះសមុទ្រ ម្ល៉ោះហើយគុណភាពអប់រំរួម ក្នុងទូទាំងខេត្តត្រូវបានកើនឡើង។

សិស្សសាលាចំណេះទូទៅជនជាតិអន្តេវាសិកខេត្តគៀងយ៉ាង ក្នុងម៉ោងអនុវត្តជាក់ស្ដែង។
រូបថត៖ ហ្វិញយ៉ាវ

តាមរបាយការណ៍របស់ផ្នែកអប់រំខេត្តគៀងយ៉ាង ឆ្នាំសិក្សា ២០២១-២០២២ ទូទាំងផ្នែកមានអង្គភាពសាលារៀនចំនួន ៦៣៦ ក្នុងនោះ សាលារៀនសម្រេចបទដ្ឋានជាតិចំនួន ២៩៦ ស្រូបអត្រា ៤៨,៤៥% (កើន ១,១២% បើប្រៀបនឹងរយៈពេលដូចគ្នានៃឆ្នាំសិក្សា ២០២០-២០២១)។ ផ្អែកលើមូលដ្ឋានសាលារៀនដែលមានស្រាប់ ខេត្តបានកៀរគរសិស្សចូលរៀនចំនួន ១០.៧៨៩ ក្រុម/ថ្នាក់ ដោយមានសិស្សទាំងអស់ ៣៣២.៥០ ៧នាក់។ ក្នុងនោះ សិស្សជនជាតិភាគតិចកំពុងរៀននៅគ្រប់កម្រិតសិក្សាគឺ ៤១.០៩១ នាក់ (កម្រិតបឋមសិក្សា ២១.៧៦១ នាក់; កម្រិតអនុវិទ្យាល័យ ១៤.៨៧៩នាក់ និងកម្រិតវិទ្យាល័យ ៤.៤៥១ នាក់ ស្រូបអត្រា ១៣,៧%)។ បច្ចុប្បន្ន ទូទាំងខេត្តមានសាលាចំណេះទូទៅជនជាតិអន្តេវាសិកចំនួន ៦ កៀរគរសិស្សចូលរៀនជាង ១.៦០០ នាក់ និងសាលាមធ្យមសិក្សាវិជ្ជាជីវៈជនជាតិអន្តេវាសិកខេត្តគៀងយ៉ាង បង្រៀនមុខរបរជូនសិស្សជនជាតិ ភាគតិចជាង ៦០០ នាក់។ ខេត្តគៀងយ៉ាង បច្ចុប្បន្នមានសាលាចំណេះទូទៅជនជាតិអន្តេវាសិកសម្រេចបទដ្ឋានជាតិ ៣/៦ មានសិស្សជនជាតិភាគតិច ២,៣៩% បានរៀនសាលាចំណេះទូទៅជនជាតិអន្តេវាសិក។ អ្នកគ្រូចូវហ្វិញយ៉ាវ នាយិកាសាលាចំណេះទូទៅជនជាតិអន្តេវាសិកខេត្តគៀងយ៉ាង ឱ្យដឹង៖ “សាលាបានវិនិយោគមូលដ្ឋានសម្ភារៈយ៉ាងសមរម្យ មានគ្រូបង្រៀនទទួលបន្ទុកគ្រប់មុខវិជ្ជា ម្ល៉ោះហើយគុណភាពបង្រៀននិងរៀនអភិវឌ្ឍន៍ឥតឈប់ឈរ។ ក្នុងពិធីអនុស្សាវរីយ៍ ៣០ ឆ្នាំបង្កើតសាលារៀនកន្លងហើយ សាលាមានកិត្តិយសទទួលបានប័ណ្ណសម្រេចបទដ្ឋានជាតិ”។

សាលាចំណេះទូទៅជនជាតិអន្តេវាសិកខេត្តគៀងយ៉ាងមានទីធ្លាធំទូលាយ បានបង្កលក្ខណៈងាយស្រួលសម្រាប់សិស្សចូលរួមសកម្មភាពក្រៅកម្មវិធីសិក្សា។ រូបថត៖ ហ្វិញយ៉ាវ

អាស្រ័យការយកចិត្តទុកដាក់វិនិយោគរបស់ភូមិភាគ ម្ល៉ោះហើយគុណភាពបង្រៀននិងរៀនក្នុងសាលាចំណេះទូទៅជនជាតិអន្តេវាសិកកើនឡើងពីមួយថ្ងៃទៅមួយថ្ងៃ។ អត្រាសិស្សបញ្ចប់កម្រិតអនុវិទ្យាល័យ វិទ្យាល័យរៀងរាល់ឆ្នាំសម្រេចជាង ៩៩%។ អត្រាសិស្សចោលរៀនក្រោម ២%។ មានសិស្សជនជាតិភាគតិចជាច្រើនក្រោយពីបញ្ចប់កម្រិតវិទ្យាល័យ ក៏បានប្រឡងជាប់ចូលរៀនមហាវិទ្យាល័យ អនុមហាវិទ្យាល័យ។ ទូទាំងខេត្តមានសាលាចំណេះទូទៅ ១៤,៩% នៅតាមឃុំតំបន់ជនរួមជាតិភាគតិចរស់នៅកុះករ មានបង្រៀនអក្សរខ្មែរ ។

តាមប្រសាសន៍លោកយ័ញភុក ប្រធានគណៈជនជាតិខេត្តគៀងយ៉ាង គុណភាពបង្រៀននិងរៀននៅតាមសាលាចំណេះទូទៅជនជាតិអន្តេវាសិក និងសាលាចំណេះទូទៅតាមឃុំតំបន់ជនជាតិភាគតិច ត្រូវបានកើនឡើងទាំងបរិមាណ និងគុណភាព។ ទន្ទឹមនឹងនោះ ការអនុវត្តបច្ចេកវិទ្យាព័ត៌មាន ក្នុងការបង្រៀន និងគ្រប់គ្រង បានរួមចំណែកយ៉ាងសកម្មក្នុងការផ្លាស់ថ្មីនិងបង្កើនគុណភាពអប់រំជនជាតិ។ ក្រៅពីនោះ ខណៈពេលគោលនយោបាយដាច់ដោយឡែកសម្រាប់តំបន់ជនរួមជាតិភាគតិច ត្រូវបានអនុវត្តមានប្រសិទ្ធភាព សិស្ស គ្រូបង្រៀននៅតំបន់លំបាក ក៏មានភាពងាយស្រួលដើម្បីរៀនសូត្រ លើកកម្ពស់កម្រិតវិជ្ជា ជាជំហានឆ្លើយតបតម្រូវការអភិវឌ្ឍអប់រំរួមក្នុងទូទាំងខេត្ត៕

ហាថាញ - ថាច់ធី

ចែករំលែកអត្ថបទ

ពាក្យគន្លឹះ