សុខភាព - អប់រំ សុខភាព

12/04/2022 - 10:22

វេជ្ជបណ្ឌិតកុលាប អស់ពីចិត្តថែទាំអ្នកជំងឺ

វេជ្ជបណ្ឌិតថាច់ធីកុលាប ប្រធានដំណាក់សុខាភិបាលឃុំឡុងធើយ។

វេជ្ជបណ្ឌិតថាច់ធីកុលាប បច្ចុប្បន្នជាប្រធានដំណាក់សុខាភិបាលឃុំឡុងធើយ ស្រុកទីវកឹង ខេត្តត្រាវិញ។ អស់រយៈពេលជាង ៧ ឆ្នាំ បម្រើការនៅដំណាក់សុខាភិបាល វេជ្ជបណ្ឌិតកុលាប តែងខ្នះខ្នែងពិនិត្យព្យាបាលជំងឺនិងផ្សព្វផ្សាយលើកកម្ពស់ស្មារតីបង្ការ ប្រឆាំងជំងឺឆ្លងរាលដាលដល់ប្រជាជន ម្ល៉ោះហើយបានមិត្តរួមអាជីពនិងអ្នកជំងឺស្រឡាញ់រាប់អាន។

វេជ្ជបណ្ឌិតកុលាប កើតនិងធំដឹងក្តីក្នុងគ្រួសារកសិករ នៅភូមិអូរវែងថ្មី ឃុំតឹងហ្វា ស្រុកទីវកឹង ខេត្តត្រាវិញ។ ជីវភាពគ្រួសារក្រលំបាក រស់នៅសំខាន់ប្រកបរបរកសិកម្ម ម្ល៉ោះហើយកុលាបជួបឧបសគ្គមិនតិចទេក្នុងដំណាក់កាលរៀនសូត្រ។ ដោយមានបំណងប្រាថ្នាក្លាយជាគ្រូពេទ្យជួយព្យាបាលជំងឺ សង្គ្រោះជីវិតមនុស្ស ម្ល៉ោះហើយ កុលាប ប្ដេជ្ញាចិត្តខិតខំរៀនសូត្រដើម្បីថ្ងៃក្រោយជួយដល់គ្រួសារនិងសង្គម។ កុលាប ឱ្យដឹង៖ “ខ្ញុំចាប់យកមុខវិជ្ជាពេទ្យដើម្បីព្យាបាលជំងឺជូនមាមីងក្រីក្រក្នុងភូមិស្រុក។ ដោយឃើញមាមីងក្រីក្រជាច្រើននៅជនបទ ពេលឈឺថ្កាត់ម្តងៗរត់មុខរត់ក្រោយ រកលុយឡើង ទៅមន្ទីរពេទ្យស្រុក មន្ទីរពេទ្យខេត្តដើម្បីព្យាបាលជំងឺ ខ្ញុំតាំងចិត្តថា ពេលក្លាយជាគ្រូពេទ្យនឹងវិលត្រឡប់មកភូមិស្រុកបម្រើមាមីង។ គោលគំនិតខ្ញុំគឺជួយឱ្យមនុស្សគ្រប់រូបមានសុខភាពល្អ ដើម្បីពលកម្មផលិត ជួយឱ្យជីវភាពគ្រួសារបានសុខដុមរមនា និងរួមចំណែកកសាងសង្គមកាន់តែសម្បូរសប្បាយ”។

ក្រោយពីបញ្ចប់វិទ្យាល័យ ថាច់ធីកុលាប ត្រូវបានជម្រើសតាំងចូលមហាវិទ្យាល័យឱសថសាស្រ្តកឹងធើ។ បញ្ចប់កម្មសិក្សាថ្នាក់វេជ្ជបណ្ឌិត បងស្រីត្រូវបានបញ្ជូនមកបម្រើការនៅមជ្ឈមណ្ឌលសុខាភិបាលទីវកឹង។ ឆ្នាំ ២០១៦ បងស្រីត្រូវបានបញ្ជូនទៅបម្រើការនៅដំណាក់សុខាភិបាលឃុំឡុងធើយ។ ក្នុងនាទីជាប្រធានដំណាក់ បងស្រីតែងអស់ពីចិត្តនិងមានគំនិតច្នៃប្រតិដ្ឋក្នុងការងារ ម្ល៉ោះហើយបានមិត្តរួមអាជីពនិងអ្នកជំងឺស្រឡាញ់រាប់អាន។ អាស្រ័យការអស់ពីចិត្តពីថ្លើមរបស់វេជ្ជបណ្ឌិតកុលាប បានជាការងារផ្សព្វផ្សាយបង្ការ ប្រឆាំងជំងឺ COVID-១៩ ទទួលបានលទ្ធផលល្អប្រសើរ។ ពិសេសការងារពិនិត្យ ធ្វើរោគវិនិច្ឆ័យនិងព្យាបាលជូនអ្នកជំងឺ។ បងស្រីគឹមធីវង្ស នៅភូមិផ្នោរព្រីង ទៅពិនិត្យនិងព្យាបាលជំងឺជាញឹកញាប់នៅដំណាក់សុខាភិបាលឡុងធើយ ឱ្យដឹង៖ “ពេលឈឺម្តងៗគឺកូនខ្ញុំឌុបទៅកាន់ដំណាក់សុខាភិបាល។ ដោយបានគ្រូពេទ្យកុលាប ពិនិត្យ ព្យាបាលជំងឺអស់ពីចិត្ត ម្ល៉ោះហើយខ្ញុំឆាប់បានជាសះស្បើយ។ មានពេលខ្លះ អ្នកជំងឺមិនយល់ភាសាវៀត គ្រូពេទ្យកុលាបក៏បកប្រែជាភាសាខ្មែរពន្យល់ឱ្យស្តាប់តែម្តង។ ខ្ញុំនិងមាមីងនៅទីនេះគោរពរាប់អានគាត់ណាស់!”។

វេជ្ជបណ្ឌិតថាច់ធីកុលាប កំពុងពិនិត្យជំងឺនៅដំណាក់សុខាភិបាលឃុំឡុងធើយ។

ឱសថការីឡឹមហ្វាងហ្វិញ ឱ្យដឹង៖ “ខ្ញុំឃើញបែបបទធ្វើការរបស់វេជ្ជបណ្ឌិតកុលាប ជំនាញណាស់ ហើយមុខជំនាញក៏រឹងប៉ឹង វិធីសាស្រ្តព្យាបាលស្របនឹងអ្នកជំងឺ។ ក្រៅពីការពិនិត្យនិងព្យាបាលជំងឺជូនមាមីងនៅតំបន់ដាច់ស្រយាល វេជ្ជបណ្ឌិតថាច់ធីកុលាប នៅទាំងជាកម្លាំងស្នូលក្នុងការផ្សព្វផ្សាយ ចលនាមាមីងបោះបង់នូវអបិយជំនឿនិងបង្ការប្រឆាំងជំងឺរាលដាលទៀតផង។ គាត់ជាគំរូដ៏ល្អសម្រាប់មិត្តរួមអាជីពយកតម្រាប់តាម ជាយុទ្ធជនប្រឡងប្រណាំងថ្នាក់មូលដ្ឋាន ជាវេជ្ជបណ្ឌិតជនជាតិខ្មែរមួយរូប ជាច្រើនឆ្នាំបន្តបន្ទាប់ត្រូវបានគណៈកម្មាធិការប្រជាជនស្រុកស្ងើចសរសើរ”។

លោកស្រី គឹមធីសាផា លេខាគណៈកម្មាធិការបក្សឃុំឡុងធើយ ឱ្យដឹង៖ “ក្នុងពេលជំងឺ COVID - ១៩ កន្លង វេជ្ជបណ្ឌិតកុលាប តែងខ្នះខ្នែងស្វាហាប់ចំពោះការងារនិងយកអស់ពីចិត្តបម្រើប្រជាជន។ ម្យ៉ាងទៀត វេជ្ជបណ្ឌិតកុលាប បានបង្ហាញពីស្មារតីទទួលបន្ទុកខ្ពស់ក្នុងកិច្ចការ ខិតខំជម្នះការលំបាក រៀនសូត្រនិងដកស្រង់បទពិសោធន៍ដើម្បីលើកកម្ពស់មុខជំនាញ។ អ្នកជំងឺជនជាតិខ្មែរ ជាច្រើនចូលពេទ្យ ប៉ុន្តែមិនយល់ភាសាវៀត នាំឱ្យលំបាកក្នុងការពិនិត្យ និងព្យាបាលជំងឺ វេជ្ជបណ្ឌិតកុលាប ក៏ជួយបកប្រែជូនក្រុមគ្រូពេទ្យ ដើម្បីពិនិត្យនិងព្យាបាលជំងឺកាន់តែបានងាយស្រួល”៕

សឺនម៉ាល័យ-លីសៀ

ចែករំលែកអត្ថបទ

ពាក្យគន្លឹះ