សុខភាព - អប់រំ អប់រំ

12/04/2022 - 10:22

សាលាអនុវិទ្យាល័យជនជាតិអន្តេវាសិកទ្រីតូង-សាលាសម្រេចបទដ្ឋានជាតិ

ដើមឆ្នាំ ២០២២ សាលាអនុវិទ្យាល័យជនជាតិអន្តេវាសិកទ្រីតូង ខេត្តអាងយ៉ាង បានទទួលស្គាល់ជា “សាលាសម្រេចបទដ្ឋានជាតិ”។ នេះជាលទ្ធផលដ៏សក្ដិសមបំផុតសម្រាប់ការខិតខំប្រឹងប្រែងរបស់គ្រូនិងសិស្សសាលាក្នុងការខិតខំលើកកម្ពស់គុណភាពបង្រៀននិងរៀនដោយឥតឈប់ឈរក្នុងរយៈពេលកន្លង។

លោកគ្រូចៅយឿង ជូនអាហារូបករណ៍ក្នុងកម្មវិធី “ផ្តល់អាហារូបករណ៍និងអំណោយបុណ្យចូលឆ្នាំថ្មីឆ្នាំ២០២២” ដល់ប្អូនៗសិស្សានុសិស្សដែលមានស្ថានភាពលំបាក រៀនពូកែ។

សាលាអនុវិទ្យាល័យជនជាតិអន្តេវាសិកទ្រីតូង បានបង្កើតឡើងក្នុងឆ្នាំ ២០១៥។ សាលាមានទីតាំងឋិតនៅភូមិសាស្រ្តឃុំលំបាកខ្លាំងចំណុះភូមិអាងឡុក ឃុំចូវឡាំង ស្រុកទ្រីតូង។ តាំងពីបង្កើតមកទល់បច្ចុប្បន្ន កន្លងរយៈពេល ៥ ឆ្នាំ មូលដ្ឋាន សម្ភារៈរបស់សាលាមានគ្រប់សព្វនិងមានភាពសមរម្យ។ ចំនួនសិស្សមានភាពលំនឹង មធ្យមភាគរៀងរាល់ឆ្នាំសិក្សាមានសិស្សប្រមាណ ៥១០នាក់ ចាប់ពីថ្នាក់ទី ៦ ដល់ទី ៩។ កងជួរកម្មាភិបាល គ្រូបង្រៀន បុគ្គលិក មានគ្រប់ទាំងបរិមាណនិងរចនាសម័្ពន្ធ។ បច្ចុប្បន្ន សាលាមាន ៩៣ បន្ទប់ ធានាបម្រើបានល្អសកម្មភាពបង្រៀននិងរៀន ស្នាក់នៅ ហូបចុករបស់សិស្សក្នុងសាលា។

លោកគ្រូ ចៅយឿង នាយកអនុវិទ្យាល័យជនជាតិអន្តេវាសិកទ្រីតូង ឱ្យដឹង៖ ប៉ុន្មានឆ្នាំកន្លង សាលាតែងសកម្មផ្លាស់ថ្មីវិធីសាស្ត្របង្រៀន “បង្រៀនតាមទិសដៅពង្រីកសមត្ថភាពសិស្ស”។ អាស្រ័យហេតុនេះ គុណភាពអប់រំរបស់សាលាត្រូវបានរក្សាលំនឹង ហើយប្រសិទ្ធភាពនៃការបណ្តុះបណ្តាលបានលើកកម្ពស់។ ជារៀងរាល់ឆ្នាំ សាលាតែងមានគ្រូជាច្រើនរូបទទួលបានរង្វាន់គ្រូបង្រៀនពូកែកម្រិតសាលា និងកម្រិតស្រុក ពេលចូលរួមប្រឡងច្នៃឧបករណ៍ជំនួយការបង្រៀន ប្រឡងសរសេរពីគំនិតច្នៃប្រតិដ្ឋ ប្រឡងគ្រូបង្រៀនពូកែ។ល។ ម្យ៉ាងទៀតជារៀងរាល់ឆ្នាំ សាលាក៏តែងមានសិស្សរៀនពូកែគ្រប់កម្រិត។ សិស្សដែលមានស្នាដៃក្នុងការសិក្សានិងការលត់ដំ បានរួមចំណែកយ៉ាងសកម្មដល់សកម្មភាព របស់ថ្នាក់និងសាលា ជួយដល់មិត្តរួមថ្នាក់រៀនសូត្របានល្អ និងរួមចំណែកដល់ស្នាដៃរួមរបស់សាលា។ ជាពិសេស សាលាមានគ្រូបង្រៀនទទួលបន្ទុកគ្រប់មុខវិជ្ជា គ្រូបង្រៀនសម្រេចបទដ្ឋាន ១០០% ក្នុងនោះមានគ្រូបង្រៀន ២,៧%សម្រេចលើសបទដ្ឋាន តាមសេចក្តីកំណត់នៃលក្ខន្តិកៈអនុវិទ្យាល័យ។

ឈុតសម្តែងសិល្បៈដិតដាមដោយអត្តសញ្ញាណវប្បធម៌ជនជាតិខ្មែរនៃសាលា
អនុវិទ្យាល័យជនជាតិអន្តេវាសិកទ្រីតូង។

មិនត្រឹមតែសិក្សាវប្បធម៌ប៉ុណ្ណោះទេ សាលានៅទាំងរៀបចំការចលនាការប្រឡង និងសកម្មភាពក្រៅម៉ោងសិក្សាជាច្រើន។ ជាពិសេស ដោយសិស្សភាគច្រើនជាជនជាតិខ្មែរ ម្ល៉ោះហើយសាលាបានជំរុញការអប់រំជនជាតិដល់សិស្ស។ ប្អូនចៅបញ្ញារិទ្ធ សិស្សថ្នាក់ទី ៩A១ ឱ្យដឹង៖ “មិនត្រឹមតែសិក្សាតាមកម្មវិធីកម្រិតអនុវិទ្យាល័យប៉ុណ្ណោះទេ ពួកប្អូននៅទាំងបានរៀនអក្សរខ្មែរ រៀនរបាំជនជាតិ និងចូលរួមក្នុងពិធីបុណ្យប្រពៃណីដែលលោកគ្រូអ្នកគ្រូបានចាត់តាំងទៀតផង។ សាលាក៏បង្រៀនជាប្រចាំនូវបំណិនជីវិត បំណិនប្រាស្រ័យទំនាក់ទំនងក្នុងសង្គម។ ជាពិសេស ណែនាំពួកប្អូនរបៀបរស់នៅទីពឹងខ្លួន ពេលរស់នៅក្នុងបរិស្ថានអន្តេវាសិក។ នេះជាចំណេះដឹងចាំបាច់ ដើម្បីពួកប្អូនមានទំនុកចិត្ត ពេលចូលរៀនវិទ្យាល័យ ឬរៀនរបរ”។

នៅដើមឆ្នាំ ២០២២ គ្រូនិងសិស្សសាលាអនុវិទ្យាល័យជនជាតិអន្តេវាសិកទ្រីតូង ទទួលបានដំណឹងល្អ។ នោះគឺ៖ សាលាត្រូវបានទទួលស្គាល់ជា “សាលាសម្រេចបទដ្ឋានជាតិ”។ លោកគ្រូ ចៅយឿង នាយកសាលា ចែករំលែក៖ នេះគឺជាភាពសប្បាយរីករាយ ហើយក៏ជាភារកិច្ចផងដែរ! សាលានឹងបន្តខិតខំជាងទៀត ដើម្បីលើកកម្ពស់គុណភាពបង្រៀននិងរៀន។ ផ្តើមពីនោះ រួមចំណែកលើកកម្ពស់កម្រិតប្រជាបញ្ញាក្នុងជនរួមជាតិខ្មែរនៅទ្រីតូង៕

ហាទ្រីវ-លេងមី

ចែករំលែកអត្ថបទ

ពាក្យគន្លឹះ