សុខភាព - អប់រំ សុខភាព

29/11/2021 - 08:06

ក្តីរីករាយរបស់ប្រជាជនពេលបានចាក់វ៉ាក់សាំងបង្ការជំងឺCOVID-១៩

ខេត្តសុកត្រាំង កំពុងពន្លឿនដំណើរការចាក់វ៉ាក់សាំងបង្ការជំងឺ COVID-១៩ ដល់ប្រជាជន។ ឆ្លងតាមរយៈនោះ បង្កបានក្តីរីករាយ និងការទំនុកចិត្តរបស់ប្រជាជនក្នុងការអនុវត្តវិធានការបង្ការ ប្រឆាំងជំងឺ COVID-១៩។

ចាក់វ៉ាក់សាំងបង្ការជំងឺ COVID-១៩ដល់សិស្សអាយុចាប់ពី ១២ ឆ្នាំដល់ ១៧ ឆ្នាំ។

តាមប្រសាសន៍លោកស្រី គឹមធីង៉ុកហៀង កម្មាភិបាលចាក់វ៉ាក់សាំងបង្ការជំងឺ COVID-១៩ មួយកន្លែងនៅក្រុងសុកត្រាំង ឱ្យដឹង៖ នៅទីនេះ មធ្យមភាគក្នុងមួយថ្ងៃមានមនុស្សពី ១.០០០-២.០០០នាក់ត្រូវបានចាក់វ៉ាក់សាំងបង្ការជំងឺ COVID-១៩។ “មិនគិតថាវ៉ាក់សាំងប្រភេទណា មកពីប្រទេសណាទេ គ្រាន់តែឮថាចាក់វ៉ាក់សាំងគឺមាមីងមកកន្លែងចាក់តែម្តង។ ជាពិសេស មាមីងតែងសហការជាមួយអ្នកចាក់វ៉ាក់សាំង ដូច្នេះយើងខ្ញុំចាក់សម្រេចតាមល្បឿនដែលបានកំណត់” បងស្រីហៀង បានឱ្យដឹងដូច្នេះ។ ដោយយល់ថា ការចាក់វ៉ាក់សាំង គឺជាវិធានការមួយដ៏មានប្រសិទ្ធភាពក្នុងការទប់ស្កាត់ការរីករាលដាលនៃជំងឺ COVID-១៩ និងទិសស្លោក៖ “វ៉ាក់សាំងមានប្រសិទ្ធភាពបំផុត គឺវ៉ាក់សាំងដែលបានចាក់ឆាប់បំផុត” ដូច្នេះនៅពេលបានជូនដំណឹងមកចាក់វ៉ាក់សាំង គឺមាមីងរីករាយគ្រប់គ្នា។ អ្នកមីងលីធីវៀង នៅសង្កាត់ ៥ ក្រុងសុកត្រាំង បាននិយាយ៖ “ខ្ញុំមានអាយុ ៦៣ ឆ្នាំ ដូច្នេះបានចាក់វ៉ាក់សាំង Pfizer ចំនួន ២ ដូស ខ្ញុំរីករាយណាស់! ខ្ញុំប្រាប់កូនចៅថា មានវ៉ាក់សាំងចាក់គឺត្រេកអរណាស់ទៅហើយ វ៉ាក់សាំងមកពីប្រទេសចិន ចក្រភពអង់គ្លេស សហរដ្ឋអាមេរិក។ល។ ក៏សុទ្ធតែជួយដល់ការបង្ការជំងឺ COVID-១៩ ដូចគ្នា។ ម្ល៉ោះហើយ កូនចៅរបស់ខ្ញុំ ក៏ទទួលបានការចាក់វ៉ាក់សាំង VeroCell ចំនួន ២ ដូស ដើម្បីបង្ការជំងឺ COVID-១៩ ពួកគេក៏មានការលំនឹងចិត្ត។ គ្រួសារខ្ញុំទាំងមូលតែងអនុវត្តយ៉ាងតឹងរ៉ឹងនូវសារ ៥K ដើម្បីធានាបានល្អបំផុតក្នុងការបង្ការជំងឺ COVID-១៩”។ បងស្រីសើុងធីណីវ នៅភូមិព្រែកឆ្វេង ឃុំថាញ់ភូ ស្រុកមីស្វៀង បានចាក់វ៉ាក់សាំង VeroCell ចំនួន ២ ដូស ក៏បានឱ្យដឹង៖ “ បានចាក់វ៉ាក់សាំង គឺខ្ញុំសប្បាយចិត្តណាស់! ពីព្រោះបានអានកាសែត និងមើលទូរទស្សន៍ បានដឹងថា ការបានចាក់វ៉ាក់សាំងគឺជួយបង្ការប្រឆាំងជំងឺ COVID-១៩ បើឆ្លងជំងឺក៏ងាយស្រួលព្យាបាលជាងអ្នកដែលមិនទាន់បានចាក់វ៉ាក់សាំង។ ឥឡូវនេះ ខ្ញុំបានចាក់វ៉ាកសាំង ២ ដូស ក៏មានការលំនឹងចិត្តជាងមុន”។

ចាក់វ៉ាក់សាំងបង្ការជំងឺ COVID-១៩ដល់ប្រជាជននៅខេត្តសុកត្រាំង។

យោងតាមប្រសាសន៍វេជ្ជបណ្ឌិត ត្រឹងវ៉ាន់យ៉ុង អនុប្រធានមន្ទីរសុខាភិបាលខេត្តសុកត្រាំង មកទល់នឹងពេលនេះ ចំនួនប្រជាជនដែលមានអាយុចាប់ពី ១៨ ឆ្នាំឡើងទៅក្នុងខេត្ត ទទួលបានការចាក់វ៉ាក់សាំង ១ ដូសសម្រេចជិត ៩០% បានចាក់ ២ ដូសសម្រេចជិត ៥៦% ហើយអត្រានៃការគ្រប់ដណ្ដប់ដោយវ៉ាក់សាំងបានកើនឡើងពីមួយថ្ងៃទៅមួយថ្ងៃ។ បច្ចុប្បន្នខេត្ត កំពុងពន្លឿនការចាក់វ៉ាក់សាំងដល់កុមារអាយុពី ១២ ឆ្នាំដល់ ១៧ ឆ្នាំ។ ដល់ត្រីមាសទីមួយនៃឆ្នាំ ២០២២ នឹងចាក់វ៉ាក់សាំង COVID-១៩ ដល់កុមារអាយុចាប់ពី៣ឆ្នាំដល់ក្រោម ១២ ឆ្នាំ តាមការប៉ាន់ស្មានមានកុមារប្រមាណ ១៨២.៤៨១ នាក់ និងកុមារមានអាយុចាប់ពី ១២ ឆ្នាំដល់ក្រោម ១៨ ឆ្នាំ ដែលមិនទាន់បានចាក់។ លោកត្រឹងវ៉ាន់យ៉ុង មានប្រសាសន៍៖ “ទន្ទឹមនឹងការពន្លឿនការចាក់វ៉ាក់សាំង ប្រជាជនគប្បីអនុវត្តយ៉ាងតឹងរ៉ឹងនូវសារ ៥K អនុវត្តការរាយការណ៍សុខាភិបាល ស្កែនកូដ QR ។ល។ ដើម្បីអនុវត្តឲ្យបានល្អការបង្ការជំងឺ COVID-១៩ ខ្ញុំសង្ឃឹមថា ខេត្តនឹងគ្រប់គ្រងជំងឺបានល្អ កាត់បន្ថយទាបបំផុត ការឆ្លងជំងឺក្នុងសហគមន៍ និងរួមគ្នាយកឈ្នះលើជំងឺរាតត្បាត”៕

 លីធាន-បកប្រែ៖ សុផន

ចែករំលែកអត្ថបទ

ពាក្យគន្លឹះ