សុខភាព - អប់រំ អប់រំ

18/10/2021 - 08:03

សមណសិស្សជម្នះលំបាក រៀនពូកែ

សមណសិស្ស លីថាញអាង កំពុងសិក្សាថ្នាក់ទី១២ សាលាមធ្យមសិក្សាបំពេញវិជ្ជាបាលីណាមបូខេត្តសុកត្រាំង ធ្លាប់ទទួលបានប័ណ្ណសរសើររបស់គណៈកម្មាធិការប្រជាជនខេត្តសុកត្រាំង ដោយសម្រេចបានកិត្តិនាមសិស្សរៀនពូកែ ៤ ឆ្នាំបន្តបន្ទាប់នៅកម្រិតអនុវិទ្យាល័យ។ នោះក៏ជាកម្លាំងចលករ ជួយជំរុញទឹកចិត្តព្រះអង្គ រក្សាខ្ជាប់កិត្តិនាមសិស្សរៀនពូកែរហូតមកទល់នឹងបច្ចុប្បន្ន។

សមណសិស្សលីថាញអាង កំពុងព្យាយាមរៀនតាមអនឡាញ។

ឆ្នាំ ២០១៦ យុវជនលីថាញអាង បានឪពុកម្តាយនាំចូលសាងផ្នួសនៅវត្តឃ្លាំង បន្ទាប់ពីនោះ បានព្រះចៅអធិការវត្តបង្កលក្ខណៈឱ្យនិមន្តទៅសិក្សាថ្នាក់ពុទ្ធិកសិក្សានៅវត្តនានាក្នុងខេត្ត។ បន្ទាប់ពីប្រឡងជាប់បាលីរង សមណសិស្សលីថាញអាង បានជ្រើសរើសចូលរៀនសាលាមធ្យមសិក្សាបំពេញវិជ្ជាបាលីណាមបូ។ “ដោយជីវភាពគ្រួសារក្រលំបាក ម៉្លោះហើយ ពេលបានជ្រើសចូលរៀនសាលានេះ អាត្មាភាពសប្បាយចិត្តណាស់ ហើយតែងដាស់តឿនខ្លួនឯងថាត្រូវតែខិតខំរៀនឱ្យបានល្អ។ ពីព្រោះ រៀននៅសាលានេះ សិក្ខាកាមបានទទួលគ្រប់របបគោលនយោបាយសម្រាប់សិស្សស្នាក់នៅអន្តេវាសិកដ្ឋាន បើរៀនពូកែថែមទាំងបានទទួលអាហារូបករណ៍របស់ខេត្តទៀត ដូច្នេះ អាត្មាភាពស្ងប់ចិត្តរៀនសូត្រនិងគោរពតាមលក្ខន្តិកៈរបស់សាលា”។ កំណត់ច្បាស់ការសិក្សា ម៉្លោះហើយ ក្រៅពីថ្ងៃរៀនតាមកាលបរិច្ឆេទ សមណសិស្ស លីថាញអាង នៅទាំងខិតខំធ្វើលំហាត់ដែលគ្រូបង្រៀនប្រគល់ឱ្យ ព្រមទាំងព្យាយាមអានសៀវភៅ និងស្វែងយល់មេរៀនលើប្រព័ន្ធអីុនធឺណីតដើម្បីបង្កើនចំណេះដឹងបន្ថែម។ សមណសិស្សលីថាញអាង ពិតឱ្យដឹង មុននឹងចូលរៀន ព្រះអង្គតែងអានមេរៀនហ្មត់ចត់ កន្លែងណាពុំទាន់យល់កត់ចូលសៀវភៅដៃ។ ពេលចូលរៀនព្យាយាមស្តាប់គ្រូពន្យល់ កន្លែងណាមិនយល់សួរលោកគ្រូអ្នកគ្រូភ្លាម។ ពេលទៅដល់កុដិ ពិនិត្យមេរៀនឡើងវិញនិងធ្វើលំហាត់ ដើម្បីចងចាំមេរៀនបានយូរ។ ចំណែកលំហាត់បង្កើនចំណេះដឹងស្វ័យសិក្សា កន្លែងណាពុំទាន់យល់ ម៉ោងស្វ័យសិក្សា ព្រះអង្គសួរមិត្តភក្តិនិងលោកគ្រូអ្នកគ្រូបន្ថែម។

ដោយការឧស្សាហ៍ព្យាយាម ស៊ូទ្រាំលំបាកក្នុងការរៀនសូត្រ និងមានវិធីសាស្រ្តរៀនប្រកបដោយលក្ខណៈវិទ្យាសាស្រ្ត ម៉្លោះហើយ សមណសិស្សលីថាញអាង តែងរក្សាខ្ជាប់កិត្តិនាមសិស្សរៀនពូកែច្រើនឆ្នាំបន្តបន្ទាប់។ ពិន្ទុមធ្យមភាគរាល់វិញ្ញាសាក្នុងឆ្នាំសិក្សារបស់សមណសិស្សលីថាញអាង សម្រេចពី ៨,៥ ពិន្ទុឡើងទៅ។ ឆ្នាំសិក្សាថ្មីនេះ សមណសិស្សលីថាញអាង ទទួលបានអាហារូបករណ៍ “លឿងឌិញកួ” របស់ខេត្តសម្រាប់សិស្សដែលមានស្ថានភាពលំបាក រៀនពូកែ។ សមណសិស្ស លីថាញអាង ឱ្យដឹង៖ “បច្ចុប្បន្ន សាលាបានរៀបចំបង្រៀនតាមអនឡាញ ដូច្នេះសំខាន់ គឺអាត្មាភាពត្រូវតែសិក្សាស្រាវជ្រាវដោយខ្លួនឯង។ ទិសដៅរបស់អាត្មាគឺខំប្រឹងរៀននិងស្រាវជ្រាវអានសៀវភៅ ស្វែងយល់ព័ត៌មានដែលទាក់ទងនឹងវិញ្ញាសារៀនលើប្រព័ន្ធដើម្បីបង្កើនចំណេះដឹងបន្ថែម។ ពិសេស អាត្មាភាពត្រៀមបម្រុងចំណេះដឹងឱ្យបានគ្រប់គ្រាន់សម្រាប់ការប្រឡងយកសញ្ញាបត្រវិទ្យាល័យ និងបន្តអនុវត្តក្តីប្រាថ្នារៀនមហាវិទ្យាល័យ”៕

លីធាន-មុនី

ចែករំលែកអត្ថបទ

ពាក្យគន្លឹះ