វប្បធម៌-សិល្បៈ វប្បធម៌

23/02/2021 - 08:40

ព្រួតដៃអភិរក្សភ្លេងពិណពាទ្យ

ជាច្រើនឆ្នាំមកនេះ តាំងពីបានខេត្តហូវយ៉ាង ជូនវង់ភ្លេងពិណពាទ្យ វិទ្យាល័យជនជាតិអន្តេវាសិកហ៊ីមឡាម នៅទីប្រជុំជនរ៉ាចហ្គយ ស្រុកចូវថាញ A បានបង្កើតក្រុមភ្លេងពិណពាទ្យ។ ដោយប្អូនៗសិស្សានុសិស្សខ្មែរ បានបន្តវេនគ្នាអភិរក្សនិងពង្រីកតម្លៃតន្រ្តីជនជាតិ។

លោកគ្រូយ័ញហុងអាញ កំពុងបង្ហាត់ប្រគំភ្លេងពិណពាទ្យដល់សិស្ស។

តាមប្រសាសន៍លោកគ្រូឡឹមង៉ុកកង នាយករងវិទ្យាល័យជនជាតិអន្តេវាសិកហ៊ីមឡាម ៖ ឆ្នាំ២០១៣ ខេត្តហូវយ៉ាងបានចាត់តាំងទិវាវប្បធម៌បណ្តាជនជាតិវៀតណាម និងជំនួយវង់ភ្លេងពិណពាទ្យដល់សាលារៀន។ សាលាក៏បានបង្កើតក្រុមភ្លេងពិណពាទ្យដោយជ្រើសរើសសិស្សានុសិស្សពីថ្នាក់ទី ៦ដល់ថ្នាក់ ទី ៩ ពី ៨ នាក់ដល់ ១៤ នាក់។ ព្រមជាមួយគ្នានោះ ខេត្តក៏បានអញ្ជើញតន្រ្តីករនៅខេត្តត្រាវិញ មកបង្ហាត់ភ្លេងពិណពាទ្យដល់សិស្សានុសិស្ស និងលោកគ្រូ អ្នកគ្រូមួយចំនួនក្នុងសាលា។ មកដល់សព្វថ្ងៃ ក្រុមភ្លេងពិណពាទ្យបានបន្តសកម្មភាព អាស្រ័យលោកគ្រូយ័ញហុងអាញ គ្រូបង្រៀនរបស់សាលាទទួលបន្ទុកបង្ហាត់ដោយផ្ទាល់។ លោកគ្រូយ័ញហុងអាញ ឱ្យដឹង៖ “តាំងពីបានជូនភ្លេងពិណពាទ្យមក សាលារៀនតែងជំរុញទឹកចិត្តកូនចៅជនរួមជាតិខ្មែរ រៀនសូត្រហាត់ប្រគំ។ ចំពោះជនរួមជាតិខ្មែរ ភ្លេងពិណពាទ្យត្រូវបានប្រៀបដូចជា “សម្បត្តិដ៏មានតម្លៃ” ម្ល៉ោះហើយប្អូនៗសិស្សានុសិស្សមានការស្រឡាញ់ជក់ចិត្តហាត់រៀនយ៉ាងខ្លាំង”។

ក្រុមភ្លេងពិណពាទ្យរបស់សាលានៅទាំងប្រគំកំដរក្នុងឱកាសបុណ្យទានផ្សេងៗ មានដូច៖ បុណ្យចូលឆ្នាំថ្មី សែនដូនតា ពិធីបើកបវេសនកាលឆ្នាំសិក្សាថ្មី បូកសរុបឆ្នាំសិក្សារបស់សាលារៀន។ល។ ប្អូនលីថ្វយ សមាជិកក្រុមភ្លេងពិណពាទ្យរបស់សាលា ឱ្យដឹង៖ ពេលប្អូនទៅវត្តឬបុណ្យទាន បានស្ដាប់សូរសៀងភ្លេងពិណពាទ្យគឺប្អូនចូលចិត្តខ្លាំងណាស់។ ព្រោះហេតុនោះ ពេលមានលោកគ្រូបង្ហាត់បង្រៀនក្នុងសាលាគឺប្អូនចុះឈ្មោះរៀនភ្លាម។ ឥឡូវ ប្អូនចេះប្រគំនិងបានទៅចូលរួមសម្តែងក្នុងឱកាសបុណ្យទានរបស់ជនជាតិនិងនៅសាលា ប្អូនរីករាយនិងមោទនភាពខ្លាំងណាស់”។

លោកគ្រូឡឹមង៉ុកកង ឱ្យដឹងបន្ថែម៖ “បច្ចុប្បន្ន ចាប់ពីថ្ងៃច័ន្ទដល់ថ្ងៃព្រហស្បតិ៍រៀងរាល់សប្ដាហ៍ គឺគ្រូនិងសិស្សបានប្រមូលផ្ដុំគ្នាហាត់ប្រគំ ៣០ នាទី។ ជាពិសេស រាល់លើកប្រគំភ្លេងពិណពាទ្យនៅក្នុងសាលា ឃើញលោកគ្រូ អ្នកគ្រូ និងសិស្សានុសិស្ស អង្គុយទស្សនាយ៉ាងជក់ចិត្ត។ ប្រការនេះសឱ្យឃើញថា ទឹកចិត្តស្រឡាញ់ភ្លេងពិណពាទ្យរបស់សិស្សានុសិស្សខ្មែរតែងដក់ជប់ជានិច្ច ហើយកំពុងរួមគ្នាអភិរក្សនិងពង្រីកភ្លេងប្រពៃណីជនជាតិ”៕

យ្វីអាញ - ថាច់ធី

ចែករំលែកអត្ថបទ

ពាក្យគន្លឹះ