កីឡា - ទេសចរណ៍ ទេសចរណ៍

08/12/2020 - 08:26

រសជាតិឈ្ងុយឆ្ងាញ់នៃកង្កែបអាំង

រយៈពេលថ្មីៗនេះ មុខម្ហូបកង្កែបអាំងរបស់ជនរួមជាតិខ្មែរនៅអាងយ៉ាង ក្លាយជាមុខម្ហូបដ៏ពេញនិយមរបស់ភ្ញៀវទេសចរ ខណៈពេលមកទស្សនាកម្សាន្តនៅស្រុកទ្រីតូង។ តាមការរៀបរាប់របស់ប្រជាជន ម្ហូបកង្កែបអាំងនេះតែងមាននៅរដូវភ្លៀង។ ព្រោះរយៈពេលនេះ កង្កែប “ពានគ្នា” ម្ល៉ោះហើយចាប់បានច្រើន កង្កែបរដូវភ្លៀង ឆ្ងាញ់ណាស់ ពីព្រោះវាធាត់ សាច់មិនក្លិនឆ្អាប។

រសជាតិឈ្ងុយឆ្ងាញ់នៃកង្កែបអាំងរបស់ជនរួមជាតិខ្មែរនៅទ្រីតូង។

កង្កែបស្រែដែលចាប់បានគេពន្លាត់ស្បែកលាងឱ្យជ្រះ។ កង្កែបតូចៗនិងគ្រឿងក្នុង គេចិញ្ច្រាំឱ្យម៉ដ្ឋជាមួយសាច់ជ្រូកបីជាន់ គល់ស្លឹកគ្រៃ ម្ទេស រមៀតស្រស់ធ្វើឱ្យម្ហូបឡើងពណ៌លឿងគួរជាទីចាប់ភ្នែក ហើយបង់ស្លឹកក្រូចសើចចូលបន្តិចឱ្យឈ្ងុយ។ យកសាច់ដែលផ្សំគ្រឿងទាំងនេះញាត់ចូលខ្លួនកង្កែបធំៗ រួចដាក់ចូលតម្បុតអាំង។ នៅពេលរួចរាល់ រង់ចាំចង្ក្រានមានរងើកភ្លើង យកតម្បុតកង្កែបដាក់ពីលើអាំង។ ប្រែចុះឡើង ២-៣ សា សាច់កង្កែបក៏ក្រៀមបន្តិចម្តងៗ ក្លិនឈ្ងុយឆ្ងាញ់អស្ចារ្យ។ នៅទីឆ្ងាយប៉ះក្លិនឈ្ងុយសាច់កង្កែបអាំង ធ្វើឱ្យអ្នកដំណើរ “ស្រមោច ខាំពោះ”។

កង្កែបអាំងដំបូងឡើយជាមុខម្ហូបសាមញ្ញសម្រាប់តែពួកក្មេងៗ ស្រុកស្រែជនបទប៉ុណ្ណោះ បច្ចុប្បន្នក្លាយជាម្ហូបមួយមុខសម្រាប់បរិភោគបន្ទាប់បន្សំ រួមចំណែកផ្តល់ប្រាក់ចំណូលដល់ប្រជាជនខ្មែរនៅតំបន់ទ្រីតូង។ ក្រៅពីនេះ ម្ហូបកង្កែបអាំងនេះថែមទាំងទាក់ទាញភ្ញៀវទេសចរ ពេលមកទស្សនាកម្សាន្តតំបន់បៃណូយទៀតផង។ ភ្ញៀវទេសចរមកពីតំបន់ឆ្ងាយ ដូច៖ កឹងធើ ដុងថាប វិញឡុង។ល។ ពេលមកដល់ទីនេះ ក៏តែងឆៀងចូលហូបកង្កែបអាំងនៅទីនេះផង ព្រមទាំងទិញផ្ញើសាច់ញាតិនៅឯស្រុកផង។ បងស្រីឡេធីថាញ់ធ្វី ជាភ្ញៀវទេសចរមកកម្សាន្តនៅទ្រីតូង ក្រោយពីហូបកង្កែបអាំងហើយក៏សរសើរមិនដាច់ពីមាត់៖ “ឮមិត្តភក្តិឧទ្ទេសនាមមុខម្ហូបនេះយូរហើយ ឥឡូវទើបនាងខ្ញុំមានឱកាសបានមកដល់ទីនេះនិងបានហូបកង្កែបអាំង។ រសជាតិពិតជាអស្ចារ្យមែន បានបរិភោគម្ដងគឺនឹកមិនភ្លេចទេ។ នាងខ្ញុំនឹងទិញទៅផ្ទះ ដើម្បីផ្ញើគ្រួសារបរិភោគ ឱ្យស្គាល់រសជាតិមុខម្ហូបដ៏ពិសេសនេះ”។

កង្កែបអាំងមានឱជារសឆ្ងាញ់ពិសា ប្លែកមាត់ផង ទាក់ទាញអារម្មណ៍ផង ជាមុខម្ហូបដែលភ្ញៀវទេសចរមិនគួររំលង ពេលមកទស្សនាកម្សាន្តនៅទ្រីតូង៕

ភីដេប-លីសៀ

ចែករំលែកអត្ថបទ

ពាក្យគន្លឹះ