សុខភាព - អប់រំ អប់រំ

07/08/2018 - 09:55

ការបង្រៀនអក្សរខ្មែរឱកាសវិស្សមកាល នៅខេត្តសុកត្រាំង

ពេលឈានចូលដល់វិស្សមកាលរៀងរាល់ឆ្នាំ បណ្តាវត្តខ្មែរនៅខេត្តសុកត្រាំង តែងរៀបចំបើកបង្រៀនអក្សរខ្មែរសម្រាប់កូនចៅ ពុទ្ធបរិស័ទមកសិក្សារៀនសូត្រ។

ព្រះសង្ឃវត្តព្រែកអណ្តើក ឃុំថាញ់ភូ ស្រុកម៉ីស្វៀងកំពុងបង្ហាត់បង្រៀនអក្សរខ្មែរ។

ធម្មតា វិស្សមកាលគឺជាឱកាសសម្រាប់សម្រាកលម្ហែកាយដែលមានសកម្មភាពលេងកម្សាន្តផ្សេងៗ។ ចំណែកកូនចៅជនរួមជាតិខ្មែរ នោះគឺឱកាសសម្រាប់ឆ្លៀតរៀនអក្សរខ្មែរ អាស្រ័យព្រះសង្ឃក្នុងវត្តបើកបង្រៀន។ ព្រះតេជព្រះគុណ លីសាលគង់នៅវត្តបឹងក្រចាប់ថ្មី ឃុំតឹនហឹង ស្រុកឡុងភូ ព្រះអង្គទទួលរ៉ាប់រងបង្ហាត់បង្រៀនអស់រយៈពេលច្រើនឆ្នាំកន្លង មានថេរដីកា៖ “ជារៀងរាល់ឆ្នាំ វត្តតែងបើកបង្រៀនអក្សរខ្មែរចាប់ពីថ្នាក់ទី១ដល់ទី៥ ជូនកូនចៅពុទ្ធបរិស័ទនៅចំណុះជើងវត្តមករៀនជិត១០០នាក់។ ពេលប្អូនៗ មករៀនវត្តបានជំនួយសៀវភៅ សរសេរ ប៊ិចនិងសៀវភៅពុម្ពតាមកម្មវិធីសិក្សាជាដើម។ ប្អូនៗមករៀនអាយុនៅតូចក៏ពិតមែន ប៉ុន្តែចេះស្តាប់បង្គាប់ ព្យាយាមរៀនសូត្រនិងឆាប់យល់មេរៀន។ អាត្មាភាពនឹងខិតខំបង្ហាត់បង្រៀនឲ្យប្អូនៗចេះអានចេះសរសេរឲ្យបានត្រឹមត្រូវ”។

ឯការបើកបង្រៀនអក្សរខ្មែរនៅវត្តព្រែកអណ្តើក ឃុំថាញ់ភូ ស្រុកម៉ីស្វៀង មានកូនចៅជនរួមជាតិ ខ្មែរមករៀនចាប់ពីថ្នាក់ទី១ដល់ទី៣ចំនួន៧០នាក់។ មិនត្រឹមតែមានកូនចៅជនរួមជាតិខ្មែរមករៀនប៉ុណ្ណោះទេ ប៉ុន្មានឆ្នាំជិតៗនេះ ថែមទាំងមានកូនចៅជនជាតិកិញ ជនជាតិចិន មកចុះឈ្មោះចូលរៀនផងដែរ។ ដើម្បីការបង្រៀននិងរៀនសម្រេចបានគុណភាព វត្តបានខ្ចីបន្ទប់រៀនរបស់សាលាបឋមសិក្សាថាញ់ភូ៣ចំនួន៣បន្ទប់។ លោកគ្រូឡេថាញ់ថាយ នាយករងសាលាបឋមសិក្សាថាញ់ភូ៣ ស្រុកម៉ីស្វៀង ឲ្យដឹង៖ “ឈានចូលរដូវវិស្សមកាលរៀងរាល់ឆ្នាំ សាលាតែងទុកបន្ទប់រៀនពី២ដល់៣បន្ទប់សម្រាប់ព្រះសង្ឃបើកបង្រៀនអក្សរខ្មែរ លើកកម្ពស់ចំណេះដឹងជូនប្អូនៗ។ ឆ្លងផុតរដូវវិស្សមកាល ខណៈពេលប្អូនៗចូលរៀនកម្មវិធីចំណេះទូទៅ ឃើញថាចំណេះដឹងខាងភាសាខ្មែររបស់ប្អូនៗមានភាពជឿនលឿនយ៉ាងច្បាស់ក្រឡែត”។ ប្អូនថាច់ត្វឹងខាង និយាយប្រាប់៖ “ព្រោះតែចង់ចេះអក្សរខ្មែរ បានជាប្អូនខំចូលរៀនអក្សរខ្មែរនៅសាលាបឋមសិក្សាថាញ់ភូ៣ រយៈពេល៣រដូវវិស្សមកាលមកហើយ។ ឥឡូវប្អូនក៏ចេះអាននិងចេះសរសេរអក្សរខ្មែរ”។

ព្រះតេជព្រះគុណ ឡឹមច័ន្ទសំណាង ព្រះពហុស្សូតវត្តព្រែកអណ្តើកមានថេរដីកា៖ “ការបើកបង្រៀនអក្សរខ្មែរ សំដៅរួមជាមួយនឹងបក្ខភាគ រដ្ឋអំណាចជ្រោមជ្រែងក្នុងការអប់រំប្អូនៗអំពីសីលធម៌ ផ្នត់រស់នៅល្អប្រសើរ ក៏ដូចជាប្រពៃណី អត្តសញ្ញាណវប្បធម៌របស់ជនជាតិ៕

ត្រឿងផល- ថាច់ធី

ចែករំលែកអត្ថបទ

ពាក្យគន្លឹះ