សុខភាព - អប់រំ សុខភាព

04/11/2026 - 21:25

គ្រូពេទ្យថាច់ធីអាញ់ង៉ុក - អស់ពីចិត្តចំពោះអ្នកជំងឺ

អស់ពីចិត្តរាក់ទាក់ពិនិត្យសុខភាព ណែនាំអ្នកជំងឺដោយភាសាវៀតណាមផង ភាសាខ្មែរផង គ្រូពេទ្យថាច់ធីអាញ់ង៉ុក បម្រើការងារនៅដំណាក់សុខាភិបាលឃុំតាមង៉ាយ ខេត្តវិញឡុង ជួយឱ្យមាមីងងាយយល់ កាន់តែស្ងប់ចិត្តពេលពិនិត្យ ព្យាបាលជំងឺ។ ផ្សារភ្ជាប់ជាមួយសុខាភិបាលមូលដ្ឋាន បងស្រីរៀនសូត្រ លើកកម្ពស់សមត្ថភាពមុខជំនាញដោយឥតឈប់ឈរ ដើម្បីថែទាំសុខភាពប្រជាជនឱ្យកាន់តែល្អប្រសើរ។

បងស្រី ថាច់ធីអាញ់ង៉ុក នៅភូមិពោធិ៍ធំ ឃុំកូវកែ ខេត្តវិញឡុង កើតនិងធំដឹងក្តីក្នុងគ្រួសារដែលប្រកបរបរស្រែចម្ការ។ ដោយមានបំណងចង់ថែទាំសុខភាពដល់មនុស្សគ្រប់គ្នា ពិសេសគឺមាមីងខ្មែរជួបការលំបាកខណៈប្រាស្រ័យទាក់ទងជាភាសាវៀតណាម បងស្រីបានសម្រេចចិត្តជ្រើសរៀនមុខវិជ្ជាពេទ្យ។ ក្រោយពីបញ្ចប់ការសិក្សាវិទ្យាល័យ ឆ្នាំ២០០៥ បងស្រីជាប់ជម្រើសមុខវិជ្ជាពេទ្យនៅសាលាមធ្យមសិក្សាពេទ្យយោធា ១២១ កឹងធើ និងបញ្ចប់ការសិក្សាឆ្នាំ២០០៧។ ក្រោយមក បងស្រីវិលត្រឡប់មកបំពេញការងារនៅដំណាក់សុខាភិបាលឃុំថុងហ្វា បច្ចុប្បន្នជាឃុំតាមង៉ាយ ខេត្តវិញឡុង។

គ្រូពេទ្យថាច់ធីអាញ់ង៉ុក អស់ពីចិត្តពិនិត្យសុខភាពជូនអ្នកជំងឺ។

ក្នុងដំណើរការបំពេញការងារ បងស្រីង៉ុក សន្សំបទពិសោធន៍បណ្តើរ រៀនសូត្របណ្តើរដើម្បីលើកកម្ពស់សមត្ថភាពមុខជំនាញបណ្តើរ។ នៅពេលជួបប្រាស្រ័យជាមួយអ្នកជំងឺ បងស្រីតែងយកចិត្តទុកដាក់ស្តាប់ អស់ពីចិត្តរាក់ទាក់ពិនិត្យសុខភាពនិងណែនាំជូនអ្នកជំងឺ។ ចំពោះប្រជាជនខ្មែរដែលមិនស្ទាត់ភាសាវៀតណាម បងស្រីតែងនិយាយទាក់ទងជាភាសាខ្មែរ ជួយមាមីងងាយស្រួលរៀបរាប់ពីស្ថានភាពសុខភាព និងយល់ច្បាស់ពីការណែនាំប្រើប្រាស់ថ្នាំ។ ការរាក់ទាក់រួមជាមួយវិធីពន្យល់យ៉ាងជិតស្និទ្ធជួយឱ្យអ្នកជំងឺស្ងប់ចិត្ត ក្លាហានសាកសួររាល់ការងឿងឆ្ងល់ពេលមកពិនិត្យសុខភាព។ សមត្ថភាពប្រើប្រាស់ទាំងភាសាវៀតណាម និងភាសាខ្មែរ ជួយឱ្យបងស្រីថែទាំ និងណែនាំអ្នកជំងឺកាន់តែល្អប្រសើរ។

គ្រូពេទ្យថាច់ធីអាញ់ង៉ុក អស់ពីចិត្តណែនាំអ្នកជំងឺពីរបៀបប្រើប្រាស់ថ្នាំពេលត្រឡប់ទៅផ្ទះវិញ។

អ្នកមីង ថាច់ធីហយ នៅភូមិកំបាំងបាត់ ឃុំតាមង៉ាយ ឱ្យដឹង អ្នកមីងតែងមកដំណាក់សុខាភិបាលពិនិត្យសុខភាពដោយសារជំងឺសម្ពាធឈាមខ្ពស់ និងឈឺសន្លាក់ឆ្អឹង។ នៅទីនេះ អ្នកមីងបានគ្រូពេទ្យថាច់ ធីអាញ់ង៉ុក អស់ពីចិត្តរាក់ទាក់ពិនិត្យសុខភាព ពន្យល់ និងណែនាំពីរបៀបលេបថ្នាំយ៉ាងុមត់ចត់ ម្ល៉ោះហើយងាយយល់។ បើតាមអ្នកមីងហយ បងស្រីង៉ុក តែងរាក់ទាក់យ៉ាងខ្លាំងចំពោះអ្នកជំងឺ ជួយឱ្យអ្នកមីងកាន់តែស្ងប់ចិត្តពេលមកដំណាក់សុខាភិបាលម្តងៗ។ ការទុកចិត្តរបស់ប្រជាជនបានបង្ហាញពីអត្ថន័យនៃការណែនាំដោយប្រើប្រាស់ភាសាកំណើតក្នុងការថែទាំសុខភាពជនរួមជាតិខ្មែរ។

អ្នកស្រីថាច់សូដា នាយិកាដំណាក់សុខាភិបាលឃុំតាមង៉ាយ វាយតម្លៃខ្ពស់ចំពោះបងស្រីអាញ់ង៉ុក ថាជាបុគ្គលិកដែលទ្រាំលំបាករៀនសូត្រ លើកកម្ពស់សមត្ថភាពមុខជំនាញដើម្បីឆ្លើយតបទៅនឹងតម្រូវការធ្វើឱ្យសុក្រឹត និងបង្កើនប្រសិទ្ធភាពពិនិត្យ ព្យាបាលជំងឺ។ បច្ចុប្បន្ន បងស្រីកំពុងសិក្សាកម្មវិធីអនុមហាវិទ្យាល័យគ្រូពេទ្យនៃសាលាអនុមហាវិទ្យាល័យផាមង៉ុកថាច់កឹងធើ។ ការបន្តរៀនសូត្រនេះបង្ហាញពីស្មារតីទទួលខុសត្រូវ និងស្មារតីលត់ដំដើម្បីឆ្លើយតបតាមតម្រូវការការងារ។ តាមរយៈការអស់ពីចិត្ត និងវិធីប្រាស្រ័យទាក់ទងយ៉ាងជិតស្និទ្ធ គ្រូពេទ្យថាច់ធីអាញ់ង៉ុក រួមចំណែកថែទាំសុខភាពប្រជាជន និងជាគំរូអំពីស្មារតីរៀនសូត្រ និងការទទួលខុសត្រូវចំពោះសហគមន៍៕

ទីទុយ - លីសៀ

ចែករំលែកអត្ថបទ

ពាក្យគន្លឹះ