សុខភាព - អប់រំ អប់រំ

07/10/2025 - 15:11

វិទ្យាល័យជនជាតិអន្តេវាសិកហ្វិញកឿង - ឆ្នាំសិក្សាថ្មី ការប្តេជ្ញាចិត្តថ្មី

ជាមួយនឹងការប្តេជ្ញាចិត្តជំរុញសមិទ្ធផលនានាដែលសម្រេចបាន ឆ្នាំសិក្សា ២០២៥-២០២៦ វិទ្យាល័យជនជាតិអន្តេវាសិកហ្វិញកឿង បន្តច្នៃប្រតិដ្ឋវិធីសាស្រ្តបង្រៀន និងលើកកម្ពស់គុណភាពអប់រំ រួមចំណែកកសាងបរិយាកាសសិក្សាសកម្ម គ្រប់ជ្រុងជ្រោយសម្រាប់សិស្សានុសិស្ស។

ពិធីបើកបវេសនកាលឆ្នាំសិក្សាថ្មីនៅវិទ្យាល័យជនជាតិអន្តេវាសិកហ្វិញកឿង។

ឆ្នាំសិក្សា ២០២៥-២០២៦ វិទ្យាល័យជនជាតិអន្តេវាសិកហ្វិញកឿង ពិតជាមានមោទនភាព ដោយមានគ្រូបង្រៀនចំនួន ០៤ នាក់ទទួលបានប័ណ្ណសរសើររបស់នាយករដ្ឋមន្ត្រី និងគ្រូបង្រៀនម្នាក់ទទួលបានប័ណ្ណសរសើររបស់រដ្ឋមន្ត្រីក្រសួងអប់រំនិងបណ្តុះបណ្តាល។ ចំណែកខាងសិស្សវិញ មានសិស្ស១៥នាក់សម្រេចនិទ្ទេសឆ្នើម ២០១នាក់សម្រេចនិទ្ទេសពូកែ និង៣៧៨នាក់សម្រេចនិទ្ទេសគ្រាន់បើ។ អត្រាសិស្សជាប់សញ្ញាបត្រវិទ្យាល័យឆ្នាំ ២០២៥ សម្រេច១០០% ក្នុងនោះមានសិស្សជាង ៧០% ជាប់ជម្រើសមហាវិទ្យាល័យសម្រាប់គោលបំណងទី១។ ពិសេស សាលាមានសិស្ស១៧នាក់ សម្រេចកិត្តនាមសិស្សរៀនពូកែថ្នាក់ខេត្ត រួមចំណែកក្នុងការបញ្ជាក់ពីគុណភាពអប់រំរបស់សាលា។

ឆ្នាំសិក្សាថ្មីនេះ សាលាមានថ្នាក់រៀន ១៨ បន្ទប់ ដោយមានចំនួនសិស្ស ៦២០នាក់ និងកម្មាភិបាល គ្រូបង្រៀន ៥៩នាក់ ។ ដើម្បីបន្តលើកកម្ពស់សមិទ្ធផលដែលសម្រេចបាន លោកគ្រូ អ្នកគ្រូ និងសិស្សានុសិស្សរបស់វិទ្យាល័យជនជាតិអន្តេវាសិកហ្វិញកឿង បន្តអនុវត្តមានប្រសិទ្ធភាពនូវយុទ្ធនាការកៀរគរ និងចលនាប្រឡងប្រណាំងរបស់ផ្នែក។ កសាងនិងផ្សព្វផ្សាយអនុវត្តផែនការបង្រៀនតាមកម្មវិធីអប់រំចំណេះទូទៅឆ្នាំ ២០១៨; លើកកម្ពស់ឥតឈប់ឈរនូវសមត្ថភាពកម្មាភិបាលគ្រប់គ្រងនិងកងជួរគ្រូបង្រៀន ផ្លាស់ថ្មីវិធីសាស្រ្តបង្រៀន ធ្វើតេស្តនិងវាយតម្លៃ ផ្តោតលើការផ្លាស់ថ្មីកិច្ចប្រជុំមុខជំនាញ។ បង្កើនតួនាទីរបស់គ្រូប្រចាំថ្នាក់ និងអ្នកគ្រប់គ្រងសិស្ស សហការជិតស្និទ្ធជាមួយអាណាព្យាបាលសិស្ស ដើម្បីអនុវត្តការអប់រំគ្រប់ជ្រុងជ្រោយ។

វិទ្យាល័យជនជាតិអន្តេវាសិកហ្វិញកឿង តែងច្នៃប្រតិដ្ឋវិធីសាស្រ្តបង្រៀន និងលើកកម្ពស់គុណភាពអប់រំដល់សិស្ស។

លោកគ្រូផុងភឿកធៀង ចាងហ្វាងវិទ្យាល័យជនជាតិអន្តេវាសិកហ្វិញកឿង ឱ្យដឹង៖ “ឆ្នាំសិក្សា២០២៥-២០២៦ វិទ្យាល័យជនជាតិអន្តេវាសិកហ្វិញកឿង នឹងបន្តពង្រីកស្នាដៃដែលសម្រេចបាន ហើយប្តេជ្ញាបំពេញភារកិច្ចសំខាន់ៗដែលសាលាបានកំណត់។ ទន្ទឹមនឹងនោះ ទូទាំងសាលាសកម្មគាំទ្រនិងផ្សព្វផ្សាយអនុវត្តមានប្រសិទ្ធភាពប្រធានបទក្នុងឆ្នាំសិក្សា៖ "ក្រឹត្យក្រម ច្នៃប្រតិដ្ឋ លោតផ្លោះ និងអភិវឌ្ឍ" ដែលមន្ទីរអប់រំនិងបណ្តុះបណ្តាលដាក់ចេញ ដើម្បីលើកកម្ពស់គុណភាពអប់រំនិងលត់ដំបំណិនគ្រប់ផ្នែកដល់សិស្សានុសិស្ស”។

យោងតាមលោកគ្រូ ផុងភឿកធៀង ឆ្នាំនេះ សាលាប្ដេជ្ញាលើកកម្ពស់គុណភាពអប់រំ ខិតខំបង្កើនអត្រាសិស្សមាននិទ្ទេសប្រសើរ ពូកែ និងចរិយាសម្បត្តិល្អសម្រេច ១០០%។ រក្សាខ្ជាប់អត្រាសិស្សប្រឡងជាប់សញ្ញាបត្រវិទ្យាល័យ១០០%; ចូលរួមយ៉ាងពេញលេញនៅចលនាប្រឡងប្រណាំងជាមួយទិសដៅតិចបំផុតមានសិស្សចំនួន ២០ នាក់សម្រេចរង្វាន់ថ្នាក់ខេត្ត និងខិតខំដើម្បីមានសិស្សចូលរួមក្រុមជម្រើសសិស្សពូកែថ្នាក់ជាតិ។ ទន្ទឹមនឹងនោះ ក៏ធានាកិត្តិនាមប្រឡងប្រណាំងសម្រាប់កម្មាភិបាល គ្រូបង្រៀន និងបុគ្គលិកតាមភាគកម្រិតរបស់មន្ទីរអប់រំនិងបណ្តុះបណ្តាល។

ប្អូនគឹមតឹងឡុក សិស្សថ្នាក់ទី ១២C២ ចែករំលែក៖ "ក្រោយពីឈានចូលឆ្នាំសិក្សាថ្មីជិត ១ ខែ ក៏ជាឆ្នាំចុងក្រោយ នាំមកឱ្យប្អូននូវឱកាសនិងបញ្ហាប្រឈមជាច្រើន ប្អូននឹងខិតខំថែមទៀតដើម្បីពង្រីកអស់ពីសមត្ថភាពរបស់ខ្លួន ហើយមិនត្រឹមតែក្នុងការសិក្សាប៉ុណ្ណោះទេ ថែមទាំងក្នុងសកម្មភាពចលនាប្រឡងប្រណាំង រួមចំណែកជាមួយសាលាកសាងវិទ្យាល័យជនជាតិអន្តេវាសិកហ្វិញកឿង ឱ្យកាន់តែអភិវឌ្ឍរឹងមាំ"។

ជាមួយទិសដៅច្បាស់លាស់និងការប្តេជ្ញាចិត្តខ្ពស់ ឆ្នាំសិក្សា ២០២៥-២០២៦ សន្យាថាជាឆ្នាំសិក្សាឈានឡើង បន្តបញ្ជាក់ពីតួនាទី និងគុណភាពរបស់វិទ្យាល័យជនជាតិអន្តេវាសិកហ្វិញកឿង ក្នុងការងារអប់រំនិងបណ្តុះបណ្តាលធនធានមនុស្សតំបន់ជនជាតិភាគតិចនៅទីក្រុងកឹងធើ៕

អត្ថបទ និងរូបថត៖ ហុងទឺ - មេងលី

ចែករំលែកអត្ថបទ

ពាក្យគន្លឹះ