វប្បធម៌-សិល្បៈ វប្បធម៌

19/04/2025 - 09:59

ជក់ចិត្តនឹងសិល្បៈប្រពៃណី

សិល្បករឆ្នើម យ័ញតៀង នៅឃុំឌិញហ្វា ស្រុកហ្គក្វាវ ខេត្តគៀងយ៉ាង បានបង្កើត “ក្រុមសិល្បៈមហាជនខ្មែរ”។ ក្រុមតែងចូលរួមសម្តែងក្នុងព្រឹត្តិការណ៍ផ្សេងៗ ពិធីបុណ្យទាននិងបុណ្យប្រពៃណីរបស់ជនជាតិខ្មែរ រួមចំណែកអភិរក្សនិងពង្រីកអត្តសញ្ញាណវប្បធម៌ជនជាតិ។

សិល្បករឆ្នើម យ័ញតៀង ធ្វើក្បាំងមុខពីក្រដាសកាតតុង។

សិល្បករឆ្នើម យ័ញតៀង កើតនៅឆ្នាំ ១៩៦៣ ក្នុងគ្រួសារមួយដែលមានប្រពៃណីស្រឡាញ់សិល្បៈខ្មែរ។ នៅពេលសិល្បករឆ្នើម យ័ញតៀង មានអាយុ១០ឆ្នាំ ឪពុកម្តាយឱ្យទៅវត្តបួសរៀននៅឯជឿងធៀង។ លុះអាយុ ១២ឆ្នាំ គាត់បានត្រឡប់មកសិក្សានៅវត្តសិរីឧត្តមវង្សាអំពាចវែងថ្មី។ នៅទីនេះ គាត់ក៏បានលោកយ័ញបេន ស្រុកកំណើតនៅខេត្តត្រាវិញ បង្រៀនពីឧបករណ៍ភ្លេងខ្មែរ របៀបសម្តែងរបាំ ដូច៖ របាំអប្សរា គោះត្រឡោក និងរបាំឆៃយុាំ។

ឆ្នាំ១៩៧៣ ពូតៀង លាចាកសិក្ខាបទ ហើយចូលរួមជាមួយក្រុមយូរកេរឃុំឌិញអាង ដែលដឹកនាំដោយលោកយ័ញតូង។ នៅទីនោះ គាត់បានបងស្រីទឺបឹង កូនស្រីរបស់លោកយ័ញតូង បង្រៀនបន្ថែមពីរបាំយក្ស របាំប្រពៃណីនិងល្ខោនយូរកេរ។ តាំងពីនោះ ពូយ័ញតៀង បានសិក្សាស៊ី ជម្រៅពីអត្តសញ្ញាណវប្បធម៌របស់ជនជាតិ ក៏ដូចជាបំពេញចំណង់ចំណូលចិត្តរបស់ខ្លួនចំពោះសិល្បៈខ្មែរ។ ពេលបានទៅសម្តែងនៅតាមភូមិស្រុក និងវត្តនានាក្នុងស្រុកហ្គក្វាវ និងយ៉ុងរៀង ក៏ដូចជាឱកាសបុណ្យទានផ្សេងៗ គឺគាត់សប្បាយចិត្តណាស់។ ដោយឃើញពីតម្រូវការរបស់ជនរួមជាតិកាន់តែខ្លាំងឡើងៗ នៅឆ្នាំ១៩៨១ ពូតៀង សម្រេចចិត្តបង្កើត “ក្រុមសិល្បៈមហាជនខ្មែរ”។

“ក្រុមសិល្បៈមហាជនខ្មែរ” របស់សិល្បករឆ្នើម យ័ញតៀងចូលរួមសម្ដែងក្នុងមហោស្រពសិល្បៈ។

ក្រុមសិល្បៈនេះបានមាមីងចូលទស្សនានិងគាំទ្រលើកទឹកចិត្តខ្លាំងណាស់។ ពិសេស ដោយសារមានទេពកោសល្យនិងបទពិសោធន៍ កាលពីសម្តែងនៅក្រុមសិល្បៈរបស់បងស្រីទឺបឹង ជាច្រើនឆ្នាំ ពូតៀង បានចាប់ផ្តើមនិពន្ធចងក្រង ឈុតឆាក ក្បាច់របាំ បង្រៀនរបាំប្រជាប្រិយនិងឧបករណ៍ភ្លេងប្រពៃណីជាដើម។

សិល្បករឆ្នើម យ័ញតៀង នៅទាំងច្នៃបង្កើតឧបករណ៍ជាច្រើនសម្រាប់កូនចៅជំនាន់ក្រោយ ស្នងបន្តនិងពង្រីក ដូច៖ ចាប៉ីដងវែង ទ្រអ៊ូ ទ្រសោ ខ្លុយ ស្គរ ក្បាលស្វា ក្បាលយក្ស ភ្លេងពិណពាទ្យ។ល។ ដើម្បីបម្រើការសម្តែងនិងរក្សាបានគង់វង្សរហូតមកដល់សព្វថ្ងៃ។

ពូយ័ញតៀង ចែករំលែក៖ “រយៈពេលចូលប្រឡូកនឹងសិល្បៈ ខ្ញុំទទួលបានរង្វាន់ដ៏មានតម្លៃជាច្រើន ដូច៖ បានរដ្ឋជូនងារជាសិល្បករឆ្នើម និងរង្វាន់ផ្សេងៗក្នុងមហោស្រពសិល្បៈ ពិធីប្រឡងសិល្បៈថ្នាក់ខេត្តនិងទូទាំងប្រទេស។ ប៉ុន្តែ រង្វាន់ដែលខ្ញុំពេញចិត្តបំផុតគឺការបណ្តុះបណ្តាល បានសមាជិកជាច្រើន ជួយឱ្យក្មួយៗយល់ដឹងពីតម្លៃសិល្បៈ ក៏ដូចជាការស្រឡាញ់វប្បធម៌ប្រពៃណីរបស់ខ្លួន ដើម្បីថែរក្សានិងអភិរក្សជាបន្ត។ ព្រះតេជគុណយ័ញហាញ់ ព្រះចៅអធិការវត្តនគរជុំបឹងមូល មានថេរដីកា៖ “សិល្បករឆ្នើមយ័ញតៀង ជាជនជាតិខ្មែរដែលស្រឡាញ់សិល្បៈតាំងពីក្មេង។ គាត់ជាគំរូឆ្នើមក្នុងការថែរក្សាវប្បធម៌ សិល្បៈខ្មែរនៅភូមិភាគ”។

តាមប្រសាសន៍លោកស្រី ង្វៀងធីកេវហ្វាញ អនុប្រធានគណៈកម្មាធិការប្រជាជនឃុំឌិញអាង គ្រួសារសិល្បករឆ្នើម យ័ញតៀង គឺជាគ្រួសារខ្មែរគំរូមួយនៅភូមិភាគ។ គ្រួសារគាត់តែងសកម្មចូលរួមនិងមានការរួមចំណែកក្នុងការអភិរក្ស និងលើកតម្កើងអត្តសញ្ញាណវប្បធម៌សិល្បៈរបស់ជនរួមជាតិខ្មែរ។ ថ្មីៗនេះ គណៈកម្មាធិការប្រជាជនស្រុកហ្គក្វាវ ក៏បានឧបត្ថម្ភភ្លេងពិណពាទ្យជូនគាត់មួយវង់ តម្លៃជាង២០០លានដុង ដើម្បីឱ្យគាត់បន្តបង្រៀនដល់កូនចៅខ្មែរ៕

ទ្រុងធឿង-មេងលី

ចែករំលែកអត្ថបទ

ពាក្យគន្លឹះ