វប្បធម៌-សិល្បៈ វប្បធម៌

03/03/2025 - 15:05

ថែរក្សាតម្លៃវប្បធម៌ខ្មែរណាមបូ

រយៈពេលកន្លង ខេត្តវិញឡុង បានយកចិត្តទុកដាក់យ៉ាងពិសេសដល់ការថែរក្សាតម្លៃវប្បធម៌ សិល្បៈប្រពៃណី; រួមចំណែកកសាងជីវភាពស្មារតីរបស់ជនរួមជាតិខ្មែរនិយាយដោយឡែក និងបណ្ដាជនជាតិជាបងប្អូនលើភូមិសាស្រ្តខេត្តនិយាយរួម។

ឈុតសម្ដែងសិល្បៈប្រពៃណីរបស់សិស្សានុសិស្សខ្មែរនៅខេត្តវិញឡុង។

រយៈពេល ៣ ឆ្នាំកន្លង សាលាទេពកោសល្យសិល្បៈនិងកីឡាអប់រំកាយខេត្តវិញឡុង បានសហការជាមួយអង្គភាពជាប់ពាក់ព័ន្ធ និងវត្តខ្មែរលើភូមិសាស្រ្តខេត្ត បើកថ្នាក់បង្រៀនរបាំនិងតន្រ្តីរបស់ជនរួមជាតិខ្មែរបានចំនួន ១៤ ថ្នាក់ ទាក់ទាញសិស្សរាប់រយនាក់ចូលរៀន។ ឆ្លងតាមរយៈនោះ មានអ្នកជាច្រើនបានចេះស្ទាត់ជំនាញទម្រង់សិល្បៈរបស់ជនជាតិ។

ដើម្បីថ្នាក់រៀនប្រព្រឹត្តទៅដោយរលូន សាលាទេពកោសល្យសិល្បៈនិងកីឡាអប់រំកាយខេត្តវិញឡុង បានសហការជាមួយនឹងគណៈកម្មការវត្តសង់ច្រវាចាស់ ភូមិត្រាសើុង ឃុំហ៊ឺវថាញ់ បើកថ្នាក់បង្រៀន។ អាស្រ័យហេតុនោះ ថ្នាក់រៀនត្រូវបានវត្តឧបត្ថម្ភគ្រប់សព្វអំពីមូលដ្ឋានសម្ភារៈ។ “វត្តតែងបង្កលក្ខណៈងាយស្រួលដើម្បីប្អូនៗ សប្បាយរីករាយក្នុងការរៀនសូត្រ។ ព្រះសង្ឃ គណៈកម្មការវត្តនិងជនរួមជាតិខ្មែរមានក្ដីសោមនស្សរីករាយពេលបានរដ្ឋរៀបចំបើកថ្នាក់រៀននេះឡើង សំដៅថែរក្សានិងពង្រីកអត្តសញ្ញាណវប្បធម៌ជនជាតិ។ ព្រះសង្ឃក្នុងវត្តតែងដាស់តឿនក្រើនរំលឹកដល់សិស្សានុសិស្សឱ្យខិតខំរៀនសូត្រដើម្បីអភិរក្សវប្បធម៌ជនជាតិ” ព្រះតេជព្រះគុណ ថាច់តម្រា ព្រះចៅអធិការវត្តសង់ច្រវាចាស់ មានថេរដីកា ដូច្នោះ។

ដើម្បីធានាគុណភាពនៃការបង្រៀននិងរៀន សាលាទេពកោសល្យសិល្បៈនិងកីឡាអប់រំកាយ ខេត្តវិញឡុង បានអញ្ជើញគ្រូនៅមហាវិទ្យាល័យ គរុកោសល្យខេត្តត្រាវិញ មកបង្ហាត់បង្រៀនដល់សិស្សានុសិស្ស។ លោកគ្រូ ថាច់ហ្វាយថាញ គ្រូដែលបានអញ្ជើញមកបង្ហាត់ ឱ្យដឹង៖ “ទោះបីមមាញឹកនឹងការងារនៅអង្គភាពក៏ដោយ តែខ្ញុំតែងឆ្លៀតពេលទៅខេត្តវិញឡុងបង្រៀន ដោយមានបំណងផ្ដល់ចំណេះដឹងខាងវប្បធម៌ជូនជនរួមជាតិខ្មែរនៅទីនោះ។ ខ្ញុំរីករាយណាស់ពេលបានចូលរួមបង្ហាត់ភ្លេងជូនប្អូនៗជនរួមជាតិខ្មែរ។ សិស្សានុសិស្សមានភាពសកម្មខ្លាំងណាស់ បានធ្វើឱ្យខ្ញុំរឹតតែមានកម្លាំងចិត្តដើម្បីផ្ទេរចំណេះដឹង”។

ផ្នែកខាងសាលារៀន នាយករងនៃសាលាទេពកោសល្យសិល្បៈនិងកីឡាអប់រំកាយខេត្តវិញឡុង លោកង្វៀងង៉ុកថាញ ឱ្យដឹង៖ “សកម្មភាពសហគមន៍ ក៏ដូចជាទម្រង់វប្បធម៌ សិល្បៈនិងឧបករណ៍ភ្លេងរបស់ជនជាតិភាគតិច សុទ្ធសឹងត្រូវបានបញ្ចូលក្នុងកម្មវិធីសិក្សា ហើយត្រូវបានបែងចែកបង្រៀននៅឆ្នាំនីមួយៗ ដើម្បីធ្វើឱ្យសម្បូរបែបកម្មវិធីសិក្សា។ ឆ្នាំនេះបង្ហាត់ចម្រៀងចាប៉ីដងវែង ឆ្នាំក្រោយគឺបង្ហាត់ភ្លេងពិណពាទ្យ។ ទូទាំងខេត្តមានវត្តខ្មែរចំនួន ១៣ ហើយត្រូវបានបង្ហាត់បង្រៀនជាលំដាប់លំដោយក្នុងប៉ុន្មានឆ្នាំខាងមុខ”។

តាមថ្នាក់ដឹកនាំមន្ទីរវប្បធម៌ កីឡានិងទេសចរណ៍ខេត្តវិញឡុង បានឱ្យដឹង ដោយសារអនុវត្តល្អនូវការងារអភិរក្សនិងពង្រីកទម្រង់វប្បធម៌ សិល្បៈ មកទល់បច្ចុប្បន្នលើភូមិសាស្រ្តខេត្ត មានសិប្បករឆ្នើម៤៣នាក់ត្រូវបានទទួលស្គាល់ ក្នុងនោះ មានសិប្បករជាច្រើនមានការផ្សារភ្ជាប់ នឹងទម្រង់សិល្បៈដ៏ពិសេសរបស់ជនជាតិខ្មែរ ដែលប្រឈមនឹងការបាត់បង់៕

យោងតាមកាសែតប្រជាជន - ថាច់ធី

ចែករំលែកអត្ថបទ

ពាក្យគន្លឹះ