សុខភាព - អប់រំ អប់រំ

21/10/2024 - 15:50

បំផុសចលនាដល់សិស្ស និស្សិត អនុវត្តម៉ឺងម៉ាត់ច្បាប់ស្តីពីសុវត្ថិភាពចរាចរណ៍

ក្រសួងអប់រំនិងបណ្តុះបណ្តាល ទើបសហការជាមួយគណៈកម្មាធិការសុវត្ថិភាពចរាចរណ៍ជាតិ ក្រុមហ៊ុន Honda វៀតណាម មូលនិធិធានារ៉ាប់រងយានយន្ត រៀបចំពិធីបំផុសចលនាដល់សិស្ស និស្សិត អនុវត្តម៉ឺងម៉ាត់ច្បាប់ស្តីពីសុវត្ថិភាពចរាចរណ៍ និងផ្សព្វផ្សាយច្បាប់ស្ដីពីសុវត្ថិភាពចរាចរណ៍ផ្លូវគោក; ព្រមទាំងណែនាំបំណិនបើកបរយានយន្តសុវត្ថិភាព។

សិស្សវិទ្យាល័យង្វៀងវៀតយុង (ក្រុងកឹងធើ) ចូលរួមពិធីបំផុសចលនា។ រូប៖: B.NG

កម្មវិធីត្រូវបានតភ្ជាប់តាមប្រព័ន្ធអនឡាញ ជាមួយសាលារៀនជាច្រើនក្នុងទូទាំងប្រទេស។ នៅក្រុងកឹងធើ កម្មវិធីត្រូវបានរៀបចំនៅវិទ្យាល័យង្វៀងវៀតយុង (ខណ្ឌកៃរុាំង) ដោយមានការចូលរួមពីអ្នកតំណាងមន្ទីរ ផ្នែក គណៈកម្មការសុវត្ថិភាពចរាចរណ៍ក្រុង វិទ្យាល័យនានា និងសិស្សានុសិស្សប្រមាណ១៦០នាក់៘

នៅក្នុងពិធីបំផុសចលនា លោកត្រឹងវ៉ាន់ដាក ប្រធាននាយកដ្ឋានអប់រំនយោបាយនិងការងារសិស្ស និស្សិត (ក្រសួងអប់រំនិងបណ្តុះបណ្តាល) គូសបញ្ជាក់៖ ឆ្នាំសិក្សា២០២៤- ២០២៥ គឺជាឆ្នាំសិក្សាដែលជំរុញនិងលើកកម្ពស់ប្រសិទ្ធភាពអប់រំសុវត្ថិភាពចរាចរណ៍ដល់សិស្ស និស្សិត រួមចំណែកអប់រំច្បាប់ អប់រំសីលធម៌ ផ្នត់គំនិតរស់នៅនិងបំណិនជីវិតដល់យុវវ័យ។ ទន្ទឹមនឹងនោះ សំណូមពរដល់លោកគ្រូអ្នកគ្រូ សិស្ស និស្សិត អនុវត្តម៉ឺងម៉ាត់នូវបទប្បញ្ញត្តិនៃច្បាប់ស្តីពីសុវត្ថិភាពចរាចរណ៍; លើកកម្ពស់ស្មារតីភ្ញាក់រលឹកដោយខ្លួនឯងនិងស្មារតីទទួលខុសត្រូវក្នុងការចូលរួមធានាសណ្ដាប់ធ្នាប់សុវត្ថិភាពចរាចរណ៍; ព្រមទាំងជាអ្នកផ្សព្វផ្សាយដ៏ល្អបំផុតដល់គ្រួសារ មិត្តភក្តិ និងសហគមន៍ ប្រជាជន ផ្តើមពីនោះ កសាងឱ្យបានវប្បធម៌ចរាចរណ៍ដល់កងជួរកម្មាភិបាលគ្រប់គ្រង គ្រូបង្រៀននិងសិស្ស និស្សិត ក្នុងទូទាំងប្រទេស៘

សិស្សវិទ្យាល័យង្វៀងវៀតយុង (ក្រុងកឹងធើ) ត្រូវបានណែនាំពីការពាក់
មួកសុវត្ថិភាពត្រូវរបៀប។ រូប៖ B.NG

តាមប្រសាសន៍លោក ឡេគីមថាញ់ អនុប្រធានទទួលបន្ទុកគណៈកម្មាធិការសុវត្ថិភាពចរាចរណ៍ជាតិ ករណីគ្រោះថ្នាក់ចរាចរណ៍ដែលពាក់ព័ន្ធដល់សិស្ស និស្សិតមានប្រមាណ៤០% នៃករណីគ្រោះថ្នាក់ចរាចរណ៍សរុបក្នុងទូទាំងប្រទេស។ ថ្នាក់ដឹកនាំគណៈកម្មាធិការសុវត្ថិភាពចរាចរណ៍ជាតិ រំពឹងថា សិស្ស និស្សិតខ្នះខ្នែងរៀនសូត្រ ស្វែងយល់អនុវត្តដើម្បីក្តាប់ច្បាស់ និងអនុវត្តល្អរាល់បទប្បញ្ញត្តិនៃច្បាប់ស្តីពីសុវត្ថិភាពចរាចរណ៍ គឺ៖ ត្រូវពាក់មួកសុវត្ថិភាពឱ្យត្រូវរបៀបនៅពេលចូលរួមចរាចរណ៍; អនុវត្តលក្ខខណ្ឌនៃចរាចរណ៍ អាទិភាពជ្រើសរើសមធ្យោបាយសាធារណៈនៅពេលទៅមក៘

ស្ថិតក្នុងបរិកាសនៃពិធីបំផុសចលនា តំណាងថ្នាក់ដឹកនាំមន្ទីរអប់រំនិងបណ្តុះបណ្តាលខេត្តចំនួន៥ រួមជាមួយនឹងមហាវិទ្យាល័យចំនួន៥ បានចុះកិច្ចសន្យាជាមួយក្រសួងអប់រំនិងបណ្តុះបណ្តាល គណៈកម្មាធិការសុវត្ថិភាពចរាចរណ៍ជាតិ ក្នុងការបង្កើនការផ្សព្វផ្សាយអនុវត្តការងារអប់រំសុវត្ថិភាពចរាចរណ៍ ឆ្នាំសិក្សា២០២៤-២០២៥។ ស្របក្នុងឱកាសនេះ មូលនិធិធានារ៉ាប់រងយានយន្ត ក៏បានជូនមួកសុវត្ថិភាពចំនួន ៥០០ដល់សិស្ស និស្សិត៕

ប៊ិតង៉ុក- ប្រែសម្រួល៖ លីសៀ

ចែករំលែកអត្ថបទ

ពាក្យគន្លឹះ