ព្រឹត្តិការណ៍ - នយោបាយ ព្រឹត្តិការណ៍

23/09/2024 - 16:27

កឹងធើ រៀបចំសកម្មភាពជាច្រើនដើម្បីឧបត្ថម្ភជនរួមជាតិដោយគ្រោះធម្មជាតិព្យុះលេខ៣

គាំទ្រការអំពាវនាវរបស់គណៈប្រចាំការនៃគណៈកម្មាធិការរណសិរ្សមាតុភូមិវៀតណាមក្រុងកឹងធើ តាមសារលិខិតអំពាវនាវជួយឧបត្ថម្ភដល់ខេត្ត ក្រុងនានានៅតំបន់ភាគខាងជើងដើម្បីជម្នះគ្រោះធម្មជាតិ មានអង្គការ អង្គភាពជាច្រើនលើភូមិសាស្ត្រកឹងធើ បានរៀបចំសកម្មភាពជាច្រើន បំផុសចលនា កម្មាភិបាល សមាជិកសម្ព័ន្ធយុវជន សមាជិកសមាគម។ល។ រួមវិភាគទានប្រាក់ខែមួយថ្ងៃពលកម្ម ទឹកប្រាក់ គ្រឿងឧបភោគបរិភោគផ្សេងៗ។ល។ ដើម្បីឧបត្ថម្ភដល់ជនរួមជាតិនៅខេត្ត ក្រុងនានា តំបន់ភាគខាងជើងដែលរងការខូចខាតដោយសារព្យុះលេខ៣ (Yagi) បង្កឡើង។

ប្រជាជនរួមវិភាគទានប្រាក់ឧបត្ថម្ភជនរួមជាតិដែលរងផលប៉ះពាល់ដោយព្យុះលេខ ៣ នៅទីស្នាក់ការគណៈកម្មាធិការរណសិរ្សមាតុភូមិវៀតណាមក្រុងកឹងធើ។ រូបថត៖ តឹមខ្វា

នៅរសៀលថ្ងៃទី ១៦ ខែកញ្ញា គណៈកម្មាធិការរណសិរ្សមាតុភូមិវៀតណាមក្រុងកឹងធើ ទទួលបានប្រាក់ឧបត្ថម្ភជាង ៨ ពាន់លានដុងពីអង្គភាព អង្គការនិងបុគ្គលដែលចុះឈ្មោះឧបត្ថម្ភនិងសម្ភារៈប្រើប្រាស់ចាំបាច់ជាច្រើន។ សម្ព័ន្ធយុវជនក្រុង សហការរៀបចំរថយន្តដឹកជញ្ជូនគ្រឿងសម្ភារៈ ១៤៥ តោន (សម្លៀកបំពាក់ មីកញ្ចប់ ថ្នាំពេទ្យ ទឹកផឹក ត្រីខកំប៉ុងជាដើម) គិតជាទឹកប្រាក់ប្រមាណ ៤ ពាន់លានដុង ដើម្បីឧបត្ថម្ភដល់ប្រជាជននៅខេត្តថាយប៊ិញ សើុងឡា តៀងក្វាង ហាយ៉ាង ឡាងសើុងនិងអៀងបាយ។ សមាគមសហព័ន្ធនារីគ្រប់លំដាប់ថ្នាក់ក្នុងក្រុង ក៏បានបំផុសចលនាសមាជិកសមាគម ឧបត្ថម្ភសម្ភារៈប្រើប្រាស់ចាំបាច់ក្នុងគ្រួសារ សៀវភៅសរសេរ សម្លៀកបំពាក់ក្មេងៗជាដើម។

ចំពោះការខូចខាតដ៏ធំធេងដោយសារព្យុះលេខ៣ (Yagi) បង្កឡើង ពង្រីកប្រវេណី “ស្រឡាញ់រាប់អានគ្នាទៅវិញទៅមក” “ស្លឹកជាពាសស្លឹកដាច់” អនុវត្តតាមកិច្ចចង្អុលការរបស់គណៈប្រចាំការនៃគណៈកម្មាធិការបក្សក្រុង គណៈកម្មាធិការមជ្ឈិមរណសិរ្សមាតុភូមិវៀតណាម គណៈកម្មាធិការរណសិរ្សមាតុភូមិវៀតណាម - គណៈចលនាជំនួយសង្គ្រោះក្រុងកឹងធើ អំពាវនាវដល់ប្រជាជនគ្រប់ជាន់ស្រទាប់ កម្មាភិបាល បុគ្គលិក អ្នករដ្ឋការ យុទ្ធជនកងកម្លាំងប្រដាប់អាវុធ គ្រប់អង្គការសាសនា កម្មករនិយោជិត គ្រប់ស្ថាប័ន អង្គភាព អង្គការអាជីវកម្ម សប្បុរសជន ជនរួមជាតិក្នុងនិងក្រៅក្រុង ដោយទឹកចិត្តមនោសញ្ចេតនា ព្រួតដៃចែករំលែកឧបត្ថម្ភជនរួមជាតិនៅខេត្ត ក្រុងនានាតំបន់ភាគខាងជើង ដែលរងការខូចខាតដោយសារព្យុះលេខ៣ (Yagi) បង្កឡើង។

រយៈពេលទទួលការឧបត្ថម្ភរហូតដល់ថ្ងៃទី ១០ ខែតុលា ឆ្នាំ២០២៤។

* ទទួលការឧបត្ថម្ភតាមរយៈការវេរប្រាក់

១.គណនីនៅបេឡាជាតិៈ

- ឈ្មោះគណនី៖ គណៈកម្មាធិការរណសិរ្សមាតុភូមិវៀតណាមក្រុងកឹងធើ។

-លេខគណនី៖ ៣៧៦១.០.១០៧៩២១២.៩១០៤៩ នៅបេឡាជាតិក្រុងកឹងធើ។

២.គណនីនៅធនាគារ៖

- ឈ្មោះគណនី៖ គណៈកម្មាធិការរណសិរ្សមាតុភូមិវៀតណាមក្រុងកឹងធើ។

- លេខគណនី៖ 1000007062424221 ធនាគារគោលនយោបាយសង្គម-សាខាក្រុងកឹងធើ

*ទទួលការឧបត្ថម្ភដោយសាច់ប្រាក់៖

ស្ថាប័នគណៈកម្មាធិការរណសិរ្សមាតុភូមិវៀតណាមក្រុងកឹងធើ (អាសយដ្ឋានលេខ ២៩០ វិថី៣០ - មេសា សង្កាត់ស្វឹងខាញ់ ខណ្ឌនិញកេវ ក្រុងកឹងធើ)៕

ក្រុមអ្នកយកព័ត៌មាន

ចែករំលែកអត្ថបទ