កីឡា - ទេសចរណ៍ ទេសចរណ៍

24/04/2026 - 08:13

មកទស្សនាសម្រស់ធម្មជាតិឃុំទ្រីតូង

គ្មានភាពអ៊ូអរ គគ្រឹកគគ្រេងដូចរមណីយដ្ឋានទេសចរណ៍ដទៃៗមែន ប៉ុន្តែទ្រីតូងមានភាពស្រស់ស្អាតដោយសម្រស់ធម្មជាតិព្រៃភ្នំនិងបរិយាកាសស្ងប់ស្ងាត់មនោរម្យ ផ្តល់ភាពសុខសាន្ត និងភាពជិតស្និទ្ធជាមួយសម្រស់ធម្មជាតិ។

 ដងផ្លូវបត់បែនតាមវាលស្រែតាប៉ា។

ពេលមកដល់ទ្រីតូង ស្រះទឹកតាប៉ាគឺជារមណីយដ្ឋានទេសចរណ៍មិនគួររំលងសម្រាប់ការទស្សនាសម្រស់ធម្មជាតិព្រៃភ្នំ ពីព្រោះទីនេះជារមណីយដ្ឋានដ៏ល្បីល្បាញ សម្លឹងមើលពីលើ ភ្ញៀវទេសចរនឹងបានគយគន់ទិដ្ឋភាពទ្រីតូងជុំវិញដ៏ស្រស់ស្អាត។ ស្រះទឹកតាប៉ាមានផ្ទៃដីទំហំ ២០ ហិកតា ដោយទឹកថ្លាឈ្វេងអាចមើលឃើញដល់បាតស្រះ។ ជុំវិញស្រះមានដើមឈើធំៗចោលម្លប់ត្រឈឹងត្រឈៃ បង្កជាបរិយាកាសស្ងប់ស្ងាត់មនោរម្យ។

ចេញពីស្រះទឹកតាប៉ា ភ្ញៀវទេសចរអាចឆៀងចូលទស្សនានិងធ្វើសក្ការបូជានៅវត្តភ្នំតាប៉ា ដែលបានកសាងនៅលើភ្នំខ្ពស់ត្រដែត។ ពីបរិវេណវត្ត សម្លឹងចុះភ្ញៀវទេសចរអាចនឹងគយគន់វាលស្រែតាប៉ាដ៏ធំល្វឹងល្វើយឋិតនៅជើងភ្នំ។ វាលស្រែនេះ បានចាត់ទុកជាវាលស្រែដ៏ពិសេសបំផុតនៅវាលរាបទន្លេគឺវឡុង។ នៅតាមអំពកស្រែនីមួយៗ មានដាំដំណាំផ្សេងៗឆ្លាស់គ្នា មានដូច៖ ស្រូវ ដំណាំរួមផ្សំ និងដើមឈើហូបផ្លែជាដើម។ ពិសេសនៅទីនេះ ក៏ល្បីពីជួរដើមព្រីងដែលដុះតាមភ្លឺស្រែ បង្កជាផ្ទាំងគំនូរធម្មជាតិចម្រុះពណ៌ដ៏ស្រស់ស្អាត។ ជាមួយដងផ្លូវបត់បែនលាតសន្ធឹងកណ្តាលវាលស្រែដ៏ធំល្វឹងល្វើយ។ វាលស្រែតាប៉ា គឺជាទីតាំងដ៏ទាក់ទាញសម្រាប់ការទស្សនានិងផ្តិតយករូបភាព ព្រមទាំងគយគន់ទេសភាពជើងភ្នំ។ មកទីនេះ ភ្ញៀវទេសចរនឹងបានស្រូបយកខ្យល់អាកាសដ៏បរិសុទ្ធ គយគន់ភាពស្រស់ស្អាតនៃតំបន់ជនបទទ្រីតូង ស្វែងយល់ពីជីវភាពសាមញ្ញប្រចាំថ្ងៃរបស់ជនរួមជាតិខ្មែរនៅទីនេះ។

នៅមិនឆ្ងាយពីវត្តភ្នំតាប៉ា មានស្រះទឹកស្វាយចេក ជារមណីយដ្ឋានដ៏ទាក់ទាញបំផុតពេលព្រះអាទិត្យហៀបអស្តង្គត ដែលមិនគួរចោលរំលងពេលមកទស្សនាតំបន់ភ្នំទ្រីតូង។ ស្រះទឹកស្វាយចេក គឺជាមណ្ឌលស្រះទឹកសិប្បនិមិ្មតដែលមានទីតាំងធំទូលាយនិងស្ងប់ស្ងាត់ ស្រះទឹកស្វាយចេកស្ថិតនៅជើងភ្នំ បង្កជាទិដ្ឋភាពដ៏មនោរម្យឋិតនៅព្រៃភ្នំ ក្លាយជារមណីយដ្ឋានទេសចរណ៍ដ៏ទាក់ទាញចំពោះភ្ញៀវ និងយុវវ័យដែលចូលចិត្តស្វែងយល់ពីធម្មជាតិនិងផ្តិតយករូបភាព។ ទន្ទឹមនឹងសម្រស់ធម្មជាតិ ពេលមកដល់ទ្រីតូង បើមានឱកាសភ្ញៀវទេសចរគួរឆៀងចូលទស្សនាវត្តខ្មែរដែលមានអាយុកាលរាប់រយឆ្នាំ ដូចជា៖ វត្តស្វាយទង វត្តជីក្អេងក្រោម វត្តព្រៃវែង។ល។ ក្រៅពីទីតាំងទេសចរណ៍ដ៏ទាក់ទាញភ្ញៀវទេសចរអាចភ្លក់រសជាតិម្ហូប អាហារពិសេសប្រចាំតំបន់ ដូច៖ បបរគោទ្រីតូង នំអាកោត្នោត មាន់ដុតស្លឹក ក្រូចសើច។ល។ បងង្វៀងថាយវិញ ភ្ញៀវទេសចរមកពីខេត្តដុងថាប ចែករំលែក៖ “ទីនេះផ្តល់ភាពសុខសាន្ត ជាមួយព្រៃភ្នំ ស្រះទឹកនិងវាលស្រែលាតសន្ធឹង។ បរិយាកាសបរិសុទ្ធ មនុស្សរួសរាយរាក់ទាក់ភ្ញៀវ ព្រមទាំងម្ហូបអាហារស្រុកស្រែ ធ្វើឱ្យដំណើរកម្សាន្តមិនអាចបំភ្លេចបាន”។

អាចនិយាយបានថា ទ្រីតូងមានលក្ខណៈពិសេសនៃតំបន់បៃណុយ ជាមួយទេសភាពព្រៃភ្នំ វត្តអារាម ជួរដើមត្នោត មួយអន្លើដោយជីវភាពវប្បធម៌ខ្មែរប្រកបដោយលក្ខណៈពិសេស រួមចំណែកធ្វើឱ្យសម្បូរបែបអត្តសញ្ញាណវប្បធម៌របស់ខេត្តអាងយ៉ាង៕

វឌ្ឍា-មុនី

ចែករំលែកអត្ថបទ

ពាក្យគន្លឹះ