កីឡា - ទេសចរណ៍ ទេសចរណ៍

12/05/2025 - 10:14

តំបន់ជនបទដ៏ស្ងប់ស្ងាត់ឈ្មោះបេនត្រែ

ជាច្រើនឆ្នាំមកនេះ ទេសចរណ៍បៃតងនៅតំបន់វាលរាបទន្លេគឺវឡុង បានទាក់ទាញភ្ញៀវទេសចរយ៉ាងច្រើនកុះករ។ ហើយគោលដៅមួយក្នុងចំណោមគោលដៅទាំងឡាយដែលមិនគួររំលងក្នុងដំណើរទេសចរណ៍បៃតងនោះគឺបេនត្រែ។

រូបភាពមួយចំនួនក្នុងសកម្មភាពទេសចរណ៍នៅបេនត្រែ។

បេនត្រែជាខេត្តមួយចំណុះតំបន់វាលរាបទន្លេគឺវឡុង មានភូមិសាស្រ្តយ៉ាងស្អាតជាប់ព្រំប្រទល់ជាមួយនឹងខេត្តតៀងយ៉ាង វិញឡុង ត្រាវិញ និងសមុទ្រខាងកើត។ ខេត្តបេនត្រែស្ថិតនៅភាគខាងលិចនៃក្រុងហូជីមិញ ហើយមានចម្ងាយពីក្រុងនេះប្រមាណ ៨៥ គីឡូម៉ែត្រ។ តំបន់ដីនេះប្រៀបដូចជាកោះបៃតងមួយស្ថិតនៅកណ្តាលលំហទឹក ជាតំបន់ទេសចរណ៍ដ៏ទាក់ទាញអារម្មណ៍និងស្ងប់ស្ងាត់។ ជាខេត្តមួយចំណុះតំបន់តីណាមបូ ហេតុនោះភ្ញៀវទេសចរអាចមកលេងទីនេះក្នុងរដូវណាក៏បាន។ រដូវនីមួយៗនាំមកនូវបទពិសោធន៍ផ្សេងៗគ្នាសម្រាប់ភ្ញៀវទេសចរ ពីព្រោះទីនេះតែងមានដំណាំឈើហូបផ្លែចោលម្លប់ត្រឈឹងត្រឈៃ។ ដូចជាមង្ឃុត ទុរេន សាវម៉ាវ ស្វាយ ក្រូចថ្លុង ខ្នុរ។ល។ ពិសេស ទឹកដូងភ្លើងរបស់បេនត្រែ គឺផ្អែមណាស់។

បើគ្មានពេលទេ ភ្ញៀវទេសចរគ្រាន់តែមកកាន់កោះគ្វី (កោះអណ្តើក) និងកោះពុង (កោះហង្ស) ចំណុះស្រុកចូវថាញ់ គឺអាចភ្លក់នូវផលិតផលពិសេសដូចជាផ្លែឈើនិងបង្កង ត្រីដ៏ឆ្ងាញ់ពិសារបស់ខេត្តបេនត្រែ។ កោះគ្វី គឺជាឈ្មោះកោះតូចបំផុតក្នុងចំណោមឈ្មោះសត្វ “ស័ក្តិសិទ្ធិទាំងបួន”។ ចំណែកកោះពុង ស្ថិតនៅលើកោះអណ្តែតនៅកណ្តាលទន្លេតៀង ចំណុះភូមិសាស្រ្តឃុំតឹងថាច់។ មកកាន់ទីនេះ ភ្ញៀវទេសចរអាចជិះទូកម៉ាស៊ីនបណ្តោយតាមកោះ ដើម្បីទស្សនាមូលដ្ឋានផលិតស្ករគ្រាប់ធ្វើពីដូង វត្ថុអនុស្សាវរីយ៍ធ្វើពីដូង ឬជិះរទេះសេះទៅទស្សនាចម្ការឈើហូបផ្លែ និងឈប់សម្រាកផ្ទះប្រក់ស្លឹកដូង ដើម្បីផឹកតែទឹកឃ្មុំនិងក្រូចត្រាំ ភ្លក់រសជាតិផ្លែឈើនៅតំបន់ត្រូពិក។ ព្រមទាំងបានឆ្លងកាត់បទពិសោធន៍ស្ទូចក្រពើ និងឱ្យត្រីឆ្ពិនបៅដបក្បាលដោះជាដើម។

ប្រសិនបើភ្ញៀវទេសចរមានពេល គឺចម្ការឈើហូបផ្លែកៃមើុង នៅចើឡាត និងតំបន់តៀងឡុង តឹងភូ នៅស្រុកចូវថាញ់ គឺជាទីតាំងដ៏ទាក់ទាញអារម្មណ៍ដើម្បីភ្លក់រសជាតិផ្លែឈើគ្រប់ប្រភេទនៅនឹងចម្ការតែម្តង។ ឬក៏ភ្ញៀវទេសចរអាចចូលចម្ការដូងដើម្បីភ្លក់ទឹកដូង និងថតរូបទុកជាអនុស្សាវរីយ៍។ ពីព្រោះនៅខេត្តបេនត្រែមានគ្រួសារដាំដូងជាង ២/៣ នៃចំនួនគ្រួសារសរុបទូទាំងខេត្ត។ មកចម្ការដូង ភ្ញៀវទេសចរអាចជិះកង់ចម្ងាយពីរបីគីឡូម៉ែត្រជុំវិញចម្ការដូង មានបរិយាកាសស្ងប់ស្ងាត់ និងអាកាសធាតុត្រជាក់ ឬស្នាក់នៅ homestay ក្រោមម្លប់ដូងដ៏ត្រជាក់។

បើចង់ផ្លាស់ប្តូរបរិយាកាស ភ្ញៀវទេសចរអាចធ្វើដំណើរបន្ថែម ៩ គីឡូម៉ែត្រទៀតទៅកាន់ឆ្នេរងាវនិងកំពង់ផែតេមតូម ទស្សនាច្រកទន្លេបាឡាយ និងច្រកទន្លេហាមលួង។ ឬចេញទៅសមុទ្រប៊ិញដាយចំណុះស្រុកប៊ិញដាយ ស្ថិតនៅច្រាំងទន្លេដាយ។ នេះជាឆ្នេរសមុទ្រនៅមានភាពសាមញ្ញ មិនអ៊ូអរដូចនៅវុងតាវ ឬញ៉ាត្រាងនោះទេ។ មកកាន់ទីនេះក្រៅពីងូតទឹកសមុទ្រ ភ្លក់រសជាតិផលមុទ្រ ភ្ញៀវទេសចរអាចស្ទូចត្រី និងទស្សនាតំបន់ទេសចរណ៍សាសនាផងដែរ...៕

ហាថាញ-វិមាន

ចែករំលែកអត្ថបទ

ពាក្យគន្លឹះ