រង្វាន់​បាល់​ទះ​នារី​ជើង​ឯក​ជាតិ​ឆ្នាំ​២០២៣ ត្រូវ​បាន​បញ្ចប់​លទ្ធ​ផល​រង្វាន់​ជើង​ឯក​បាន​ទៅ​ក្រុម​និញ​ប៊ិញ​អន្តរ​វៀត Post bank។ ចំ​ណុច​ដែល​គួរ​ឱ្យ​ចាប់​អា​រម្មណ៍​បំផុត​នោះ​គឺ​ការ “ឡើង​ដៃ” របស់​នារីៗ​ក្រុម​ឡុង​អាង។

 ក្រុម VTV ប៊ិញ​ដៀង​ឡុង​អាង ជាប់​លេខ​៣ក្រោយ​ពី​យក​ឈ្នះ​ក្រុម​បាល់​ទះ​នារី​
ប្រ​ភេទ​ទ័ព​ព័ត៌​មាន - ត្រឿង​តើយ​ប៊ិញភឿក ដោយ​លទ្ធ​ផល ៣ - ១។រូប៖ Internet

វគ្គ​ផ្តាច់​ព្រ័ត្រ​បាល់​ទះ​នារី គឺ​ការ​ជួប​គ្នា​របស់​ក្រុម​បាល់​ទះ​នារី​ទើប​លេច​ធ្លោ​ទាំង​ពីរ​ក្នុង​ប៉ុន្មាន​ឆ្នាំ​ជិតៗ​នេះ នោះ​គឺ៖ ក្រុម​សារ​ធាតុ​គីមី ឌឹក​យ៉ាង​តៀ​សាង ជួប​ជា​មួយ​ក្រុម​និញ​ប៊ិញ អន្តរ​វៀត Post bank។ និ​យាយ​ថាទើប​លេច​ធ្លោ ពី​ព្រោះ​ក្រុម​ទាំង​ពីរ​សុទ្ធ​តែ​បាន​វិនិយោគ​យ៉ាង​ច្រើន និង​មាន​កីឡា​ការិនី​ជា​ច្រើន​សម្រាប់​គណៈ​គ្រប់​គ្រង​ក្លឹប​ជ្រើស​រើស​ឱ្យ​សម​ស្រប​នឹង​ក្បួន​ប្រ​កួត​នីមួយៗ។ ដោយ​កង​កម្លាំង​ក្នុង​ក្រុម​មាន​សមត្ថ​ភាព​ប្រ​ហាក់​ប្រ​ហែល​គ្នា ម្ល៉ោះ​ហើយ ក្រុម​ទាំង​ពីរ​បាន​ចូល​ដល់​វគ្គ​ផ្ដាច់​ព្រ័ត្រ​មិន​ជា​ការ​លំ​បាក​ណាស់​នោះ​ទេ។ ដោយ​ឡែក​ក្រុម​និញ​ប៊ិញ​អន្តរ​វៀត Post bank ជួប​លំ​បាក​បន្តិច​បន្តួច​ប៉ុណ្ណោះ​នៅ​វគ្គ​ពាក់​កណ្តាល​ផ្តាច់​ព្រ័ត្រ ខណៈ​ពេល​ក្រ​ឡាស់​ស្ថាន​ភាព​យក​ឈ្នះ​លើ​ក្រុម​បាល់​ទះ​ដែល​តំ​ណាង​ឱ្យ​ភូមិ​ភាគ​ខាង​លិច​តែ​មួយ​គត់ នៅ​ទី​លាន​បាល់​ទះ​ធំ​បំ​ផុត​ទូ​ទាំង​ប្រ​ទេស នោះ​គឺ​ក្រុម VTV ប៊ិញ​ដៀង​ឡុង​អាង។

ត្រ​ឡប់​មក​ការ​ប្រ​កួត​វគ្គ​ផ្ដាច់​ព្រ័ត្រ បន្ទាប់​ពី​ចាញ់​នៅ​សិត​ទី​១ គ្រូ​បង្វឹក​ថាយ​ថាញ​តុង របស់​ក្រុម​និញ​ប៊ិញ​អន្តរ​វៀត Post bank ហាក់​ដូច ជា “យល់” ពី​យុទ្ធ​សាស្រ្ត​នៃ​វគ្គ​ប្រ​កួត។ ព្រោះ​ហេតុ​នោះ ចាប់​ពី​សិត​ទី​២​ឡើង​ទៅ ក្រុម​សារ​ធាតុ​គីមី​ឌឹក​យ៉ាង​តៀ​សាង គ្មាន​អ្វី​ក្រៅ​ពី​ការ​ទប់​ទល់​លើ​ការ​ទះ​បាល់​របស់​កីឡា​ការិនី ប៊ិច​ត្វៀង​នោះ​ឡើយ។ ដោយ​មិន​អាច​រាំង​ជាប់​ប៊ិច​ត្វៀង ហេតុ​នោះ ក្រុម​សារ​ធាតុ​គីមី​ឌឹក​យ៉ាង តៀ​សាង ទទួល​បរា​ជ័យ ទោះ​បី​កីឡា​ការិនី​បរ​ទេស Polina Rahimova លេង​បាន​ល្អ​ក៏​ដោយ។ រង្វាន់​ឆ្នាំ​នេះ ក្រុម​និញ​ប៊ិញ​អន្តរ​វៀត Post bank ត្រៀម​បម្រុង​បាន​ល្អ គ្រូបង្វឹក​ថាយ​ថាញ​តុង យល់​ពី​យុទ្ធ​សាស្រ្ត​ប្រ​កួត​មាន​ការ​ផ្លាស់​ប្តូរ​បាន​ទាន់​ពេល ម្ល៉ោះ​ហើយ​រង្វាន់​ជើង​ឯក​សម្រាប់​ក្រុម​បាល់​ទះ​នៅ​តំបន់​អតីត​រាជ​ធា​នី​ពិត​ជា​សក្តិ​សម​ណាស់។ គួរ​ឱ្យ​សោក​ស្តាយ​ចំ​ពោះ​ក្រុម​សារ​ធាតុ​គីមី​ឌឹក​យ៉ាង​តៀ​សាង បាន​វិនិយោគ​ច្រើន​តាំង​ពីកី​ឡា​ការិនី​រហូត​ដល់​គ្រូ​បង្វឹក ប៉ុន្តែ​នៅ​តែ​មិន​អាច​ប្តូរ​ចំ​ណាត់​ថ្នាក់​លេខ​ពីរ​ជា​ច្រើន​ឆ្នាំ​កន្លង​មក។

ក្រុម VTV ប៊ិញ​ដៀង​ឡុង​អាង ឈាន​ចូល​ជុំ​ទី​ពីរ​នៃ​រង្វាន់​ជើង​ឯក​ជាតិ ដោយ​មាន​ការ​ផ្លាស់ ប្តូរ​ធំៗ​ពីរ គឺ៖ គ្រូ​បង្វឹក​ឡេ​ថាយ​ប៊ិញ ដឹក​នាំ​ក្រុម​និងជ្រើស​រើស​ខ្សែ​វាយ​លុក​បរ​ទេស Odina Aliyeva។ ទោះ​បី​មាន​អា​យុ​៣៣ឆ្នាំ​ក៏​ដោយ ប៉ុន្តែ កី​ឡា​ការិនី Odina ប្រ​កួត​បាន​ល្អ​ក្នុង​ការ​ជួយ​បិទ​បាំង ស្រង់​បាល់ កាត់​បន្ថយ​កំ​ហុស​ទទួល​បាល់​លើក​ទី​១​របស់​ក្រុម​ភូមិ​ភាគខាង​លិច។ ទន្ទឹម​នឹង​កីឡា​ការិនី​បរ​ទេស កីឡា​ការិនី​វ័យ​ក្មេង​របស់​ក្រុម VTV ប៊ិញ​ដៀង​ឡុង​អាង បាន​ប្រ​កួត​ដូច​អា​រក្ស​ចូល បោះ​ពួយ​រហូត​ដល់​វគ្គ​ពាក់​កណ្តាល​ផ្តាច់​ព្រ័ត្រ។ អ្នក​គាំ​ទ្រ​បាន​គិត​ពី​លទ្ធ​ផល​ជា​ទី​គាប់​ចិត្តនៃ​ក្រុម​កីឡា​ការិនី​វ័យ​ក្មេង​បំផុត​ក្នុង​រង្វាន់​បាល់​ទះ​នេះ ពេល​ប្រ​កួត​ជួប​ក្រុម​និញ​ប៊ិញ​អន្តរ​វៀត Post bank ពេល​នោះ​ក្រុម​នារី​ឡុង​អាង បាន​យក​ឈ្នះ​២​សិត ជាប់​គ្នា​តែ​គ្រូ​បង្វឹក​ថាយ​ថាញ​តុង មាន​ការ​ផ្លាស់​ប្តូរ​ដ៏​សំ​ខាន់​នៅ​ខ្សែ​បញ្ជូន​បាល់ ហើយ​ការ​ប្រ​កួត​ក៏​ចាប់​ផ្តើម​ប្តូរ​ទិស​តាំង​ពី​ពេល​នេះ​ក្រុម VTV ប៊ិញ​ដៀង​ឡុង​អាង ក៏​បរា​ជ័យ​វិញ ដោយ​លទ្ធ​ផល​៣- ២។

គួរ​ឱ្យ​សោក​ស្តាយ​ចំ​ពោះ​ក្រុម VTV ប៊ិញ​ដៀង​ឡុង​អាង ប៉ុន្តែ​ត្រូវ​តែ​អធ្យា​ស្រ័យ​ដល់​គ្រូ​បង្វឹក ឡេ​ថាយ​ប៊ិញ លើក​ដំ​បូង​ដឹក​នាំ​ក្លឹប​ប្រ​កួត​នៅ​ទីលាន​ធំ​បំ​ផុត ម្ល៉ោះ​ហើយ​នៅ​ខ្វះ​បទ​ពិ​សោធន៍។ ម៉្យាង​កីឡា​ការិនី​វ័យ​ក្មេង​របស់​ក្រុម VTV ប៊ិញ​ដៀង​ឡុង​អាង នៅ​មាន​ស្មារតី​ទន់​ខ្សោយ និង​បាក់​ស្បាត​ពេល​មុខ​គូ​ប្រ​កួត ដែល​មាន​បទ​ពិសោធន៍​ច្រើន ដែល​ជា​អតីត​កីឡា​ការិនី​ជម្រើស​ជាតិ ដូច​ជា៖ កីឡា​ការិនី​ឌិញ​ធីធ្វី ឡេ​ធី​ធ្វី និង​គឹម​លៀង។ល។ ប៉ុន្តែ ទោះ​ជា​យ៉ាង​ណា​ក៏​ដោយ ក្រុម VTV ប៊ិញ​ដៀង​ឡុង​អាង សម​នឹង​កេរ្តិ៍​ឈ្មោះ​ជា​កន្លែង​បណ្តុះ​បណ្តាល​កីឡា​ការិនី​វ័យ​ក្មេង មាន​ដូច៖ ត្រា​មី ខាញ់​វី ញឺ​អាញ វី​វៀង និង​ញឺ​ង៉ុក។ល។ ដែល​ប្រ​កួត​យ៉ាង​ល្អ​នោះ។ យើង​ជឿ​ជាក់​ថា ប្រ​សិន​បើ​ហាត់​លេង​បាន​ត្រឹម​ត្រូវ ពួក​គាត់​នឹង​ក្លាយ​ជា​សមា​ជិក​ក្រុម​បាល់​ទះ​នារី​ជម្រើស​ជាតិ ក្នុង​អនា​គត​ជា​ពុំ​ខាន​ឡើយ៕

ហាថាញ-វិមាន