កីឡា - ទេសចរណ៍ កីឡា

18/09/2023 - 14:06

ឆ្នាំ “កាក់កប” របស់ក្រុមកីឡាបាល់ទះនារីវៀតណាម

បន្ទាប់ពីដណ្តើមបានពានជើងឯក VTV Cup ២០២៣ លើទីលានក្នុងប្រទេស ក្រុមជម្រើសបាល់ទះនារីវៀតណាម បន្តចូលរួមពានរង្វាន់បាល់ទះជើងឯកអាស៊ីឆ្នាំ ២០២៣ នៅលើទឹកដីថៃ ដោយដាក់ទិសដៅចូលក្នុងចំណោម៤ក្រុមកំពូល។

ក្រុមជម្រើសកីឡាបាល់ទះនារីវៀតណាមចេញប្រកួត។រូប៖ Internet

ក្រុមជម្រើសបាល់ទះនារីវៀតណាម កំពុងឈរលំដាប់ថ្នាក់លេខ៦នៅអាស៊ី។ ដៃគូប្រជែងរបស់ក្រុមជម្រើសនារីវៀតណាម គឺក្រុមជម្រើសកូរ៉េខាងត្បូង បច្ចុប្បន្នកំពុងឈរចំណាត់ថ្នាក់លេខ៤ នៅអាស៊ី និងឈរលំដាប់លេខ៤ ក្នុងព្រឹត្តិការណ៍អូឡាំពិកនៅទីក្រុង Tokyo និងឈរលើវៀតណាមដល់ទៅ១០ថ្នាក់ នៅក្នុងតារាងរៀបចំណាត់ថ្នាក់ពិភពលោក។ បានន័យថា បើយកឈ្នះលើកូរ៉េខាងត្បូង ឱកាសនឹងបើកសម្រាប់ក្រុមជម្រើសវៀតណាម។

ទោះបីការប្រកួតរបស់ក្រុមជម្រើសកូរ៉េខាងត្បូងមិនសូវបានល្អក្នុងពេលជិតៗនេះ ប៉ុន្តែជាមួយនឹងជំហរនិងសក្ដានុពលដែលមានស្រាប់ ក្រុមជម្រើសកូរ៉េខាងត្បូង បានយកឈ្នះ២សិត ដំបូងយ៉ាងងាយស្រួល។ ក្នុងពេលគ្មានអ្វីបាត់បង់ទៀត ប្រធានក្រុមថាញធ្វី និងមិត្តរួមក្រុមបានយកឈ្នះក្នុងសិតទី៣ ដោយពិន្ទុប្រកៀកប្រកិតគ្នា ទើបញុាំងឱ្យការប្រកួតកាន់តែស្វិតស្វាញនៅសិតទី៤ មុនពេលផ្តួលក្រុមជម្រើស កូរ៉េខាងត្បូងនៅសិតទី៥ ដោយពិន្ទុ១៥ - ១៣ ដោយក្រឡាស់ស្ថានភាពយកឈ្នះយ៉ាងគាប់ភ្នែកក្នុងការប្រកួតបើកឆាកដំបូង។ ថ្លែងប្រាប់អ្នកយកព័ត៌មានបរទេស ប្រធានក្រុមថាញធ្វី បាននិយាយថា ការក្រឡាស់ស្ថានភាពយកឈ្នះនេះ គឺពោរពេញដោយស្នាក់ស្នាមនៃសាមគ្គីភាព ការរួមគ្នាតស៊ូរបស់ក្រុមទាំងមូល។ ភាពមិនក្រអឹតក្រទមរបស់ថាញធ្វី ត្រូវបានវាយតម្លៃខ្ពស់ ប៉ុន្តែអ្នកគាំទ្រត្រូវតែបំពេញបន្ថែមថា ៣ សិតចុងក្រោយ កីឡាការិនីថាញធ្វី លេងបានល្អ តាំងពីវាយលុករហូតដល់ការពារធ្វើជាអ្នកដឹកនាំក្នុងឈុតក្រឡាស់ស្ថានភាពយកឈ្នះរបស់ក្រុម។ ក្រៅពីថាញធ្វី ការប្រកួតនេះនៅមានរាជិនីសម្ផស្ស VTV Cup កេវទ្រិញ ក៏ឡើងដៃណាស់ដែរ ខណៈពេលគប់បាល់បានល្អ និងការពារយ៉ាងមានប្រសិទ្ធភាពផងដែរ។ ចំណុចលេចធ្លោក្នុងការប្រកួតនេះ គឺគ្រូបង្វឹកបានប្តូរអ្នកបោះបាល់ទី២យ៉ាងទាន់ពេលវេលា ធ្វើឱ្យវិធីសាស្រ្តវាយលុករបស់ក្រុមកាន់តែរវៀសរវៃថែមទៀត។

ឈ្នះពីរប្រកួតបន្ទាប់ទៀត ជួយឱ្យក្រុមជម្រើសវៀតណាមឈរទី១ក្នុងពូល មានភាពងាយស្រួលពេលឈានចូលជុំទី២។ ជាមួយនឹងការគិតពិន្ទុនៃការប្រកួតនៅជុំនេះ យើងគ្រាន់តែយកឈ្នះ១ប្រកួតទៀត (រក្សាលទ្ធផលដែលឈ្នះកូរ៉េខាងត្បូង) គឺវាគ្រប់គ្រាន់ដើម្បីចូលវគ្គពាក់កណ្តាលផ្តាច់ព្រ័ត្រ។ កីឡាការិនី មាសនៃកីឡាបាល់ទះវៀតណាម មិនធ្វើឱ្យអ្នកគាំទ្រខកចិត្តឡើយ ដោយយកឈ្នះលើក្រុមជម្រើសអូស្ត្រាលី៣-០ គ្រប់ពិន្ទុឡើងបន្ថែម ៨កម្រិត ស្ថិតក្នុងចំណោម៤០ក្រុមលំដាប់កំពូលលើពិភពលោក។

ការប្រកួតចុងក្រោយនៃវគ្គក្នុងពូលទី២ ជួបក្រុមជម្រើសថៃ ក៏គ្មានអ្វីសំខាន់ទៀតដែរ មុននោះក្រុមជម្រើសថៃ ក៏បានផ្តួលក្រុមជម្រើសបាល់ទះនារីកូរ៉េខាងត្បូងដោយលទ្ធផល៣-០។ ដូច្នេះ កីឡាបាល់ទះនារីវៀតណាម បានឈានចូលដល់វគ្គពាក់កណ្តាលផ្តាច់ព្រ័ត្រ សម្រេចទិសដៅដែលបានដាក់ចេញ គឺចូលក្នុងចំណោម ៤ក្រុមកំពូលនៃពានរង្វាន់នេះ។ សិស្សនិងគ្រូបង្វឹក ង្វៀងត្វឹងកៀក បន្តបង្កើតកំណត់ត្រាថ្មីសម្រាប់កីឡាបាល់ទះនារីវៀតណាម ពីព្រោះនេះជាលើកដំបូងវៀតណាមបានចូលដល់វគ្គពាក់កណ្តាលផ្តាច់ព្រ័ត្រនៃពានរង្វាន់ថ្នាក់ទ្វីប៕

ហាថាញ - វិមាន

ចែករំលែកអត្ថបទ

ពាក្យគន្លឹះ