កីឡា - ទេសចរណ៍ ទេសចរណ៍

12/09/2023 - 09:39

មណ្ឌលសម្រាកលំហែកាយនៅហូម៉ៃ

ហូម៉ៃ ជាមណ្ឌលទេសចរណ៍មានទីតាំងស្ថិតនៅលើកំពូលភ្នំធំរបស់ក្រុងវុងតាវ។ ផ្ទុយពីភាពអ៊ូអរនៅតាមមណ្ឌលសកម្មភាពទេសចរណ៍ឆ្នេរសមុទ្រ រាត្រីនៅហូម៉ៃនឹងធ្វើឱ្យភ្ញៀវទេសចរមានអារម្មណ៍ស្រស់ស្រាយជាមិនខាន។

មណ្ឌលទេសចរណ៍បែបជំនឿសាសនានៅហូម៉ៃ។

បើមិនបានឡើងដល់កំពូលភ្នំធំទេ ភ្ញៀវទេសចរប្រាកដជាមិនអាចនឹកស្មានថាមានបរិយាកាសដ៏ស្រឡះស្រឡំអស្ចារ្យដល់ម្លុឹងសោះ។ បរិវេណនៃមណ្ឌលទេសចរណ៍ត្រូវបានសាងសង់ឡើងយ៉ាងផ្ចិតផ្ចង់ ដោយមានស្រះទឹកដ៏ថ្លាយង់នៅលើកំពូលភ្នំ ឯបន្ទប់សម្រាកលម្ហែកាយវិញគឺមានពីកម្រិតមធ្យមដល់កម្រិតខ្ពស់។ ជាទីតាំងមួយអាចសម្លឹងឃើញគ្រប់ទិស ពេលគយគន់ពីលើកំពូលភ្នំដែលមានកម្ពស់ជាង២០០ម៉ែត្រនេះ។ ឡើងទៅមណ្ឌលទេសចណ៍ហូម៉ៃនៅថ្ងៃដែលអាកាសធាតុល្អ ភ្ញៀវទេសចរអាចសម្លឹងឃើញសមុទ្រកឹងយើនៃក្រុងហូជីមិញទៀតផង។ តែអស្ចារ្យបំផុត គឺអាចគយគន់ទេសភាពក្រុងវុងតាវ ដែលពពាក់ពពូនដោយភ្ញៀវទេសចរគ្រប់ជាតិសាសន៍។ បុរសមគ្គុទេសក៍ម្នាក់នៅហូម៉ៃ បានរៀបរាប់ថា ក្នុងដំណាក់កាលសាងសង់មណ្ឌលទេសចរណ៍នេះ ពេលព្រឹក កម្មករធ្វើការនៅទីនេះ សម្លឹងឃើញដុំពពករសាត់ជាប់នឹងផ្ទៃទឹកស្រះ ទើបម្ចាស់វិនិយោគសម្រេចដាក់ឈ្មោះថា ហូម៉ៃ ដូច្នេះឯង។

រូបសំណាកមេទ័ព ត្រឹងក្វឹកត្វឹង បានសាងឡើងនៅលើកំពូលភ្នំធំ។

ទស្សនាតន្ត្រីប្រភពទឹកចម្រុះពណ៌នៅហូម៉ៃ។

ដើម្បីទាក់ទាញភ្ញៀវទេសចរ ហូម៉ៃហាក់ដូចជាមានគ្រប់សព្វសកម្មភាពកម្សាន្តសប្បាយ ចាប់ពីការជិះស្គី ជិះកងបង្វិល និងបាញ់កាំភ្លើងជាដើម រហូតដល់សកម្មភាពឆ្លងកាត់បទពិសោធន៍សម្រាប់សិស្ស។ នៅទីនេះ មានទាំងសត្វប្រើសចិញ្ចឹមព្រលែង ពួកវាស្និទ្ធនឹងភ្ញៀវទេសចរខ្លាំងណាស់ ចំណែកសត្វអូទ្រិស និងសេះវិញក៏បានគេផ្សាំង ភ្ញៀវទេសចរអាចជិះវាកម្សាន្តជុំវិញស្រះ។ មណ្ឌលទេសចរណ៍ហូម៉ៃ នៅទាំងមានសួនស្នេហ៍សម្រាប់ភ្ញៀវទេសចរវ័យក្មេងផ្ដិតយករូបភាពដ៏ស្រស់ស្អាតទៀតផង។

ចំពោះភ្ញៀវទេសចរដែលចង់សម្របខ្លួននឹងធម្មជាតិ គួរជ្រើសរើសស្នាក់នៅទីនេះ ព្រោះថានៅហូម៉ៃអាកាសធាតុអស្ចារ្យខ្លាំងណាស់។ ដងភ្នំមានដើមឈើអាយុកាលរាប់រយឆ្នាំ មានស្រះទឹក ដុំពពករសាត់។ល។ គឺជា”ផលិតផលដ៏ប្រណីត” ហើយមានតែភ្ញៀវទេសចរដែលជ្រើសរើសស្នាក់នៅពេលរាត្រីលើកំពូលភ្នំធំ ទើបអាចយល់ពីភាពអស្ចារ្យយ៉ាងណា។ ហើយនៅពេលបានស្រូបយកនូវបរិយាកាសនៃសម្រស់ធម្មជាតិដ៏ពិសេសនេះ ក៏ដូចជាអាកាសធាតុដ៏បរិសុទ្ធលើកំពូលភ្នំ ភ្ញៀវទេសចរប្រាកដជាយល់ថា ហេតុម៉េចបានជាគ្រប់គ្នាប្រៀបហូម៉ៃ គឺជាដាឡាតទីពីរ។

ភ្ញៀវទេសចរជាច្រើនតែងនឹកគិតថា អំឡុងពេលក្បាលព្រលប់នៅហូម៉ៃប្រាកដជាអស្សុកខ្លាំងណាស់។ ត្រង់ចំណុចហ្នឹងសូមភ្ញៀវទេសចរទុកចិត្តចុះ នៅទីនេះមានកម្មវិធីតន្ត្រីប្រភពទឹកចម្រុះពណ៌ នឹងធ្វើភ្ញៀវទេសចរពេញចិត្តពេញថ្លើមជាមិនខាន។ បន្ទាប់មកគឺបន្ទប់បញ្ចាំងភាពយន្ត 7D របស់ហូម៉ៃ នឹងធ្វើឱ្យភ្ញៀវទេសចរផ្ងាក់ផ្ងើកជាមិនខានពេលកៅអីវិល។ បន្ទាប់ទៀត គឺបរិយាកាសនៃការភ្លក់រសជាតិកាហ្វេដ៏ឈ្ងុយឆ្ងាញ់ និងគយគន់ទេសភាពក្រុងវុងតាវ ដ៏ស្រស់ស្អាតនាពេលរាត្រី ហាក់ដូចជាចំណិតព្រះខែរនោចជាប់នឹងឆ្នេរសមុទ្រ។ ហើយត្រឡប់មកបន្ទប់គេងដ៏ត្រជាក់ប្រកបដោយផាសុកភាពក្នុងបរិយាកាសដ៏ស្ងប់ស្ងាត់ ល្ហែល្ហើយ។ បន្ទាប់ពីការលងលក់ដ៏ស្កប់ស្កល់ ភ្ញៀវទេស ចរគប្បីក្រោកពីព្រលឹម ដើម្បីគយគន់អរុណោទ័យបង្អួតសម្រស់៕

ហាថាញ - ពេជ្រសឿន

ចែករំលែកអត្ថបទ

ពាក្យគន្លឹះ