កីឡា - ទេសចរណ៍ កីឡា

07/08/2023 - 16:53

ក្រុមបាល់ទះបុរសជប៉ុនបង្កភាពភ្ញាក់ផ្អើល

ក្រុមបាល់ទះបុរសជប៉ុន ទើបបង្កើតប្រវត្តិសាស្ត្រសម្រាប់កីឡាបាល់ទះរបស់ប្រទេស ពេលលើកដំបូងទទួលបានមេដាយសំរឹទ្ធ ក្នុងការប្រកួតដណ្តើមពានរង្វាន់បាល់ទះ Volleyball Nations League (VNL) ឆ្នាំ២០២៣។

ក្រុមជម្រើសជប៉ុន។ រូបថត Internet

ជាក់ស្តែង ក្រុមបាល់ទះជប៉ុនមានដំណើរប្រកួតបានយ៉ាងល្អតាំងពីវគ្គជម្រុះ ដោយប្រកួតឈ្នះជាបន្តបន្ទាប់។ មុននឹងឈានចូលការប្រកួត អ្នកគាំទ្របាល់ទះអាស៊ីមិនហ៊ានស្រមៃតំណាងទ្វីបចូលដល់វគ្គខាងក្នុង ព្រោះប្រវត្តិនៃការប្រកួតរបស់ក្រុមបាល់ទះជប៉ុនក្នុងរដូវកាលមុនៗពុំដែលទទួលបានចំណាត់ថ្នាក់ខ្ពស់នោះទេ។ នេះជាភាពជាក់ស្តែង ព្រោះក្រុមបាល់ទះបុរសទ្វីបអឺរ៉ុប ទ្វីបអាមេរិកខ្លាំងជាង។ ពិសេស បើនិយាយពីមាឌវិញ កីឡាករជប៉ុនទាបជាង បើប្រៀបនឹងមធ្យមភាគកីឡាករនៃក្រុមទាំងអស់ដែលចូលរួមប្រកួត។ ទោះបីមិនបានដាក់ក្តីរំពឹង ប៉ុន្តែ ក្រុមបាល់ទះបុរសជប៉ុនបែរជាប្រកួតបានយ៉ាងល្អ យកឈ្នះលើគូប្រកួតដែលធ្លាប់សាងស្នាដៃលើឆាកអន្តរជាតិ បង្កើតភាពភ្ញាក់ផ្អើលដំបូងនៃការប្រកួតដោយឈរទីមួយក្នុងពូល អង់អាចឈានចូលវគ្គក្នុង។

បន្ទាប់ពីផ្ដួលក្រុមជម្រើស Slovenia ដោយលទ្ធផល ៣-០ នៅវគ្គប្រកួត៨ក្រុម។ ក្រុមជម្រើសបាល់ទះជប៉ុន បន្តបង្កើតស្លាកស្នាមអនុស្សាវរីយ៍ ពេលយកឈ្នះលើក្រុមលំដាប់លេខ១ពិភពលោក ប៉ូឡូញ ក្នុងសិតទី១នៃវគ្គប្រកួតពាក់កណ្តាលផ្តាច់ព្រ័ត្រ។ ប្រសិនបើមានបទពិសោធន៍និងសំណាងល្អបន្តិច ក្រុមអាចនឹងឈ្នះនៅសិតទី២ ហើយស្ថានការណ៍នៃការប្រកួតអាចមានការប្រែប្រួល។ ប៉ុន្តែពេលក្រុមលំដាប់លេខ១ពិភពលោកប៉ូឡូញ ពង្រឹងយុទ្ធសាស្រ្តនៃការប្រកួត ចាប់បានចំណុចខ្សោយ ក្រុមបាល់ទះជប៉ុនមិនអាចក្រឡាស់ខ្លួនបានក្នុងសិតទី២និងទី៣ ទទួលបរាជ័យ ដោយលទ្ធផល១-៣។ ភាពក្លៀវក្លារបស់សមាជិកក្រុមបានធ្លាក់ចុះយ៉ាងខ្លាំងបន្ទាប់ពីចាញ់ ដូច្នេះ អ្នកគាំទ្រមិនហ៊ានដាក់ក្តីរំពឹងលើក្រុមបាល់ទះលេខ១អាស៊ី យកឈ្នះម្ចាស់ជើងឯកពិភពលោកអ៊ីតាលីនៅវគ្គប្រកួតដណ្ដើមមេដាយសំរឹទ្ធ។ ជាងនេះទៅទៀត ការប្រកួតនេះ អវត្តមានកីឡាករ Nishida Yuji ជាអ្នកបញ្ជូនបាល់លេខ១របស់ក្រុមដោយសាររងរបួស។

ប៉ុន្តែនៅចំពោះមុខឱកាសបង្កើតព្រឹត្តិការណ៍ប្រវត្តិសាស្ត្រសម្រាប់បាល់ទះរបស់ប្រទេស ក្រុមបាល់ទះជប៉ុនប្រកួតដោយទំនុកចិត្ត យុទ្ធសាស្ត្រឆ្លាតវៃ យកឈ្នះលើម្ចាស់ជើងឯកពិភពលោក ដោយលទ្ធផល៣-២ នាំមកមេដាយដំបូងសម្រាប់ក្រុមបាល់ទះបុរសជប៉ុនលើឆាកប្រកួតអន្តរជាតិ។ អ្នកគុបបាល់ដ៏សំខាន់របស់ជប៉ុន Ishikawa Yuki សក្តិសមនឹងកិត្តិនាមប្រធានក្រុមជាបន្ត ពេលទទួលបាន២១ពិន្ទុ។

នៅវគ្គប្រកួតផ្តាច់ព្រ័ត្រ ក្រុមជម្រើសប៉ូឡូញ បានបង្ហាញពីសមត្ថភាពរបស់ក្រុមលំដាប់លេខ ១ពិភពលោក ពេលឈ្នះក្រុមជម្រើសអាមេរិក ដោយលទ្ធផល៣-១ គ្រងតំណែងជើងឯកពាន រង្វាន់បាល់ទះ VNL ២០២៣៕

ហាថាញ-មុនី

ចែករំលែកអត្ថបទ

ពាក្យគន្លឹះ