កីឡា - ទេសចរណ៍ កីឡា

10/07/2023 - 16:45

ជ័យជម្នះដ៏ត្រចះត្រចង់

ក្រុមជម្រើសកីឡាបាល់ទះនារីវៀតណាម ទើបយកឈ្នះលើក្រុមជម្រើសម្ចាស់ផ្ទះឥណ្ឌូណេស៊ី ក្នុងវគ្គផ្តាច់ព្រ័ត្រនៅពានរង្វាន់បាល់ទះ AVC Challenge ២០២៣។ តំណែងជើងឯកនេះ បានជួយឱ្យក្រុមទទួលបានសំបុត្រទៅប្រកួតនៅពានរង្វាន់ FIVB Challenge ២០២៣ នៃសហព័ន្ធកីឡាបាល់ទះពិភពលោក នឹងប្រព្រឹត្តឡើងនៅប្រទេសបារាំងនាពេលខាងមុខ។

ក្រុមជម្រើសបាល់ទះនារីវៀតណាមទទួលពានជើងឯក។

នៅពានរង្វាន់ AVC Challenge Cup ២០២៣ ក្រុមកីឡាការិនីវៀតណាម បានប្រកួតឈ្នះជាបន្តបន្ទាប់ចាប់ពីវគ្គជម្រុះរហូតដល់វគ្គពាក់កណ្តាលផ្តាច់ព្រ័ត្រ ដោយមិនស្គាល់ពាក្យថាចាញ់មួយសិតណាឡើយ។ នៅវគ្គពាក់កណ្តាលផ្តាច់ព្រ័ត្រ ប្រធានក្រុមថាញធ្វី និងមិត្តរួមក្រុមជួបក្រុមជម្រើសប្រទេសឥណ្ឌា។ បន្ទាប់ពីមានពិន្ទុដំបូង គ្រូបង្វឹកង្វៀងត្វឹងកៀក បាន “ផ្លាស់ចេញ” កីឡាការិនី ៤T (ឈ្មោះហៅកាត់ដែលអ្នកគាំទ្រដាក់ឱ្យប្រធានក្រុមត្រឹងធីថាញធ្វី) កីឡាការិនីង្វៀងធីត្រិញ និងហ្វាងធីកេវត្រិញ។ ផ្លាស់ចូលជំនួសឱ្យខ្សែវាយលុកនេះ គឺឌិញធីត្រាយ៉ាង លឺវធីលៀងប៊ិចធ្វី ង្វៀតអាញ់ញឺ វិញដងធីស្វឹង ត្រឹងទូលិញជាដើម។ ចំពោះកីឡាការិនីឥណ្ឌាដែលលេងមិនសូវបានល្អ អ្នកគប់បាល់របស់វៀតណាមប្រកួតហាក់ដូចជាមិនប្រញឹកប្រញាប់និងមិនលំបាក ដើម្បីយកឈ្នះដោយលទ្ធផល ៣-០ ឈានចូលវគ្គផ្តាច់ព្រ័ត្រជួបក្រុមម្ចាស់ផ្ទះ ក៏ជាក្រុមដែលមាននិស្ស័យជួបគ្នាជារឿយៗ នោះគឺក្រុមជម្រើសឥណ្ឌូណេស៊ី។

ការយកឈ្នះយ៉ាងងាយស្រួល តាំងពីវគ្គជម្រុះរហូតដល់វគ្គពាក់កណ្តាលផ្តាច់ព្រ័ត្រ និងសិតទី ១ វគ្គផ្តាច់ព្រ័ត្រ ញុាំងឱ្យកីឡាការិនីវៀតណាមមានការធ្វេសប្រហែស។ ក្រុមម្ចាស់ផ្ទះឆ្លៀតឱកាសនេះឈានឡើងនិងយកឈ្នះ ២ សិតជាបន្តបន្ទាប់ គឺសិតទី ២ និងទី ៣ និងមានពិន្ទុនាំមុខក្រុមជម្រើសវៀតណាមនៅសិតទី ៤ ផងដែរ។ ក្នុងពេលគ្មានអ្វីបាត់បង់ទៀត កីឡាការិនីវៀតណាមប្រកួតយ៉ាងអង់អាច បានក្រឡាស់ស្ថានភាពយកឈ្នះនៅសិត ទី៤។ លុះឈានចូលសិតទី ៥ ក្រុមទាំង ២ មានពិន្ទុប្រដំ ប្រសងគ្នា មុនពេលក្រុមជម្រើសវៀតណាមបញ្ចប់ការប្រកួតដោយពិន្ទុ ១៥-១៣។

ឆ្លងកាត់ការប្រកួត អ្នកគាំទ្របានស្ងើចសរសើរក្រុមបាល់ទះរបស់គ្រូបង្វឹកង្វៀងត្វឹងកៀក៖ មានចិត្តសាស្រ្តប្រកួតបានកែលម្អ ទទួលបាល់ ជំហានទី ១ ល្អគ្រាន់បើ និងលេចធ្លោគឺការសាមគ្គីគ្នា។ នេះជាកត្តាសំខាន់ ដើម្បីគ្រូបង្វឹករៀបយុទ្ធសាស្រ្តប្រកួត។ មូលហេតុមួយក្នុងចំណោមមូលហេតុដែលបណ្តាលឱ្យមានភាពហ្មត់ចត់នេះ សំខាន់គឺតួនាទីដឹកនាំរបស់ប្រធានក្រុមថាញធ្វី។ ត្រូវទទួលស្គាល់ថា កីឡាការិនី ៤T ធ្វើបានល្អនូវតួនាទីដឹកនាំរបស់ខ្លួន។ កីឡាការិនីថាញធ្វី រមៀលសង្គ្រោះបាល់ លោតគប់បាល់ និងលើកទឹកចិត្តមិត្តរួមក្រុមជាដើម។ ថាមពលសកម្មរបស់កីឡាការិនី ៤T ធ្វើឱ្យមិត្តរួមក្រុមរំភើប ប្រកួតកាន់តែមានប្រសិទ្ធភាពថែមទៀត។ ដំណាក់កាលនេះ គ្រូបង្វឹកត្វឹងកៀក ក៏មានកីឡាការីនីជាច្រើនពោរពេញដោយក្តីសង្ឃឹម ដើម្បីជំនួយដល់ប្រធានក្រុម ៤T នោះ គឺត្រឹងទូលិញ ប៊ូយធីស្វឹង កេវត្រិញ ធីត្រិញ ប៊ិកធ្វី។ល។ ពិសេសគឺកីឡាការិនីវ័យក្មេង ជនជាតិភាគតិច ថាយវីធីញឺវិញ អាយុទើបតែ ២១ ឆ្នាំ។ ប្រសិនបើកីឡាការិនីរូបនេះបានបណ្តុះបណ្តាលល្អ គឺនាងតែងមានឈ្មោះនៅក្រុមជម្រើសក្នុងអនាគតជាពុំខាន៕

ហាថាញ-វិមាន

ចែករំលែកអត្ថបទ

ពាក្យគន្លឹះ