កីឡា - ទេសចរណ៍ ទេសចរណ៍

01/05/2026 - 08:40

ទាញយកផលពីសក្តានុភាព ទីក្រុងកឹងធើលើកកម្ពស់ទេសចរណ៍សាសនា

ជាមួយសក្តានុភាពលេចធ្លោជាច្រើនអំពីវប្បធម៌ ទីក្រុងកឹងធើជាជំហានៗទាញយកផលពីទេសចរណ៍សាសនាប្រកបដោយប្រសិទ្ធភាព រួមចំណែកបង្កជាចំណុចលេចធ្លោក្នុងការអភិវឌ្ឍវិស័យទេសចរណ៍និងទាក់ទាញភ្ញៀវទេសចរ។

 ភ្ញៀវទេសចរមកទស្សនានិងថតរូបនៅវត្តសំរោង។

មិនត្រឹមតែល្បីខាងទេសចរណ៍តំបន់ព្រែក ទន្លេ និងចម្ការឈើហូបផ្លែប៉ុណ្ណោះទេ ទីក្រុងកឹងធើមានវត្តខ្មែរជាច្រើនដែលមានស្ថាបត្យកម្មលេចធ្លោនិងដិតដាមដោយវប្បធម៌ពិសេសៗ ដូចជា៖ វត្តស្រឡូង វត្តមហាទប់ វត្តសំរោង...។ នេះគឺជាគ្រឹះដ៏សំខាន់សម្រាប់ទីក្រុងអភិវឌ្ឍផលិតផលទេសចរណ៍សាសនា ផ្សារភ្ជាប់ជាមួយអត្តសញ្ញាណភូមិភាគ។

រយៈពេលកន្លង ទីក្រុងបានយកចិត្តទុកដាក់លើការវិនិយោគនិងជួសជុលកែលម្អវត្តអារាមមួយចំនួន ព្រមទាំងទាញយកតម្លៃវប្បធម៌ ដើម្បីបម្រើដល់ភ្ញៀវទេសចរពេលមកទស្សនានិងគោរពបូជា។ ការអភិវឌ្ឍមិនត្រឹមតែអភិរក្សស្ថាបត្យកម្មប៉ុណ្ណោះទេ ថែមទាំងឆ្ពោះទៅរកការបង្កើតផលិតផលទេសចរណ៍ព្រមៗគ្នា ដូចជា៖ ការដាក់តាំងបង្ហាញវប្បធម៌ខ្មែរ ម្ហូបអាហារប្រពៃណី វត្ថុអនុស្សាវរីយ៍និងសេវាកម្មណែនាំភ្ញៀវ រួមចំណែកក្នុងការផ្សព្វផ្សាយតម្លៃបេតិកភ័ណ្ឌឱ្យកាន់តែសាយភាយ។

ទន្ទឹមនឹងនោះ ពិធីបុណ្យប្រពៃណីរបស់ជនរួមជាតិខ្មែរ ដូចជា បុណ្យអកអំបុក បុណ្យចូលឆ្នាំថ្មី បុណ្យសែនដូនតា... បានក្លាយជាផលិតផលទេសចរណ៍ដ៏វិសេសវិសាល ជាឱកាសដើម្បីផ្សព្វផ្សាយវប្បធម៌និងទាក់ទាញភ្ញៀវទេសចរយ៉ាងច្រើនកុះករឱ្យមកទស្សនាកម្សាន្ត។

ជាមួយគ្នានេះដែរ ការងារគ្រប់គ្រងនិងជំរុញដំណើរការនិងការចងសម្ព័ន្ធអភិវឌ្ឍន៍វិស័យទេសចរណ៍ ត្រូវបានអនុវត្តព្រមៗគ្នា។ ទីក្រុងបានចូលរួមក្នុងសកម្មភាពផ្សព្វផ្សាយរូបភាព ជំរុញការផ្លាស់ប្តូរឌីជីថលនិងអភិវឌ្ឍន៍ប្រព័ន្ធទេសចរណ៍ទំនើប ដើម្បីលើកកម្ពស់បទពិសោធន៍សម្រាប់ភ្ញៀវទេសចរ។ ធនធានមនុស្សក្នុងវិស័យទេសចរណ៍ ក៏បានយកចិត្តទុកដាក់បណ្តុះបណ្តាល រួមចំណែកលើកកម្ពស់គុណភាពសេវាកម្មនិងវិជ្ជាជីវៈ។

ឆ្នាំ២០២៥ ផ្នែកទេសចរណ៍ទីក្រុងកឹងធើ បន្តសម្រេចបានលទ្ធផលវិជ្ជមានជាច្រើន។ សរុបចំនួនភ្ញៀវទេសចរដែលមកទស្សនាប៉ាន់ស្មានជាង ១១,១៨លាននាក់ កើន ១៨% បើប្រៀនឹងឆ្នាំមុន ភ្ញៀវស្នាក់នៅមានជិត ៤,៩៥លាននាក់ ក្នុងនោះ ភ្ញៀវអន្តរជាតិមានជាង ៤៤៤ ពាន់នាក់។ ចំណូលសរុបពីទេសចរណ៍សម្រេចបានជិត ១០.០០០ ពាន់លានដុង កើន ២០% បើប្រៀបនឹងឆ្នាំ ២០២៤ បង្ហាញពីភាពទាក់ទាញកាន់តែខ្លាំងនៃទេសចរណ៍ទីក្រុងកឹងធើ ព្រមទាំងឆ្លុះបញ្ចាំងពីប្រសិទ្ធភាពនៃការធ្វើពិពិធកម្មផលិតផលនិងលើកកម្ពស់គុណភាពសេវាកម្ម។

តាមលោកង្វៀងវុាំងបៃ នាយកមន្ទីរវប្បធម៌ កីឡានិងទេសចរណ៍ទីក្រុង បានឱ្យដឹង បច្ចុប្បន្ន ទីក្រុងកឹងធើមានមណ្ឌលនិងកន្លែងទេសចរណ៍ ១១៣ កន្លែង ព្រមទាំងមានកម្លាំងពលកម្មជិត ១៦.០០០នាក់ បង្កជាមូលដ្ឋានគ្រឹះដ៏រឹងមាំសម្រាប់ការអភិវឌ្ឍវិស័យនេះ។ ពេលខាងមុខ ទីក្រុងនឹងបន្តទាញយកសក្តានុភាពប្រកបដោយប្រសិទ្ធភាព ជាពិសេសគឺទេសចរណ៍វប្បធម៌-សាសនា ដើម្បីរួមចំណែកបង្កកម្លាំងចលករជំរុញការអភិវឌ្ឍសេដ្ឋកិច្ច-សង្គមភូមិភាគក្នុងដំណាក់កាលថ្មី៕

ហុងទើ-ដាលីន

ចែករំលែកអត្ថបទ

ពាក្យគន្លឹះ