កីឡា - ទេសចរណ៍ កីឡា

31/10/2025 - 06:20

ត្រៀមលក្ខណៈសម្រាប់ការប្រណាំងទូក-ងប្រពៃណី

ពិធីប្រណាំងទូក-ង ទីក្រុងកឹងធើនឹងប្រព្រឹត្តឡើងនៅថ្ងៃទី ៤ និងទី ៥ ខែវិច្ឆិកា ឆ្នាំ២០២៥។ នេះគឺជាសកម្មភាពដ៏សំខាន់នៃពិធីបុណ្យអកអំបុក-ប្រណាំងទូក-ង ទីក្រុងកឹងធើ។ មកទល់ពេលនេះ ក្រុមទូកនីមួយៗលើភូមិឋានទីក្រុងកឹងធើ បានសស្រាក់សស្រាំហាត់សមដើម្បីត្រៀមលក្ខណៈចូលរួមប្រណាំង។

ទូក-ងនារីវត្តទំនប់ កំពុងហាត់សមប្តេជ្ញាចិត្តទទួលបានស្នាដៃខ្ពស់បំផុត។

បើតាមព័ត៌មានពីមន្ទីរជនជាតិនិងសាសនាទីក្រុងកឹងធើ ការប្រណាំងទូក-ងនឹងប្រព្រឹត្តឡើងលើដងព្រែក Maspero ដូចសព្វដង កន្លងមក តាមការគ្រោងទុក មានក្រុមទូក-ងបុរស នារីប្រមាណ ៦០ ទូក នៅក្នុងនិងក្រៅទីក្រុង ចូលរួមប្រណាំង។ ការប្រណាំងទូក-ង គឺជាព្រឹត្តិការណ៍ដ៏សំខាន់នៃពិធីបុណ្យអកអំបុក ទាក់ទាញប្រជាជននិងភ្ញៀវទេសចរជាច្រើននៅក្នុងនិងក្រៅប្រទេសមកទស្សនាកម្សាន្តនិងគាំទ្រ។

មកទល់ពេលនេះ ក្រុមទូក-ងមួយចំនួនបានមកប្រមូលផ្ដុំគ្នាលើដងព្រែក Maspero ដើម្បីសាកល្បងល្បឿន ក្នុងនោះ មានទូក-ង វត្តទំនប់ ២ ជាទូកដែលដណ្ដើមពានរង្វាន់ជើងឯក៣លើក ក៏បានត្រៀមលក្ខណៈជាស្រេចផងដែរ។ បងយឿងវឿង កីឡាករទូក-ងវត្តទំនប់ ២ ឱ្យដឹង៖ “ខ្ញុំបានចូលរួមអុំចាប់ពីឆ្នាំ ២០១៦ រហូតដល់សព្វថ្ងៃ ជារៀងរាល់ថ្ងៃ ក្រោយពីធ្វើការងាររួចហើយ រវាងម៉ោង ១៦ គឺខ្ញុំមកហាត់សម មធ្យមក្នុងមួយពេលហាត់អុំជាង៨គីឡូម៉ែត្រ។ ឆ្នាំនេះ មានទូក-ងលុងជាច្រើនចូលរួមប្រណាំង ម្ល៉ោះហើយ បងប្អូនតែងសាមគ្គី ខិតខំហាត់សមដើម្បីអុំបានលឿនជាងឆ្នាំមុនៗ ប្តេជ្ញាចិត្តរក្សាខ្ជាប់លទ្ធផលជើងឯក”។

មិនខុសអីពីក្រុមទូក-ងបុរសនោះទេ ក្រុមទូក-ងនារីវត្តទំនប់ ក៏កំពុងបញ្ចេញកម្លាំងហាត់សមនិងប្តេជ្ញាចិត្តរក្សាតំណែងជើងឯក។ បងស្រីត្រឹងធីម៉ី គ្រូបង្វឹកទូក-ងនារីវត្តទំនប់ឱ្យដឹង៖ “ខ្ញុំតែងលើកទឹកចិត្តបងប្អូននារីខំប្រឹងហាត់សមឱ្យបានល្អ អុំឱ្យអស់ពីសមត្ថភាពដើម្បីសម្រេចគោលដៅ។ ម្យ៉ាងទៀតដើម្បីបន្តការពារស្នាដៃគឺជាគោលដៅចម្បង ហើយយើងទាំងអស់គ្នាចូលរួមប្រណាំងក៏ដើម្បីអភិរក្សវិញ្ញាសាកីឡាប្រពៃណីជនជាតិដែរ។ ហេតុនេះ បងប្អូនសប្បាយរីករាយ សាមគ្គីហាត់សមដោយភាពស្វាហាប់និងការប្តេជ្ញាចិត្តខ្ពស់ ម្ល៉ោះហើយអ្នកណាក៏សង្ឃឹមនឹងទទួលបានរង្វាន់ខ្ពស់ដែរ”។

ឆ្នាំ ២០២៤ ក្នុងការប្រណាំងទូក-ង ខេត្តសុកត្រាំង(ចាស់) បច្ចុប្បន្នជាទីក្រុងកឹងធើ មានការចូលរួមពីទូក-ងបុរស ៥៣ ទូក ទូក-ងនារី ៧ ទូក ក្នុងនោះ មានទូក-ងលុងមួយនៅវត្តកោះធំ ខេត្តកាម៉ាវបានយកឈ្នះលើទូក-ងខ្លាំងៗជាច្រើននៃទីក្រុងកឹងធើ។ នៅវគ្គផ្តាច់ព្រ័ត្រទូក-ងវត្តទំនប់២ និងទូក-ងលុងកោះធំបានប្រកៀកប្រកិតគ្នា ហើយលទ្ធផលត្រូវរង់ចាំអាជ្ញាកណ្តាលពិនិត្យកាមេរ៉ានៅខ្សែព្រ័ត្រ។ ថ្វីដ្បិតតែទូក-ងលុងកោះធំ ទទួលបានរង្វាន់លេខពីរក៏ពិតមែន ប៉ុន្តែបានបង្ហាញពីល្បឿនផ្លោះយ៉ាងលឿនលើខ្សែទឹក ធ្វើឱ្យអ្នកគាំទ្រសរសើរមិនដាច់ពីមាត់។ ហេតុដូច្នេះ ឆ្នាំនេះ មានវត្តជាច្រើននៅទីក្រុងកឹងធើ និងបណ្តាខេត្តជិតខាងបានវិនិយោគបោះទូកលុងដើម្បីចូលរួមអុំប្រណាំង។ បច្ចុប្បន្ន ទូក-ងដែលចូលរួមអុំប្រណាំងបានត្រៀមលក្ខណៈរួចរាល់ សន្យាថានឹងបញ្ចេញថ្វីដៃយ៉ាងស្វាហាប់ ទាក់ទាញអារម្មណ៍ក្នុងពិធីប្រណាំងឆ្នាំនេះជាមិនខាន៕

យ្វីអាញ- លីសៀ

ចែករំលែកអត្ថបទ

ពាក្យគន្លឹះ