មហាសាមគ្គីជនជាតិ គំរូក្នុងសហគមន៍

15/09/2026 - 05:37

លោកថាច់សំអឿន៖ គំរូគ្រូបង្រៀនយកចិត្តទុកដាក់ខ្ពស់ចំពោះបុព្វហេតុអប់រំជនជាតិខ្មែរ

ជាច្រើនឆ្នាំសិក្សាកន្លង សាលាមធ្យមសិក្សាបាលី-ខ្មែរ ចំណុះមន្ទីរអប់រំនិងបណ្តុះបណ្តាលខេត្តវិញឡុង កាន់តែបញ្ជាក់ច្បាស់នូវឋានៈរបស់ខ្លួន និងបង្កើតបាននូវជំនឿទុកចិត្តអំពីគុណភាពបង្រៀននិងរៀន។ លទ្ធផលនេះគឺរាប់បញ្ចូលការខិតខំប្រឹងប្រែងអស់ពីកម្លាំងកាយចិត្តរបស់កងជួរគ្រូបង្រៀនទាំងមូល ក្នុងនោះមានលោកគ្រូ ថាច់សំអឿន ជាគ្រូបង្រៀនមុខវិជ្ជាភាសាអង់គ្លេសដែលទទួលបានការស្រឡាញ់រាប់អានពីសិស្សានុសិស្ស និងការទំនុកចិត្តពីឪពុកម្ដាយសិស្ស។

លោកគ្រូ ថាច់សំអឿន កំពុងណែនាំដល់សមណសិស្សនិងសិស្ស។

លោកគ្រូ ឡឹមសារ៉ន ចាងហ្វាងរងសាលា បានបញ្ជាក់៖ “លោកគ្រូថាច់សំអឿន បានចាត់បញ្ជូនមកទទួលបន្ទុកមុខវិជ្ជាភាសាអង់គ្លេស។ ក្នុងអំឡុងពេលបំពេញការងារ លោកគ្រូតែងមានសាមគ្គីភាពយ៉ាងជិតស្និទ្ធ ព្រមទាំងជួយគាំទ្រដល់ថ្នាក់ដឹកនាំសាលាយ៉ាងអស់ពីចិត្ត ពិសេសគឺលើការងារជំនាញ។ លោកគ្រូបានបញ្ចប់ថ្នាក់បរិញ្ញាបត្រគរុកោសល្យភាសាអង់គ្លេស ហេតុនេះទាំងចំណេះដឹងនិងវិធីសាស្ត្របង្រៀនគឺល្អិតល្អន់ណាស់។ លោកគ្រូថែមទាំងបង្កបរិយាកាសសិក្សាដ៏ពុះពោរ តែងដោះដូរមុខជំនាញនិងវិជ្ជាជីវៈជាមួយគ្រូបង្រៀនដទៃ ជួយឱ្យគុណភាពបង្រៀនភាសាអង់គ្លេស ក៏ដូចជាគុណភាពរួមរបស់សាលាមានលំនឹងជានិច្ច និងតែងសម្រេចល្អនូវភារកិច្ចដែលប្រគល់ជូនជាច្រើនឆ្នាំបន្តបន្ទាប់”។

តាំងពីវ័យកុមារភាព លោកគ្រូ ថាច់សំអឿន មានក្ដីស្រមៃចង់ក្លាយជាគ្រូបង្រៀនដោយក្ដីស្រឡាញ់ និងចំណូលចិត្តផ្នែកគរុកោសល្យ។ ឆ្នាំ១៩៩៣ លោកគ្រូបានរៀននៅសាលាមធ្យមសិក្សាបំពេញវិជ្ជាបាលីណាមបូ (ខេត្តសុកត្រាំង) រួចបន្តរៀនសូត្រលើកកម្ពស់កម្រិតវិជ្ជាថ្នាក់មហាវិទ្យាល័យគរុកោសល្យភាសាអង់គ្លេសនៅសាកលវិទ្យាល័យត្រាវិញក្នុងឆ្នាំ១៩៩៨។ ពេលបញ្ចប់ការសិក្សា លោកគ្រូក៏បានចាត់ឱ្យទៅបង្រៀននៅសាលាអនុវិទ្យាល័យឃុំង៉ូឡាក។ ក្នុងបណ្តាឆ្នាំដំបូងនៃអាជីពបង្រៀន លោកគ្រូបានជួបប្រទះការលំបាកជាច្រើន ដោយហេតុថាសិស្សានុសិស្សជាកូនចៅជនជាតិខ្មែរមានកម្រិតវប្បធម៌មិនស្មើគ្នា។ ទោះជាយ៉ាងណាក្តី ឧត្តមគតិរបស់លោកគ្រូនៅតែរឹងមាំជានិច្ច នោះគឺគ្រប់យ៉ាងដើម្បីសិស្សានុសិស្សជាទីស្រឡាញ់។ ក្នុងគោលបំណងជួយសិស្សានុសិស្សឱ្យរៀនពូកែភាសាអង់គ្លេស លោកគ្រូបានពុះពាររាល់ការលំបាកដោយផ្ទាល់ខ្លួន កសាងបានជារូបភាពគ្រូបង្រៀនដ៏ឆ្នើមម្នាក់។ លុះដល់ឆ្នាំ២០១៤ លោកគ្រូក៏បានចាត់ឱ្យមកបង្រៀនមុខវិជ្ជាភាសាអង់គ្លេសនៅសាលាមធ្យមសិក្សាបាលី-ខ្មែរ ដែលជាសាលាមានសិស្សជនជាតិខ្មែរជាង ៩៨%។

រាល់ពេលចូលបង្រៀន លោកគ្រូតែងស្រាវជ្រាវកសាងវិធីសាស្ត្របង្រៀនឱ្យស្របនឹងលក្ខខណ្ឌជាក់ស្តែងរបស់សិស្ស។ ពិសេសចំពោះមុខវិជ្ជាភាសាអង់គ្លេស លោកគ្រូសំអឿន បានចែករំលែក៖ “ខ្ញុំតែងតាំងចិត្តជានិច្ចថា ត្រូវធ្វើដូចម្តេចដើម្បីបង្កើតបានម៉ោងសិក្សាប្រកបដោយគុណភាព ដែលអាចទាក់ទាញចំណង់ចំណូលចិត្ត និងភាពសកម្មក្នុងការរៀនសូត្ររបស់សិស្ស។ ផ្អែកតាមកម្រិតយល់ដឹងរបស់សិស្សម្នាក់ៗ ខ្ញុំតែងស្រាវជ្រាវស្វែងរកទម្រង់បង្រៀនដែលស័ក្តិសម ដើម្បីឱ្យម៉ោងសិក្សាកាន់តែមានភាពរស់រវើក និងពោរពេញដោយគំនិតច្នៃប្រតិដ្ឋ ដែលជួយឱ្យសិស្សរៀនឆាប់ចេះនិងចងចាំខ្លឹមសារបានយូរអង្វែង”។

ម៉ោងសិក្សាមុខវិជ្ជាភាសាអង់គ្លេស ដែលបង្រៀនដោយលោកគ្រូ ថាច់សំអឿន។

សមណសិស្ស ស៊ើងសុខភីរម្យ រៀនថ្នាក់ទី១០/A បានលើកឡើងពីចំណាប់អារម្មណ៍៖ “អាស្រ័យវិធីសាស្ត្រពន្យល់ដ៏ងាយយល់ ផ្សារភ្ជាប់ការសិក្សានឹងការអនុវត្តជាក់ស្តែងរបស់លោកគ្រូ ថាច់សំអឿន ទើបធ្វើឱ្យអាត្មាភាពកាន់តែមានចំណូលចិត្តចំពោះមុខវិជ្ជាភាសាអង់គ្លេសជាលំដាប់។ ការបង្រៀនរបស់លោកគ្រូគឺមិនផ្អែកទាំងស្រុងទៅលើសៀវភៅពុម្ពឡើយ គឺបានអនុវត្តបន្ថែមនូវវិធានការជាច្រើនទៀតដើម្បីជួយឱ្យសមណសិស្ស និងសិស្សងាយយល់ ព្រមទាំងបង្រៀនទាំងវេយ្យាករណ៍ និងការបញ្ចេញសំឡេងយ៉ាងច្បាស់លាស់។ មិនត្រឹមតែបង្រៀនមុខជំនាញប៉ុណ្ណោះទេ លោកគ្រូថែមទាំងបង្រៀនសិស្សឱ្យមានរបៀបរៀបរយក្នុងការរស់នៅ បង្ហាញពីការទទួលខុសត្រូវចំពោះគ្រួសារនិងសង្គមទៀតផង”។

មិនត្រឹមតែខិតខំប្រឹងប្រែងលើកកម្ពស់វិជ្ជាជីវៈប៉ុណ្ណោះទេ លោកគ្រូ ថាច់សំអឿន ក៏បានបំពេញល្អនូវតួនាទីជាមិត្តរួមការងារដ៏ឧស្សាហព្យាយាម តែងតែយកចិត្តទុកដាក់ និងជួយគាំទ្រដល់មិត្តរួមការងារក្នុងសាលា។ ការរួមចំណែករបស់លោកគ្រូ ចំពោះបុព្វហេតុអប់រំនិងបណ្តុះបណ្តាលសមណសិស្ស និងសិស្សជនជាតិខ្មែរ គឺមានតម្លៃគួរឱ្យគោរពជាទីបំផុត និងស័ក្តិសមជាគំរូដ៏ល្អសម្រាប់លោកគ្រូអ្នកគ្រូដទៃទៀតយកតម្រាប់តាម៕

ស៊ើងម៉ាល័យ - ថាច់ធី

ចែករំលែកអត្ថបទ

ពាក្យគន្លឹះ