សុខភាព - អប់រំ សុខភាព

20/01/2026 - 08:47

មន្ទីរពេទ្យសម្ភព-កុមារសុកត្រាំង រួមដំណើរជាមួយកុមារអូទីស្សឹម

ចំពោះមុខនិន្នាការកើនឡើងចំនួនកុមារកើតជំងឺអូទីស្សឹម មន្ទីរពេទ្យសម្ភព-កុមារសុកត្រាំង បានដាក់ឱ្យដំណើរការបន្ទប់ពិនិត្យជំងឺឯកទេស រួមចំណែកឆាប់រកឃើញ អន្តរាគមន៍បានទាន់ពេល និងរួមដំណើរយូរអង្វែងជាមួយកុមារអូទីស្សឹមនិងគ្រួសាររបស់ពួកគេ។

វេជ្ជបណ្ឌិតនៃមន្ទីរពេទ្យសម្ភព - កុមារសុកត្រាំង កំពុងពិនិត្យស្ថានភាពសុខភាពដល់កុមារ។

ជំងឺអូទីស្សឹម ជាប្រភេទនៃពិការភាពវិបត្តិ ប្រព័ន្ធប្រសាទមានលក្ខណៈពេញមួយជីវិត សញ្ញាប្រាកដមួយចំនួន ដូចជា ការខ្វះបំណិនអន្តរកម្មសង្គម លំបាកក្នុងការនិយាយទំនាក់ទំនងនិងបញ្ចេញកាយវិការ រីឯចំណង់ចំណូលចិត្តក៏តិចតួចនិងមានលក្ខណៈដដែលៗ។ តាមវេជ្ជបណ្ឌិត ត្រឹងធីប៊ិតទ្វឹង ផ្នែកពិនិត្យជំងឺនៃមន្ទីរពេទ្យសម្ភព-កុមារសុកត្រាំង បានបញ្ជាក់ថា ការឆាប់ដឹងពីសញ្ញានៃជំងឺអូទីស្សឹម មានប្រយោជន៍ដ៏សំខាន់ក្នុងការអន្តរាគមន៍និងការគាំទ្រដល់កុមារ។

ក្រុមអ្នកជំនាញបានផ្តល់អនុសាសន៍ ឪពុកម្តាយត្រូវយកចិត្តទុកដាក់ជាពិសេសចំពោះសញ្ញា “ទង់ក្រហម” ចំនួន ៥ យោងតាមបណ្ឌិតសភាប្រសាទសាស្ត្រអាមេរិក រួមមាន៖ កុមារមិន បញ្ចេញសំឡេងអេចអូច មិនប្រើកាយវិការនៅ អាយុ ១២ ខែ; មិននិយាយបានពាក្យមួយម៉ាត់ នៅអាយុ ១៦ ខែ; មិនប្រតិកម្មនៅពេលហៅឈ្មោះខ្លួន; មិនអាចនិយាយបានពាក្យពីរម៉ាត់ពេលអាយុ ២៤ ខែ; បាត់បង់ជំនាញភាសានិងសង្គមនៅគ្រប់វ័យ។ នៅពេលឃើញសញ្ញាទាំងនេះ ត្រូវនាំកុមារទៅកាន់មូលដ្ឋានជំនាញភ្លាមៗ ដើម្បីពិនិត្យ សម្រាំងនិងរកឃើញឆាប់រហ័ស ដោយផ្អែកលើចំណេះដឹងវេជ្ជសាស្ត្រឯកទេស។

ផ្អែកលើតម្រូវការជាក់ស្ដែង និងបំណងប្រាថ្នាផ្តល់ការថែទាំសុខភាពយ៉ាងទូលំទូលាយសម្រាប់កុមារ នៅថ្ងៃទី ២១ ខែមិថុនា ឆ្នាំ ២០២៤ មន្ទីរពេទ្យសម្ភព-កុមារសុកត្រាំង បានដាក់ឱ្យដំណើរការបន្ទប់ពិនិត្យជំងឺឯកទេសសម្រាប់កុមារអូទីស្សឹម។ បន្ទាប់ពីដំណើរការជាងមួយឆ្នាំ បន្ទប់ពិនិត្យជំងឺបានទទួលនិងពិនិត្យជំងឺដល់កុមារជាង ២០០ នាក់ ក្នុងនោះ កុមារដែលមានជំងឺអូទីស្សឹម ស្រូបអត្រាជាង ២០% នៃចំណោមករណីដែលមកពិនិត្យ។

បន្ទប់ពិនិត្យជំងឺ បច្ចុប្បន្នមានវេជ្ជបណ្ឌិតឯកទេសផ្នែកអូទីស្សឹមម្នាក់ វេជ្ជបណ្ឌិតស្តារមុខងារម្នាក់ និងបុគ្គលិកបច្ចេកទេសអន្តរាគមន៍ម្នាក់។ សកម្មភាពអន្តរាគមន៍ ត្រូវបានអនុវត្តមានរបៀបរៀបរយ រួមនឹងសកម្មភាពព្យាបាល ភាសាព្យាបាល ដោយផ្អែកលើទម្រង់ទំនាក់ទំនងមានការគាំទ្របន្តបន្ទាប់ ទំនាក់ទំនងបន្ថែម និងជំនួស (AAC) រួមនឹងឧបករណ៍ជំនួយដោយរូបភាព។ ហេតុនោះ កុមារទទួលបានការអន្តរាគមន៍សមស្របតាមសមត្ថភាពកម្រិតនិងតម្រូវការអភិវឌ្ឍផ្ទាល់ខ្លួន។

វេជ្ជបណ្ឌិតឯកទេសកម្រិត II ជុងតឹងឌិន នាយកមន្ទីរពេទ្យសម្ភព - កុមារសុកត្រាំង ឱ្យដឹង៖ “នៅពេលខាងមុខ បន្ទប់ពិនិត្យជំងឺនឹងបន្តធ្វើឱ្យសុក្រឹតដំណើរការវាយតម្លៃ ពិគ្រោះយោបល់អន្តរាគមន៍និងតាមដាន; ផ្តោតសំខាន់លើការបណ្តុះបណ្តាលធនធានមនុស្សនិងពង្រឹងការសហការរវាងអន្តរផ្នែកជំនាញ។ ជាមួយក្រុមវេជ្ជបណ្ឌិត ខ្នះខ្នែងអស់ពីចិត្តនិងប្តេជ្ញាបំពេញតួនាទីស្នូល ដើម្បីនាំមកគុណតម្លៃជាក់ស្តែង ជួយឱ្យកុមារទទួលបានការអន្តរាគមន៍ឆាប់រហ័ស បង្កើនសមត្ថភាពសម្របខ្លួនក្នុងសង្គមនិងការគាំទ្រពីគ្រួសារ ជាពិសេសនៅតំបន់លំបាកនិងតំបន់មានជនជាតិភាគតិចរស់នៅកុះករ”៕

ហុងតើ - ពេជ្រសឿន

ចែករំលែកអត្ថបទ

ពាក្យគន្លឹះ