សន្តិសុខ - ការពារប្រទេស ការពារប្រទេស

20/07/2026 - 19:14

ខេត្តកាម៉ាវ សាយភាយប្រពៃណី "ផឹកទឹកនឹកប្រភព"

ឆ្ពោះទៅកាន់ខួបអនុស្សាវរីយ៍ ៧៩ ឆ្នាំ ទិវាយុទ្ធជនពិការ - យុទ្ធជនពលី (២៧/៧/១៩៤៧ - ២៧/៧/២០២៦) សម្ព័ន្ធយុវជន និងសមាគមនារីការិយាល័យនគរបាលចរាចរណ៍នៃនគរបាលខេត្តកាម៉ាវ បានសហការជាមួយក្រុមហ៊ុន Viettel កាម៉ាវ និងការិយាល័យសេនាធិការនៃនគរបាលខេត្ត រៀបចំកម្មវិធីផ្លាស់ផ្កាឈូកថ្មីជាង ១៨.៨០០ ទងនៅតាមផ្នូរយុទ្ធជនពលីនៅបូជនីយដ្ឋានយុទ្ធជនពលីនានាក្នុងខេត្តកាម៉ាវ។ ផ្កាឈូកដាក់បូជានៅតាមផ្នូរនីមួយៗ មិនត្រឹមតែរួមចំណែកបង្កទេសភាពបៃតង ជ្រះ ស្អាត និងរក្សាភាពថ្លៃថ្នូរនៃបូជនីយដ្ឋានប៉ុណ្ណោះទេ ប៉ុន្តែថែមទាំងជានិមិត្តរូបនៃទឹកចិត្តដឹងគុណ និងការរំលឹកគុណយ៉ាងជ្រាលជ្រៅចំពោះកូនចៅឆ្នើមដែលបានបូជាយុវវ័យ និងជីវិតដើម្បីបុព្វហេតុរំដោះប្រទេសជាតិ និងការពារមាតុភូមិ។

ការិយាល័យនគរបាលចរាចរណ៍ខេត្តកាម៉ាវ ផ្លាស់ផ្កាឈូកថ្មីនៅតាមផ្នូរយុទ្ធជនពលី បង្ហាញពីទឹកចិត្តដឹងគុណចំពោះវីរយុទ្ធជនពលី។

នៅក្នុងបរិយាកាសទូទាំងប្រទេសឆ្ពោះទៅកាន់ទិវាយុទ្ធជនពិការ - យុទ្ធជនពលី នៅថ្ងៃទី ២៧ ខែកក្កដា កម្មាភិបាល សមាជិកយុវជន សមាជិកានៃនគរបាលចរាចរណ៍ និងការិយាល័យសេនាធិការនៃនគរបាលខេត្ត ព្រមទាំងកម្មាភិបាល បុគ្គលិកនៃក្រុមហ៊ុន Viettel កាម៉ាវ បានបើកយុទ្ធនាការព្រមៗគ្នា អនុវត្តកម្មវិធីផ្លាស់ផ្កាឈូកថ្មីជាង ១៨.៨០០ ទង នៅតាមផ្នូរយុទ្ធជនពលី ដោយចំណាយថវិកាសរុបជាង ៣៧០ លានដុង នៅតាមបូជនីយដ្ឋានយុទ្ធជនពលីនានាក្នុងខេត្ត។ នៅបូជនីយដ្ឋានយុទ្ធជនពលីខេត្តកាវម៉ាវ ស្ថិតក្នុងសង្កាត់អាងស្វៀង និងឃុំហ្វាប៊ិញ កងកម្លាំងទាំងអស់បានរួមគ្នាប្រមូលផ្កាចាស់ៗ សម្អាតបរិវេណ ជូតសម្អាតផ្នូរនីមួយៗ រៀបចំមណ្ឌលរំលឹកគុណ និងផ្លាស់ថ្មីផ្កាឈូកដោយប្រុងប្រយ័ត្ន។ ក្នុងបរិយាកាសដ៏ថ្លៃថ្នូរនេះ រាល់សកម្មភាពទាំងអស់សុទ្ធតែបង្ហាញពីសេចក្តីគោរព និងការដឹងគុណយ៉ាងជ្រាលជ្រៅចំពោះវីរយុទ្ធជនពលី។

រូបភាពសមាជិកសម្ព័ន្ធយុវជន កម្មាភិបាល និងយុទ្ធជននគរបាលក្នុងឯកសណ្ឋាន រួមជាមួយបុគ្គលិក Viettel រួមគ្នារៀបចំថែទាំផ្នូរនីមួយៗ បានបង្កនូវរូបភាពយ៉ាងស្រស់ស្អាត និងមានអត្ថន័យជ្រាលជ្រៅ។ សកម្មភាពនេះមិនត្រឹមតែរួមចំណែករក្សាភាពថ្លៃថ្នូរនៃសំណង់កត់ត្រាគុណូបការៈយុទ្ធជនពលីប៉ុណ្ណោះទេ ប៉ុន្តែថែមទាំងបំផុសក្តីមោទនភាពជាតិ បំប៉ន់ឧត្តមគតិសីលធម៌បដិវត្តន៍ និងស្មារតីទទួលខុសត្រូវរបស់ជំនាន់ក្រោយចំពោះភូមិស្រុក និងប្រទេសជាតិ។ តាមលោកស្រីវរៈសេនីយ៍ត្រី ត្រិនង៉ុកថាវ- ប្រធានសមាគមនារីនៃការិយាល័យនគរបាលចរាចរណ៍ខេត្តកាម៉ាវ បានឱ្យដឹង៖ “កម្មវិធីនេះជាឱកាសមួយសម្រាប់កម្មាភិបាល និងសមាជិកាម្នាក់ៗ បង្ហាញពីទឹកចិត្តដឹងគុណតាមរយៈសកម្មភាពជាក់ស្តែង ព្រមទាំងរួមចំណែកអប់រំប្រពៃណីស្នេហាជាតិ ទឹកចិត្តដឹងគុណ និងស្មារតីទទួលខុសត្រូវចំពោះជំនាន់ក្រោយ”។ តាមលោកស្រី វរៈសេនីយ៍ត្រី ត្រិនង៉ុកថាវ ផ្កាឈូកមួយទងៗដែលបានផ្លាស់ថ្មី មិនត្រឹមតែធ្វើឱ្យស្រស់ស្អាតប៉ុណ្ណោះទេ ប៉ុន្តែថែមទាំងជានិមិត្តរូបនៃទឹកចិត្តដឹងគុណចំពោះអ្នកដែលបានលះបង់ជីវិតដើម្បីមាតុភូមិ។ តាមរយៈសកម្មភាពនេះ កម្មាភិបាល និងសមាជិកាម្នាក់ៗកាន់តែយល់ដឹងជ្រាលជ្រៅអំពីការទទួលខុសត្រូវរបស់ខ្លួនក្នុងភារកិច្ច និងជីវភាពរស់នៅ បន្តពង្រីកគុណសម្បត្តិនៃយុទ្ធជននគរបាលប្រជាជន "ដើម្បីប្រទេសជាតិភ្លេចខ្លួន ដើម្បីប្រជាជនបម្រើ"។

កម្មាភិបាល និងយុទ្ធជននៃនគរបាលខេត្តកាម៉ាវ ផ្លាស់ផ្កាឈូកថ្មីនៅតាមផ្នូរយុទ្ធជនពលីនៅបូជនីយដ្ឋាន សម្តែងនូវការដឹងគុណយ៉ាងជ្រាលជ្រៅ។

លោកវរៈសេនីយ៍ទោ ង្វៀងថាញត្វង អនុប្រធានការិយាល័យនគរបាលចរាចរណ៍ខេត្តកាម៉ាវ បានឱ្យដឹង៖ “សកម្មភាពផ្លាស់ផ្កាឈូកថ្មីនៅតាមបូជនីយដ្ឋានយុទ្ធជនពលី បានអង្គភាពរក្សាជារៀងរាល់ឆ្នាំ ហើយបានក្លាយជាសកម្មភាពអប់រំប្រពៃណី មានអត្ថន័យជាក់ស្តែងសម្រាប់កម្មាភិបាល យុទ្ធជន សមាជិកយុវជន និងសមាជិកា”។ តាមលោកវរៈសេនីយ៍ទោ ង្វៀងថាញត្វង ផ្នូរយុទ្ធជនពលីនីមួយៗ គឺជានិមិត្តរូបដ៏ពិសិដ្ឋនៃការលះបង់ដើម្បីឯករាជ្យ និងសេរីភាពរបស់ប្រជាជាតិ។ ហេតុដូច្នេះ ការថែទាំ អនាម័យ ផ្លាស់ប្តូរផ្កា និងអុជធូប មិនត្រឹមតែបង្ហាញពីសីលធម៌ “ផឹកទឹកនឹកប្រភព” និងទឹកចិត្តដឹងគុណចំពោះបុព្វបុរសដែលបានលះបង់ដើម្បីបុព្វហេតុការពារមាតុភូមិប៉ុណ្ណោះទេ ប៉ុន្តែថែមទាំងរួមចំណែកអប់រំកម្មាភិបាល និងយុទ្ធជន ឱ្យចងចាំជានិច្ចនូវប្រពៃណីដ៏ល្បីល្បាញនៃកងកម្លាំងនគរបាលប្រជាជន។ ផ្តើមពីនោះ កម្មាភិបាល និងយុទ្ធជនម្នាក់ៗ បន្តហាត់ពត់លត់ដំស្មារតីនយោបាយ លើកកម្ពស់ស្មារតីទទួលខុសត្រូវ ខិតខំបម្រើប្រជាជនដោយស្មោះស្ម័គ្រ និងប្តេជ្ញាសម្រេចភារកិច្ចឆ្នើម ធានាសណ្តាប់ធ្នាប់ សុវត្ថិភាពចរាចរណ៍នៅលើភូមិដ្ឋានខេត្ត។

កម្មវិធីផ្លាស់ផ្កាឈូកថ្មីនៅតាមបូជនីយដ្ឋានយុទ្ធជនពលី គឺជាសកម្មភាពជាក់ស្តែងមួយក្នុងចំណោមសកម្មភាពនានារបស់សម្ព័ន្ធ យុវជន និងសមាគមនារីនៃការិយាល័យនគរបាលចរាចរណ៍ខេត្តកាម៉ាវ ឆ្ពោះទៅកាន់ខួបអនុស្សាវរីយ៍ ៧៩ ឆ្នាំទិវាយុទ្ធជនពិការ - យុទ្ធជនពលី។ ឆ្លងតាមរយៈសកម្មភាពដ៏មានអត្ថន័យនេះ សីលធម៌ “ផឹកទឹកនឹកប្រភព” និង “តបស្នងសងគុណ” បន្តបានផ្សព្វផ្សាយយ៉ាងទូលំទូលាយ រួមចំណែកបំប៉ន់ឧត្តមគតិបដិវត្តន៍ ជំរុញស្មារតីស្នេហាជាតិ និងការទទួលខុសត្រូវចំពោះកម្មាភិបាល យុទ្ធជន សមាជិកយុវជន និងសមាជិកា។ ទន្ទឹមនឹងនោះ កម្មវិធីក៏បានរួមចំណែកកសាង និងសាយភាយរូបភាពដ៏ល្អប្រពៃនៃយុទ្ធជននគរបាលកាម៉ាវ មានសមត្ថភាព មនុស្សធម៌ ជិតស្និទ្ធជាមួយប្រជាជន គោរពប្រជាជន ដើម្បីប្រជាជនបម្រើ៕

យ្វីអាញ - វ៉ាន់តឹន

ចែករំលែកអត្ថបទ

ពាក្យគន្លឹះ