សន្តិសុខ - ការពារប្រទេស ការពារប្រទេស

04/06/2026 - 06:36

ផ្សព្វផ្សាយច្បាប់ចរាចរណ៍ក្នុងសាលារៀន

អនុវត្តផែនការរបស់នាយកនគរបាលទីក្រុងកឹងធើ អំពីការផ្សព្វផ្សាយការងារធានាសណ្តាប់ធ្នាប់ សុវត្ថិភាពចរាចរណ៍ឆ្នាំ ២០២៦ ការិយាល័យប៉ូលិសចរាចរណ៍នៃនគរបាលទីក្រុងកឹងធើ បង្កើនការអនុវត្តសកម្មភាពផ្សព្វផ្សាយច្បាប់នៅតាមមូលដ្ឋានអប់រំលើភូមិឋាន។

ពិធីផ្សព្វផ្សាយចំណេះដឹងច្បាប់អំពីសុវត្ថិភាពចរាចរណ៍ជូនសិស្សានុសិស្សនៅវិទ្យាល័យជនជាតិអន្តេវាសិកហ្វិញកឿង។

ការិយាល័យប៉ូលិសចរាចរណ៍នគរបាលទីក្រុងកឹងធើ ព្រមទាំងក្រុមហ៊ុនទទួលខុសត្រូវមានកម្រិតហុងឌឹក ទើបសហការជាមួយវិទ្យាល័យជនជាតិអន្តេវាសិកហ្វិញកឿង ចាត់តាំងកម្មវិធីអប់រំចំណេះដឹងផ្នែកច្បាប់ និងណែនាំបំណិន បើកបរដល់សិស្សានុសិស្សជាង ៦០០ នាក់។ ខ្លឹមសារផ្សព្វផ្សាយ រួមមាន៖ ច្បាប់សណ្តាប់ធ្នាប់សុវត្ថិភាពចរាចរណ៍ផ្លូវគោក; បទប្បញ្ញត្តិស្តីពីអាយុដែលអនុញ្ញាតឱ្យបើកបរយានយន្តនិងកង់អគ្គិសនី; ការទទួលខុសត្រូវរបស់អ្នកបើកបរមធ្យោបាយ; បំណិនដោះស្រាយរាល់បញ្ហាដែលជួបប្រទះក្នុងភាពជាក់ស្តែង; ព្រមទាំងដាក់សំណួរពីស្ថានការណ៍ឱ្យសិស្សពិភាក្សា ដោះស្រាយចម្ងល់ពាក់ព័ន្ធនឹងសុវត្ថិភាពចរាចរណ៍។

ប្អូនគឹមតឹងឡុក សិស្សថ្នាក់ទី១២ ឱ្យដឹង៖ “ចូលរួមកម្មវិធីប្អូនយល់ច្បាស់អំពីច្បាប់ដឹងពីការបើកបរប្រកបដោយសុវត្ថិភាព; បំណិនពិចារណាជាមុន ដោះស្រាយរាល់ហេតុការណ៍នៅពេលចូលរួមចរាចរណ៍; ចេះប្រើប្រាស់ហ្គែរ - ហ្វ្រាំងឈប់ចតយានយន្តបានត្រឹមត្រូវ។ល។ តាមរយៈនោះ បានជួយឱ្យប្អូនមានទំនុកចិត្តនៅពេលបើកបរលើដងផ្លូវ និងធានាសុវត្ថិភាពសម្រាប់ខ្លួនឯង”។ កម្មវិធីក៏បានណែនាំអនុវត្តការបើកបរលើទីលានសាកល្បងជាមូលដ្ឋាន; បំណិនបង្ការចៀសវាងហានិភ័យ ជួយសង្គ្រោះអ្នករងគ្រោះ; វប្បធម៌អាកប្បកិរិយានៅពេលចូលរួមចរាចរណ៍ ស្មារតីភ្ញាក់រលឹកគោរពច្បាប់ស្តីពីចរាចរណ៍; រាល់អំពើប្រព្រឹត្តល្មើស និងកម្រិតពិន័យចំពោះសកម្មភាពប្រគល់យានយន្តឱ្យអ្នកដែលមិនគ្រប់លក្ខណៈបើកបរ។ល។ ទាំងនេះជួយឱ្យប្អូនៗមានស្មារតីគោរពច្បាប់ និងបង្ការការប្រព្រឹត្តខុសក្នុងវ័យសិក្សា។

ទន្ទឹមនឹងនោះ ការិយាល័យប៉ូលិសចរាចរណ៍នៃនគរបាលទីក្រុងកឹងធើ សហការជាមួយវិទ្យាល័យជនជាតិអន្តេវាសិកហូវយ៉ាង ចាត់តាំងកម្មវិធី “យុវវ័យកឹងធើជាមួយសុវត្ថិភាពចរាចរណ៍”។ ក្នុងកម្មវិធីនេះ គ្រូឧទ្ទេសក៍បានផ្តល់ចំណេះដឹងអំពីច្បាប់ សណ្តាប់ធ្នាប់សុវត្ថិភាពចរាចរណ៍ផ្លូវគោក; បំណិនចូលរួមចរាចរណ៍ប្រកបដោយសុវត្ថិភាព អនុវត្តការពាក់មួកសុវត្ថិភាពបានត្រឹមត្រូវ; ដោះដូរពិភាក្សាផ្ទាល់ជាមួយសិស្សអំពីបំណិនបើកបរប្រកបដោយសុវត្ថិភាព និងហេតុការណ៍ជួបប្រទះក្នុងភាពជាក់ស្តែង ជួយឱ្យសិស្សមានស្មារតីភ្ញាក់រលឹកក្នុងការកសាងវប្បធម៌ចរាចរណ៍។

អ្នកគ្រូត្រិញធីទ្រុកលិញ នាយិកាវិទ្យាល័យជនជាតិអន្តេវាសិកហូវយ៉ាង ឱ្យដឹង៖ “កម្មវិធីរួមចំណែកធ្វើឱ្យរីកសាយភាយនូវសារ៖ “សុវត្ថិភាពចរាចរណ៍ គឺជាសុភមង្គលនៃគ្រប់គ្រួសារ”។ កម្មវិធីនេះ ជួយឱ្យប្អូនៗយល់ច្បាស់អំពីច្បាប់ចរាចរណ៍ផ្លូវគោក និងដោះដូរដោយផ្ទាល់ពីស្ថានភាពជាក់ស្តែង ជួយឱ្យងាយយល់ងាយចងចាំ និងងាយស្រួលអនុវត្តក្នុងជីវភាពរស់នៅប្រចាំថ្ងៃ។ ផ្តើមពីនោះ អនុវត្តច្បាប់យ៉ាងម៉ឺងម៉ាត់ រួមចំណែកកសាងវប្បធម៌ចរាចរណ៍ប្រកបដោយសុវត្ថិភាពក្នុងសាលារៀន ព្រមទាំងផ្សព្វផ្សាយស្មារតីទទួលខុសត្រូវរបស់យុវវ័យចំពោះខ្លួនឯង គ្រួសារនិងសង្គម”៕

ប្រែសម្រួល៖ លីសៀ

ចែករំលែកអត្ថបទ

ពាក្យគន្លឹះ