វប្បធម៌-សិល្បៈ វប្បធម៌

07/04/2026 - 15:36

សកម្មត្រៀមបម្រុងសម្រាប់កម្មវិធីទូរទស្សន៍ផ្សាយផ្ទាល់អំណរបុណ្យចូលឆ្នាំថ្មី ឆ្នាំ២០២៦

យោងតាមផែនការលេខ ១៤១/KH-UBND របស់គណៈកម្មាធិការប្រជាជនទីក្រុងកឹងធើ ស្តីពីការចាត់តាំងសកម្មភាពអំណរបុណ្យចូលឆ្នាំថ្មីប្រពៃណីរបស់ជនរួមជាតិខ្មែរ ឆ្នាំ២០២៦។ ក្នុងនោះ កម្មវិធីទូរទស្សន៍ផ្សាយបន្តផ្ទាល់អបអរសាទរបុណ្យចូលឆ្នាំថ្មីប្រពៃណី នឹងបានចាត់តាំងឡើងនៅវត្តមជ្ឈិមារាមជ្រោយទឹមចាស់ សង្កាត់មីស្វៀង ទីក្រុងកឹងធើ។

ដើម្បីត្រៀមលក្ខណៈឱ្យបានហ្មត់ចត់សម្រាប់ការងារមុន ក្នុងអំឡុងពេលនិងក្រោយកម្មវិធីទូរទស្សន៍ផ្សាយបន្តផ្ទាល់អំណរបុណ្យចូលឆ្នាំថ្មី ឆ្នាំ២០២៦ ព្រឹកថ្ងៃទី ៦ ខែមេសា តំណាងគណៈឃោសនាអប់រំ ប្រជាចលនាទីក្រុង ថ្នាក់ដឹកនាំមន្ទីរជនជាតិនិងសាសនា តំណាងមន្ទីរ គណៈ ផ្នែកពាក់ព័ន្ធនានារបស់ទីក្រុង ថ្នាក់ដឹកនាំសង្កាត់មីស្វៀង រួមជាមួយផ្នែកជំនាញពាក់ព័ន្ធដោយផ្ទាល់ដល់ការងារផលិតកម្មវិធីទូរទស្សន៍ផ្សាយបន្តផ្ទាល់របស់កាសែតនិងវិទ្យុ - ទូរទស្សន៍កឹងធើ បានអញ្ជើញចុះពិនិត្យជាក់ស្តែង ដោះដូរយោបល់និងឯកភាពលើខ្លឹមសារសហការ ដើម្បីធានាឱ្យកម្មវិធីប្រព្រឹត្តទៅដោយរលូននិងមានប្រសិទ្ធភាព។

ទិដ្ឋភាពនៃការចុះពិនិត្យ ដោះដូរយោបល់នៅវត្តមជ្ឈិមារាមជ្រោយទឹមចាស់ សង្កាត់មីស្វៀង ទីក្រុងកឹងធើ។

នៅក្នុងពេលចុះពិនិត្យជាក់ស្តែង អង្គភាពដែលពាក់ព័ន្ធបានពិភាក្សានិងឯកភាពលើខ្លឹមសារសំខាន់ៗជាច្រើន ពាក់ព័ន្ធនឹងផែនការកម្មវិធី ទម្រង់នៃការរៀបចំសិល្បៈ រយៈពេលសម្តែង និងផែនការធានាសន្តិសុខ សណ្តាប់ធ្នាប់បង្ការនិងពន្លត់អគ្គិភ័យមុន ក្នុងអំឡុងពេលនិងក្រោយព្រឹត្តិការណ៍។

តាមផែនការ កម្មវិធីទូរទស្សន៍ផ្សាយបន្តផ្ទាល់អំណរបុណ្យចូលឆ្នាំថ្មីប្រពៃណី បានជ្រើសរើសចាត់តាំងនៅវត្តទក្ខិណនិកាយខ្មែរ លើភូមិឋានទីក្រុងកឹងធើរៀងរាល់ឆ្នាំ ពិសេសឆ្នាំនេះ គណៈចាត់តាំងបានសម្រេចជ្រើសរើសវត្តមជ្ឈិមារាមជ្រោយទឹមចាស់ ស្ថិតក្នុងសង្កាត់មីស្វៀង ទីក្រុងកឹងធើដើម្បីចាត់តាំង។ ជាមួយនឹងកិត្តិយសដ៏ខ្ពង់ខ្ពស់នោះ វត្តក៏បានត្រៀមលក្ខណៈរៀបចំទុកមុនជាស្រេច។

ព្រះតេជព្រះគុណ ថាច់បេន ព្រះចៅអធិការវត្តមជ្ឈិមារាមជ្រោយទឹមចាស់ សង្កាត់មីស្វៀងទីក្រុងកឹងធើ មានថេរដីកា៖ “ក្នុងឱកាសបុណ្យចូលឆ្នាំថ្មីឆ្នាំនេះ ថ្នាក់ដឹកនាំទីក្រុងកឹងធើ ក៏បានចាត់តាំងកម្មវិធីទូរទស្សន៍ផ្សាយបន្តផ្ទាល់ ដើម្បីបម្រើដល់ទស្សនិកជននិងមាមីងពុទ្ធបរិស័ទនៅថ្ងៃទី ១៥ ខែមេសានេះ។ វត្តពិតជាមានក្តីរីករាយនិងមានកិត្តិយសណាស់ដែលបានរដ្ឋយកចិត្តទុកដាក់ចំពោះជនរួមជាតិខ្មែរយើង ដោយមានការជូនអំណោយ ប្រគល់ផ្ទះនិងកង់ជូនដល់សិស្សានុសិស្ស...។ រហូតមកដល់ពេលនេះ វត្តក៏បានចាត់ចែងរៀបចំអនាម័យនិងតុបតែងលម្អស្អាតបាត ដើម្បីស្វាគមន៍និងថ្លែងអំណរគុណដល់រដ្ឋអំណាចដែលបានជ្រើសរើសវត្តជាកន្លែងចាត់តាំងកម្មវិធី”។

ថ្លែងការណ៍ក្នុងពេលចុះពិនិត្យ លោកឡឹមហ្វាងម៉ូវ នាយកមន្ទីរជនជាតិនិងសាសនា សង្កត់ធ្ងន់៖ “កម្មវិធីទូរទស្សន៍ផ្សាយបន្តផ្ទាល់អំណរបុណ្យចូលឆ្នាំថ្មី ឆ្នាំ២០២៦ គឺជាកម្មវិធីដ៏មានអត្ថន័យនយោបាយ - សង្គមយ៉ាងជ្រាលជ្រៅ មិនត្រឹមតែបង្កបរិយាកាសសប្បាយរីករាយជូនដល់បងប្អូនជនរួមជាតិខ្មែរ ក្នុងការទទួលអំណរឆ្នាំថ្មីប៉ុណ្ណោះទេ ថែមទាំងរួមចំណែកក្នុងការអភិរក្សនិងពង្រីកតម្លៃវប្បធម៌ប្រពៃណីដ៏ផូរផង់របស់ជនជាតិទៀតផង”។

កម្មវិធីទូរទស្សន៍ផ្សាយបន្តផ្ទាល់នឹងចាក់ផ្សាយនៅវេលាម៉ោង ៨:០០ ដល់ ៩:៣០ ព្រឹកថ្ងៃទី ១៥ ខែមេសា ឆ្នាំ២០២៦ នៅប៉ុស្តិ៍ទូរទស្សន៍កឹងធើ១ និងប៉ុស្តិ៍ទូរទស្សន៍កឹងធើ៣ ជាមួយនឹងឈុតសម្តែងសិល្បៈពិសេសៗជាច្រើន ពោរពេញទៅដោយអត្តសញ្ញាណវប្បធម៌ជនជាតិ ព្រមជាមួយនោះ នឹងធ្វើការជូនអំណោយដ៏មានអត្ថន័យដល់គ្រួសារដែលជួបការលំបាកខាងលំនៅឋាន និងសិស្សក្រីក្រដែលសង្វាតរៀនសូត្រលើភូមិឋាន៕

អត្ថបទនិងរូបថត៖ ថាញ់ហ៊ុង-ដាលីន

ចែករំលែកអត្ថបទ

ពាក្យគន្លឹះ