វប្បធម៌-សិល្បៈ វប្បធម៌

17/03/2025 - 15:06

ព្រួតដៃអភិរក្សវប្បធម៌របស់ជនជាតិ

ទន្ទឹមនឹងការយកចិត្តទុកដាក់វិនិយោគរបស់រដ្ឋ នៅតាមបណ្ដាវត្តខ្មែរ ពិសេសគឺព្រះសង្ឃក្នុងខេត្ត បានរួមចំណែកយ៉ាងធំធេងក្នុងការអភិរក្សនិងពង្រីកតម្លៃវប្បធម៌ប្រពៃណី។

បង្ហាត់រាំដល់កូនចៅជនរួមជាតិខ្មែរនៅវត្តបឹងក្រចាប់ថ្មី។

ឆ្នាំ២០២៤ អនុវត្តគម្រោង “អភិរក្សនិងពង្រីកតម្លៃវប្បធម៌ប្រពៃណីដ៏ល្អរបស់ជនជាតិភាគតិច ផ្សារភ្ជាប់នឹងការអភិវឌ្ឍទេសចរណ៍” ខេត្តសុកត្រាំង បានវិនិយោគជាង ២១ ពាន់លានដុង ដើម្បីឧបត្ថម្ភថវិកាដល់សិប្បករក្នុងការរក្សា ផ្សព្វផ្សាយអំពីរបៀបសកម្មភាពវប្បធម៌ ប្រពៃណី និងបណ្ដុះបណ្ដាល បំពាក់បំប៉ន បង្ហាត់ បង្រៀនដល់អ្នកស្នងបន្ត; ឧបត្ថម្ភក្រុមសិល្បៈប្រពៃណី៣០ក្រុម រួមមាន៖ ភ្លេងពិណពាទ្យ ១៦ វង់ គ្រឿងបំពងសំឡេង ១០ គ្រឿង សម្លៀកបំពាក់និងគ្រឿងអលង្ការ ៤៤២ ឈុត។ល។ ឆ្លងតាមរយៈនោះ បានរួមចំណែកយ៉ាងធំធេងក្នុងការអភិរក្សនិងពង្រីកតម្លៃវប្បធម៌ប្រពៃណីជនជាតិលើភូមិសាស្រ្តខេត្ត។

ព្រះតេជព្រះគុណថាច់ធឿន ព្រះចៅអធិការវត្តបឹងក្រចាប់ថ្មី ឃុំតឹងហឹង ស្រុកឡុងភូ មានថេរដីកា៖ “ជាច្រើនឆ្នាំមកនេះ ក្រុមទូក-ង ភ្លេងពិណពាទ្យ ក្រុមសិល្បៈ និងសម្លៀកបំពាក់ខ្មែរ ដែលរដ្ឋឧបត្ថម្ភដល់ក្រុមគឺត្រូវបានរក្សាទុកដាក់ក្នុងវត្ត។ រៀងរាល់ឆ្នាំ អាត្មាភាពតែងអញ្ជើញគ្រូមកបង្ហាត់ភ្លេង របាំជូនដល់កូនចៅជនរួមជាតិ ខ្មែរក្នុងចំណុះជើងវត្ត។ គោលបំណងគឺអភិរក្សវប្បធម៌ប្រពៃណីដ៏ល្អប្រសើររបស់ជនជាតិ”។

ក្រុមសិល្បៈវត្តបឹងក្រចាប់ថ្មី សម្តែងបម្រើទស្សនិកជនក្នុងឱកាសបុណ្យទានក្នុងវត្ត។

ទន្ទឹមនឹងនោះ នៅតាមវត្តខ្មែរក៏ជាកន្លែងបើកបង្រៀនអក្សរខ្មែរជូនកូនចៅជនរួមជាតិខ្មែរក្នុងឱកាសវិស្សមកាលផងដែរ សំដៅរួមចំណែកក្នុងការថែរក្សាភាសា អក្សរសាស្រ្តរបស់ជនជាតិ។ ព្រះឧបជ្ឈាយ៍ ថាច់សុង ព្រះចៅអធិការវត្តសិរីជុំបឹងទន្សា ឃុំវៀងអាង ស្រុកត្រឹងដេ មានថេរដីកា៖ “តាំងពីដើមមក វត្តមិនត្រឹមតែជាកន្លែងសម្រាប់ព្រះសង្ឃបួសរៀននោះទេ ថែមទាំងជាសាលារៀនទីពីរសម្រាប់កូនចៅពុទ្ធបរិស័ទខ្មែរមកសិក្សាទៀតផង។ ដ្បិតអី ក្នុងឱកាសវិស្សមកាលរៀងរាល់ឆ្នាំ វត្តតែងបើកបង្រៀនអក្សរខ្មែរ ដើម្បីព្រះសង្ឃនិងកូនចៅពុទ្ធបរិស័ទរៀនសូត្រ។ ដោយការបួសរៀននៅវត្ត មានកម្មាភិបាល បុគ្គលិក អ្នករដ្ឋការជាច្រើនក៏ចេះអក្សរខ្មែរជ្រៅជ្រះ សព្វថ្ងៃកំពុងបម្រើការងារនៅតាមស្ថាប័នរដ្ឋ ទាំងនៅក្នុងនិងក្រៅខេត្ត។ ចំពោះអាចារ្យបង្រៀនក្នុងវត្តនេះទៀតសោត ក៏ជាអ្នកធ្លាប់បួសរៀនច្រើនវស្សា ដូច្នោះ ធានាថាការរៀនត្រឹមតែពីរបីខែវិស្សមកាល ប្អូនៗច្បាស់ជាចេះអាន ចេះសរសេរអក្សរខ្មែរពុំខានឡើយ”។

តាមប្រសាសន៍លោកឡឹមហ្វាងម៉ូវ ប្រធានមន្ទីរជនជាតិនិងសាសនាខេត្តសុកត្រាំង ឆ្នាំ ២០២៤

លើភូមិសាស្រ្តខេត្តសុកត្រាំង មានវត្តខ្មែរចំនួន ៨៦ វត្ត បានរៀបចំបង្រៀនអក្សរខ្មែរដល់កូនចៅជនរួមខ្មែរចំនួន ៣០.៥០០ នាក់ ដោយមានព្រះសង្ឃនិងអាចារ្យបង្រៀនចំនួន ១.២៥៨ អង្គនិងរូប។ ប្រការនេះបញ្ជាក់ថា វត្តខ្មែរមិនត្រឹមតែជាកន្លែងរក្សាវប្បធម៌ប្រពៃណីជនជាតិប៉ុណ្ណោះទេ ថែមទាំងជាកន្លែងអភិរក្សនិងពង្រីកភាសា អក្សរសាស្រ្តខ្មែរទៀតផង ហើយព្រះសង្ឃជាកត្តាសំខាន់ក្នុងការប្រមូលផ្ដុំ រក្សាសហគមន៍ឱ្យមានភាពសាមគ្គីនិងអភិវឌ្ឍន៍ផងដែរ៕

យ្វីអាញ - ថាច់ធី

ចែករំលែកអត្ថបទ

ពាក្យគន្លឹះ