សន្តិសុខ - ការពារប្រទេស ការពារប្រទេស

23/12/2024 - 15:04

បង្កើតស្មារតីភ្ញាក់រលឹកអំពីសុវត្ថិភាពចរាចរណ៍សម្រាប់សិស្សានុសិស្ស

ដើម្បីបង្កើតស្មារតីភ្ញាក់រលឹកអំពីសុវត្ថិភាពចរាចរណ៍សម្រាប់សិស្សានុសិស្ស មន្ទីរអប់រំនិងបណ្តុះបណ្តាលក្រុងកឹងធើ ទើបសហការជាមួយគណៈកម្មការសុវត្ថិភាពចរាចរណ៍ក្រុងអនុវត្តកម្មវិធី “រក្សា ក្តីសុបិន” “ខ្ញុំស្រឡាញ់វៀតណាម” របស់គណៈកម្មាធិការជាតិសុវត្ថិភាពចរាចរណ៍នៅតាមសាលាមត្តេយ្យសិក្សា និងសាលាចំណេះទូទៅលើភូមិសាស្ត្រក្រុង។

ក្មួយៗសាលាមត្តេយ្យទីប្រជុំជនផុងដៀង បានសិក្សាអំពីសុវត្ថិភាពចរាចរណ៍ពេល
ចូលរួមបធានបទ “កុមារមត្តេយ្យជាមួយសុវត្ថិភាពចរាចរណ៍”។

នៅសាលាមត្តេយ្យទីប្រជុំជនផុងដៀង ស្រុកផុងដៀង គណៈកម្មការសុវត្ថិភាពចរាចរណ៍ក្រុងកឹងធើ ទើបសហការរៀបចំបធានបទអំពីសុវត្ថិភាពចរាចរណ៍សម្រាប់កុមារមត្តេយ្យសិក្សា។ ដោយមានអាណាព្យាបាលសិស្ស និងកុមារមត្តេយ្យរាប់រយនាក់បានចូលរួម។ នៅទីនេះ កុមារត្រូវបានផ្សព្វផ្សាយនិងណែនាំឱ្យស្គាល់ស្លាកសញ្ញាចរាចរណ៍ផ្លូវគោកមួយចំនួន របៀបពាក់អាវពោងប្រើប្រាស់ឧបករណ៍បណ្តែតជំនួយសង្គ្រោះជីវិត។ល។ មិនត្រឹមតែបង្រៀនកុមារអំពីសុវត្ថិភាពចរាចរណ៍ប៉ុណ្ណោះទេ កម្មវិធីនេះនៅទាំងណែនាំអាណាព្យាបាលសិស្សពីរបៀបជ្រើសរើសទិញនិងពាក់មួកសុវត្ថិភាពបានត្រឹមត្រូវទៀតផង។ ពិសេស គឺណែនាំពីឥរិយាបថអង្គុយម៉ូតូសុវត្ថិភាព។ល។ អ្នកស្រី លីធីធ្វីតៀង នៅភូមិញើងថ ១ ឃុំញើងអាយ ស្រុកផុងដៀង បានឱ្យដឹង៖ “កាលពីមុន ឱ្យតែឃើញ មួកសុវត្ថិភាពណាដែលស្អាត ឬមានម៉ូដល្អៗគឺ ខ្ញុំទិញសម្រាប់ខ្លួននិងឱ្យកូន។ បន្ទាប់ពីបានចូលរួមកម្មវិធីនេះ ទើបខ្ញុំបានដឹងថា យើងមិនត្រឹមតែពាក់មួកសុវត្ថិភាពនឹងគេនោះទេ គឺត្រូវពាក់យ៉ាងណាឱ្យបានត្រឹមត្រូវដើម្បីការពារដល់ខ្លួនយើងម្នាក់ៗ។ ចំណែកបងស្រី ត្រឹងធ្វីហ្វិញ នៅទីប្រជុំជនផុងដៀង បានរៀបរាប់ឱ្យដឹង៖ “រាល់ពេលបើកម៉ូតូមកដល់ភ្លើងសញ្ញាចរាចរណ៍ កូនស្រីតែងរំលឹកថា “ភ្លើងក្រហម យើងត្រូវឈប់” ព្រោះកូនបានឮលោកពូអ្នកមីងក្នុងកម្មវិធីផ្សព្វផ្សាយ។ ខ្ញុំយល់ឃើញថា កម្មវិធីនេះគឺចាំបាច់ណាស់ ព្រោះក្មួយៗនៅតូច ពេលបង្កើតបានស្មារតីភ្ញាក់រលឹកអំពីសុវត្ថិភាពចរាចរណ៍ ក្មួយៗនឹងបានយល់ដឹង ហើយចងចាំ”។

យោងតាមប្រសាសន៍លោក ង្វៀងភុកតាំង នាយករងមន្ទីអប់រំនិងបណ្តុះបណ្តាលក្រុងកឹងធើ ផ្សព្វផ្សាយបធានបទសុវត្ថិភាពចរាចរណ៍សំដៅលើកកម្ពស់ប្រសិទ្ធភាព គុណភាពនៃការឃោសនានិងអប់រំចំណេះដឹងផ្នែកច្បាប់អំពីសុវត្ថិភាពចរាចរណ៍។ នៅកម្រិតសិក្សានីមួយៗ យើងខ្ញុំបានសហការកសាងខ្លឹមសារសមស្របទៅតាមកម្រិតអាយុ ដើម្បីឱ្យកុមារងាយយល់និងចងចាំបានយូរ។ ចាប់តាំងពីការចូលរួមចរាចរណ៍ត្រូវតែធ្វើដំណើរចំណែកផ្លូវខាងស្តាំដៃ។ ពេលអង្គុយម៉ូតូ ឬយានយន្តត្រូវពាក់មួកសុវត្ថិភាពតាមបទប្បញ្ញត្តិ និងខ្ទាស់ខ្សែឱ្យបានត្រឹមត្រូវ។ល។ បធានបទនេះនៅទាំងឆ្ពោះទៅរកការលើកកម្ពស់ចំណេះដឹង និងស្មារតីគោរពច្បាប់អំពីសុវត្ថិភាពចរាចរណ៍ សម្រាប់អាណាព្យាបាលសិស្ស ដើម្បីអាណាព្យាបាលសិស្សរួមជាមួយសាលារៀន បំប៉នបំណិនចូលរួមចរាចរណ៍ឱ្យមានសុវត្ថិភាព រួមចំណែកឆាប់បង្កើតបានស្មារតីគោរពច្បាប់ចរាចរណ៍ សម្រាប់កុមារមត្តេយ្យសិក្សា និងសិស្សសាលាចំណេះទូទៅ៕

ហាថាញ - បកប្រែ៖ សុផន

ចែករំលែកអត្ថបទ

ពាក្យគន្លឹះ