សុខភាព - អប់រំ អប់រំ

05/03/2026 - 09:44

ទីក្រុងកឹងធើ ជំរុញការផ្លាស់ប្តូរឌីជីថលលើកកម្ពស់គុណភាពអប់រំ

ឆ្នាំសិក្សាកន្លង ផ្នែកអប់រំទីក្រុងកឹងធើ បានជំរុញយ៉ាងខ្លាំងនូវការផ្លាស់ប្តូរឌីជីថល អនុវត្តបច្ចេកវិទ្យាព័ត៌មាននិងបញ្ញាសិប្បនិម្មិត (AI) ក្នុងការគ្រប់គ្រងនិងបង្រៀន រួមចំណែកលើកកម្ពស់គុណភាពអប់រំ។

ជំរុញយ៉ាងខ្លាំងការផ្លាស់ប្តូរឌីជីថល លើកកម្ពស់គុណភាពអប់រំ។

រយៈពេលកន្លង ការងារផ្លាស់ប្តូរឌីជីថលក្នុងវិស័យអប់រំនៅទីក្រុងកឹងធើមានការវិវឌ្ឍន៍លើវិស័យចំនួនបីគឺ៖ ការគ្រប់គ្រង បង្រៀននិងរៀន។ កម្រិតមត្តេយ្យនិងបឋមសិក្សា បណ្តាមូលដ្ឋានអប់រំទាំងអស់បានអនុវត្តបច្ចេកវិទ្យាព័ត៌មានក្នុងការគ្រប់គ្រង រៀបចំផែនការនិងរចនា គម្រោងមេរៀនបង្រៀនអេឡិចត្រូនិក។ កម្រិតវិទ្យាល័យ រចនាសម្ព័ន្ធបច្ចេកវិទ្យាបានវិនិយោគព្រមៗគ្នា។ សាលារៀនទាំង ១០០% បានភ្ជាប់បណ្តាញអ៊ីនធឺណិតល្បឿនលឿន អង្គភាពជាច្រើនបានសាងសង់បន្ទប់រៀនទំនើបនិងឃ្លាំងទិន្នន័យសិក្សាអនឡាញ។ ប្រការគួរឱ្យកត់សម្គាល់គឺសិស្សអនុវិទ្យាល័យនិងវិទ្យាល័យ ១០០% មានលក្ខណៈគ្រប់គ្រាន់ក្នុងការចូលរួមសិក្សាតាមអនឡាញនិងបង្កើតបាននូវបំណិនសិក្សាក្នុងបរិស្ថានឌីជីថល។

ក្នុងវិស័យគ្រប់គ្រង ផ្នែកអប់រំទាំងមូលតែងផ្សព្វផ្សាយប្រព័ន្ធគ្រប់គ្រងទិន្នន័យនិងសំណុំឯកសារឌីជីថលនៅគ្រប់មូលដ្ឋានអប់រំទាំង ១០០%។ មជ្ឈមណ្ឌលប្រតិបត្តិការអប់រំឆ្លាតវៃ (IOC) បានដាក់ឱ្យដំណើរការដើម្បីជំនួយការងារចង្អុលការ ចាត់ចែងនិងត្រួតពិនិត្យ។ របៀបគ្រប់គ្រង ស្ថិតិនិងរបាយការណ៍បានអនុវត្តកាន់តែឆាប់រហ័ស កាត់បន្ថយសម្ពាធការងាររដ្ឋបាលដល់សាលា។

នៅសាលាអនុវិទ្យាល័យនិងវិទ្យាល័យជនជាតិអន្តេវាសិកថាញ់ភូ (ឃុំញូយ៉ា) ការផ្លាស់ប្តូរឌីជីថលបានផ្សព្វផ្សាយស្របតាមលក្ខណៈជាក់ស្តែង។ សាលាបានប្រមូលផ្តុំលើការអភិវឌ្ឍរចនាសម្ព័ន្ធឌីជីថល កសាងមូលដ្ឋានទិន្នន័យរួម ឌីជីថលសិក្ខាគារិកនិងឯកសារបង្រៀន ព្រមទាំងការអនុវត្តបញ្ញាសិប្បនិម្មិត (AI) ក្នុងការបង្រៀន និងការត្រួតពិនិត្យ វាយតម្លៃ។ គ្រូបង្រៀនទាំង ១០០% បានលើកទឹកចិត្តឱ្យប្រើប្រាស់ប្រព័ន្ធគ្រប់គ្រងការសិក្សាតាមអ៊ីនធឺណិត វិញ្ញាសាប្រឡងជាច្រើនបានអនុវត្តនៅលើបរិស្ថានឌីជីថល។

លោកគ្រូយឿងសាផន ចាងហ្វាងសាលា ឱ្យដឹង៖ “សាលាកំណត់ថា ការផ្លាស់ប្តូរឌីជីថល គឺជាដំណោះស្រាយដ៏សំខាន់ដើម្បីលើកកម្ពស់គុណភាពអប់រំ ពិសេសគឺសម្រាប់សិស្សជនជាតិអន្តេវាសិក។ យើងខ្ញុំប្រមូលផ្តុំលើការលើកកម្ពស់សមត្ថភាពឌីជីថលសម្រាប់គ្រូបង្រៀន ណែនាំសិស្សឱ្យប្រើប្រាស់បច្ចេកវិទ្យាប្រកបដោយប្រសិទ្ធភាពនិងធានាសុវត្ថិភាពក្នុងបរិស្ថានសិក្សាឌីជីថល”។

ទោះជាយ៉ាងណាក៏ដោយ ការអនុវត្តជាក់ស្តែង បង្ហាញថា ការផ្សព្វផ្សាយផ្លាស់ប្តូរឌីជីថលនៅតែមានការលំបាកមួយចំនួន។ យោងតាមមន្ទីរអប់រំ និងបណ្តុះបណ្តាល គម្លាតរវាងតំបន់មជ្ឈមណ្ឌល និងតំបន់ជនបទនៅតែជាបញ្ហាប្រឈមដ៏ធំ។ ហេតុដូច្នេះហើយ ផ្នែកអប់រំចាំបាច់ត្រូវមានផែនការវិនិយោគឱ្យបានសមស្រប ជាជំហានៗធ្វើឱ្យសុក្រឹតរចនាសម្ព័ន្ធបច្ចេកទេសដើម្បីធានាថា គ្រប់មូលដ្ឋានសិក្សាអាចទទួលបាននិងទទួលផលពីសមិទ្ធផលនៃការផ្លាស់ប្តូរឌីជីថល។ ទន្ទឹមនឹងនោះ មន្ទីរអប់រំនិងបណ្តុះបណ្តាល បានពង្រឹងកិច្ចសហប្រតិបត្តិការជាមួយអាជីវកម្មទូរគមនាគមន៍ ដូចជា VNPT និង Viettel ដើម្បីជំនួយហេដ្ឋារចនាសម្ព័ន្ធ កម្មវិធីផ្នែកទន់និងប្រព័ន្ធគ្រប់គ្រង។ ដំណោះស្រាយបច្ចេកវិទ្យាជាច្រើនបានផ្តល់ជូនដោយឥតគិតថ្លៃ ជួយឱ្យសាលារៀន បន្ថយការចំណាយនិងលើកកម្ពស់ប្រសិទ្ធភាពនៃការគ្រប់គ្រងនិងបង្រៀន៕

ហុងទើ-ដាលីន

ចែករំលែកអត្ថបទ

ពាក្យគន្លឹះ