សុខភាព - អប់រំ សុខភាព

26/03/2026 - 06:55

ធានារ៉ាប់រងសុខាភិបាល រួមចំណែកលើកកម្ពស់ប្រសិទ្ធភាពថែទាំសុខភាពនៅមូលដ្ឋាន

គោលនយោបាយធានារ៉ាប់រងសុខាភិបាល កំពុងពង្រីកប្រសិទ្ធភាពយ៉ាងច្បាស់នៅឃុំឡុងភូ ជួយមាមីងបន្ថយបន្ទុកចំណាយ លើការពិនិត្យព្យាបាលជំងឺ ម្ចាស់ការប្រើប្រាស់សេវាសុខាភិបាល និងរួមចំណែកលើកកម្ពស់គុណភាពថែទាំសុខភាពនៅមូលដ្ឋាន។

ប្រជាជនមកពិនិត្យសុខភាពនៅដំណាក់សុខាភិបាលឃុំឡុងភូ។

រយៈពេលកន្លង ដំណាក់សុខាភិបាលឃុំឡុងភូ បន្តរក្សាបានល្អនូវការងារពិនិត្យ និងព្យាបាលជំងឺជំហានដំបូង ព្រមទាំងអនុវត្តបណ្តាកម្មវិធីសុខាភិបាលបម្រុង និងបង្ការទប់ស្កាត់ជំងឺឆ្លងរាលដាលជូនប្រជាជន។ ក្នុងនោះ ការអនុវត្តគោលនយោបាយធានារ៉ាប់រងសុខាភិបាល ពិសេសចំពោះគ្រួសារក្រីក្រ និងគ្រួសារក្បែរក្រក្នុងភូមិឋាន សម្រេចបានលទ្ធផលវិជ្ជមានជាច្រើន។ អាស្រ័យមានប័ណ្ណធានារ៉ាប់រងសុខាភិបាល ប្រជាជនបានទទួលសេវាកម្មសុខាភិបាលងាយស្រួល បន្ថយបន្ទុកលើការចំណាយពិនិត្យព្យាបាលជំងឺ រួមចំណែកលើកកម្ពស់ប្រសិទ្ធភាពថែទាំសុខភាពនៅមូលដ្ឋាន។

យោងតាមស្ថិតិរបស់ភូមិភាគ គ្រួសារក្រីក្រ ១០០% ក្នុងឃុំបានថវិការដ្ឋឧបត្ថម្ភទិញប័ណ្ណធានារ៉ាប់រងសុខាភិបាលតាមសេចក្ដីកំណត់។ ចំពោះគ្រួសារក្បែរក្រ មាមីងក៏ទទួលបានការឧបត្ថម្ភកម្រិតបង់ និងម្ចាស់ការចូលរួមរក្សាប័ណ្ណធានារ៉ាប់រងសុខាភិបាលដែលនៅមានសុពលភាពប្រើប្រាស់។ គោលនយោបាយនេះ បានក្លាយជាទីបង្អែកដ៏សំខាន់ជួយដល់ប្រជាជន ជាពិសេសគឺគ្រួសារមានជីវភាពលំបាក មានការលំនឹងចិត្តខណៈពេលទទួលនូវសេវាសុខាភិបាលនានា។

លោកយាយថាច់ធីញ៉ នៅភូមិតឹងឡឹប ឃុំឡុងភូ ចែករំលែក៖ “អាស្រ័យមានប័ណ្ណធានារ៉ាប់រងសុខាភិបាល ជួយខ្ញុំបន្ថយការព្រួយបារម្ភលើចំណាយថវិកាពេលទៅពិនិត្យជំងឺ។ វ័យចាស់ សុខភាពខ្សោយនិងមានជំងឺច្រើន ការមានប័ណ្ណធានារ៉ាប់រងខ្ញុំមានភាពកក់ក្តៅ អាចទៅពិនិត្យជំងឺបានទាន់ពេល មិនទុកឱ្យឈឺធ្ងន់ទើបទៅមន្ទីរពេទ្យដូចមុនឡើយ”។

លោកត្រឹងហ្វាងត្វង នាយករងដំណាក់សុខាភិបាលឃុំឡុងភូ មានប្រសាសន៍៖ “ធានារ៉ាប់រងសុខាភិបាល នាំមកនូវផលប្រយោជន៍ជាក់ស្តែងជាច្រើនសម្រាប់ប្រជាជននិងប្រព័ន្ធសុខាភិបាលទាំងមូល។ ដំបូង ធានារ៉ាប់រងសុខាភិបាល ជួយបន្ថយបន្ទុកចំណាយលើការពិនិត្យព្យាបាលជំងឺ សំខាន់សម្រាប់គ្រួសារក្រីក្រ គ្រួសារក្បែរក្រ មនុស្សចាស់ និងអ្នកដែលមានជំងឺរុាំរ៉ៃ។ អាស្រ័យបានធានារ៉ាប់រងទូទាត់ប្រាក់ព្យាបាលជំងឺមួយភាគធំ មាមីងមិនបារម្ភខ្លាំងពីថវិកាពេលមានជំងឺ តាមរយៈនោះ បន្ថយស្ថានភាព “ធ្លាក់ខ្លួនក្រីក្រដោយសារជំងឺ””។

បើតាមលោកត្រឹងហ្វាងត្វង បានឱ្យដឹង កាលបើមានប័ណ្ណធានារ៉ាប់រងសុខាភិបាល មាមីងម្ចាស់ការទៅពិនិត្យនិងព្យាបាលជំងឺបានទាន់ពេលនិងទៀងទាត់ជាងមុន។ ការពិនិត្យនិងព្យាបាលជំងឺទាន់ពេលវេលា ជួយរកឃើញជំងឺតាំងពីដំណាក់កាលដំបូង បង្កើនប្រសិទ្ធភាពព្យាបាល បន្ថយផលវិបាក និងសន្សំសំចៃថវិកាក្នុងរយៈពេលវែង។ ទន្ទឹមនឹងនោះ ធានារ៉ាប់រងសុខាភិបាលនៅទាំងបង្កលក្ខណៈងាយស្រួល ដើម្បីមាមីងទទួលបានសេវាសុខាភិបាល ជាមូលដ្ឋាន និងបច្ចេកទេសវេជ្ជសាស្ត្រចាំបាច់តាមសេចក្ដីកំណត់ រួមចំណែកលើកកម្ពស់គុណភាពថែទាំសុខភាពទូទាំងប្រជាជន។

អាចសម្គាល់បានថា ការអនុវត្តប្រកបដោយប្រសិទ្ធភាពនូវគោលនយោបាយធានារ៉ាប់រងសុខាភិបាល បានរួមចំណែកយ៉ាងសំខាន់ ជួយមាមីងនៅឃុំឡុងភូ កាត់បន្ថយបន្ទុកចំណាយលើការពិនិត្យ ព្យាបាលជំងឺ និងម្ចាស់ការប្រើប្រាស់សេវាសុខាភិបាលមូលដ្ឋាន តាមរយៈនោះ ជួយលើកកម្ពស់ប្រសិទ្ធភាពនៃការថែទាំសុខភាពសហគមន៍ និងបង្កើនគុណភាពជីវភាពរបស់ប្រជាជនក្នុងតំបន់ឱ្យកាន់តែប្រសើរឡើងជាលំដាប់៕

ហុងទើ - ថាច់ធី

ចែករំលែកអត្ថបទ

ពាក្យគន្លឹះ