សុខភាព - អប់រំ អប់រំ

15/01/2026 - 06:37

អប់រំប្រពៃណីស្នេហាជាតិដល់សិស្សនៅតំបន់ជនជាតិភាគតិច

ដើម្បីអប់រំប្រពៃណីស្នេហាជាតិ និងការដឹងគុណចំពោះបុព្វបុរសគ្រប់ជំនាន់ សម្ព័ន្ធយុវជននិងសមាគមមិត្តរួមកងគ្រប់លំដាប់ថ្នាក់លើភូមិឋានទីក្រុងកឹងធើ បានចាត់តាំងនូវ សកម្មភាពផ្សព្វផ្សាយប្រវត្តិសាស្ត្រដល់សិស្ស រួមចំណែកបំផុសមោទនភាពជាតិ ពិសេស គឺដល់សិស្សនៅតំបន់ជនជាតិភាគតិច។

សហសមាគមសាលាអនុវិទ្យាល័យជនជាតិអន្តេវាសិកត្រឹងដេ ចាត់តាំងផ្សព្វផ្សាយ ខ្លឹមសារខួបអនុស្សាវរីយ៍ ៨១ ឆ្នាំ ទិវាបង្កើតកងទ័ពប្រជាជនវៀតណាមដល់សិស្ស។

នៅឃុំតាយវុាំង សម្ព័ន្ធយុវជនបានសហការជាមួយសមាគមអតីត យុទ្ធជន ចាត់តាំងសកម្មភាពក្រោមប្រធានបទ “យាយតានិទានឱ្យចៅស្តាប់” នៅអនុវិទ្យាល័យតាយវុាំងនិងអនុវិទ្យាល័យវៀងអាង។ តាមរយៈរឿងរ៉ាវប្រវត្តិសាស្ត្រ រូបភាពឯកសារ និងខ្លឹមសារផ្សព្វផ្សាយជួយឱ្យសិស្សយល់កាន់តែច្បាស់អំពីប្រពៃណីតស៊ូបដិវត្តន៍ដ៏រុងរឿងរបស់ប្រទេសជាតិ អំពីការពលីកម្មដ៏ធំធេងរបស់បុព្វបុរសជំនាន់មុន ដើម្បីដណ្តើមឯករាជ្យ និងសេរីភាពជូនមាតុភូមិ។

សកម្មភាពនេះ ជួយឱ្យសិស្សកៀកជិតនឹងប្រវត្តិសាស្ត្រយ៉ាងរស់រវើក ងាយយល់ ទន្ទឹមនឹងនោះ បំផុសមោទនភាពជាតិ លើកកម្ពស់ស្មារតីទទួលខុសត្រូវក្នុងការរៀនសូត្រ លត់ដំ ពិសេសគឺសិស្សនៅតំបន់ជនជាតិភាគតិច។

ចំណែកនៅឃុំលិតហោយធឿង សមាគមមិត្តរួមកងឃុំ សហការជាមួយសហសមាគមសាលាអនុវិទ្យាល័យជនជាតិអន្តេវាសិកត្រឹងដេ ចាត់តាំងផ្សព្វផ្សាយអំពីខ្លឹមសារនៃខួបអនុស្សាវរីយ៍ ៨១ ឆ្នាំ ទិវាបង្កើតកងទ័ពប្រជាជនវៀតណាមដល់សិស្ស។ ខ្លឹមសារផ្សព្វផ្សាយផ្ដោតលើការធ្វើឱ្យច្បាស់នូវតួនាទី ប្រពៃណីវីរភាពរបស់កងទ័ពប្រជាជនវៀតណាមក្នុងបុព្វហេតុរំដោះជាតិ កសាងនិងការពារមាតុភូមិ ឆ្លងតាមរយៈនោះ អប់រំប្អូនៗអំពីការដឹងគុណ បណ្តុះគុណធម៌ “ផឹកទឹកនឹកប្រភព”។

ប្អូនថាច់ធីណាត្រា សិស្សអនុវិទ្យាល័យ ជនជាតិអន្តេវាសិកត្រឹងដេ ឱ្យដឹង៖ “ឆ្លងតាមរយៈការផ្សព្វផ្សាយនេះ ប្អូនយល់បន្ថែមអំពីរឿងរ៉ាវជាច្រើនរបស់ពូៗកងទ័ព អ៊ំហូ អំពីការពលីកម្មរបស់បុព្វបុរសយើង។ ប្រការនោះ ជួយឱ្យប្អូនស្រឡាញ់ស្រុកកំណើត ស្រឡាញ់ប្រទេសជាតិកាន់តែខ្លាំង និងខិតខំប្រឹងប្រែងរៀនសូត្រឱ្យបានល្អជាងទៀត ដើម្បីអនាគតក្លាយជាអ្នកមានប្រយោជន៍សម្រាប់សង្គម។

លោកលីវមិញយ៉ាវ អនុប្រធានគណៈកម្មាធិការរណសិរ្សមាតុភូមិវៀតណាមឃុំលិតហោយធឿង និងជាលេខាសម្ព័ន្ធយុវជនឃុំលិតហោយធឿង ឱ្យដឹង៖ “ការអប់រំប្រពៃណីស្នេហាជាតិដល់សិស្ស ពិសេស គឺសិស្សនៅតំបន់ជនជាតិភាគតិច គប្បីបានអនុវត្តជាប្រចាំ តាមរយៈសកម្មភាពជាក់ស្តែងនិងជិតដិត។ តាមរយៈនោះ ជួយឱ្យប្អូនៗយល់ពីប្រវត្តិសាស្រ្តជាតិ គោរពឱ្យតម្លៃសន្តិភាព និងមានស្មារតីតស៊ូ លត់ដំ ដើម្បីកសាងភូមិស្រុកកាន់តែរីកចម្រើនពីមួយថ្ងៃទៅមួយថ្ងៃ៕

វឌ្ឍា-វិមាន

ចែករំលែកអត្ថបទ

ពាក្យគន្លឹះ