វប្បធម៌-សិល្បៈ វប្បធម៌

04/10/2021 - 07:20

ប្រារព្ធបុណ្យសែនដូនតាដោយសុវត្ថិភាពក្នុងអំឡុងពេលជំងឺ COVID-១៩

ខេត្តសុកត្រាំង បានបង្កលក្ខណៈងាយស្រួលដល់ជនរួមជាតិខ្មែរ ប្រារព្ធពិធីបុណ្យសែនដូនតា ក្នុងភាពសប្បាយរីករាយ និងសុវត្ថិភាព។

មាមីងខ្មែរយកចង្ហាន់ប្រគេនព្រះសង្ឃនៅវត្តឃ្លាំង ក្រុងសុកត្រាំង ក្នុងឱកាសបុណ្យសែនដូនតា។(រូបថតមុនពេលមានជំងឺ COVID-១៩)

លោកឡឹមសិទ្ធ ប្រធានគណៈជនជាតិខេត្តសុកត្រាំង ឱ្យដឹង៖ “ដើម្បីធានាអនុវត្តមានប្រសិទ្ធភាពការងារបង្ការ ប្រឆាំងជំងឺ COVID-១៩ គណៈជនជាតិ បានសហការជាមួយនឹងសមាគមព្រះសង្ឃសាមគ្គីស្នេហាជាតិខេត្ត ចេញនូវឯកសារឃោសនា ចលនាដល់មាមីងខ្មែរ ប្រារព្ធពិធីបុណ្យសែនដូនតាតាមប្រពៃណីផង ហើយធានាដល់ការងារបង្ការប្រឆាំងជំងឺ COVID-១៩ ផង។ ពិសេស គឺចលនាមាមីងប្រារព្ធពិធីបុណ្យសែនដូនតា ដូចជានៅថ្ងៃភ្ជុំបិណ្ឌ និងថ្ងៃជូនដូនតា ដោយទ្រង់ទ្រាយតូច សំខាន់គឺធ្វើនៅផ្ទះ កាត់បន្ថយការប្រមូលផ្ដុំគ្នាច្រើននៅវត្ត”។

មាមីងខ្មែរនិយមវេចនំអន្សមជ្រូកក្នុងឱកាសបុណ្យសែនដូនតា។ (រូបថត មុនពេលមានជំងឺ COVID-១៩)

សមាគមព្រះសង្ឃសាមគ្គីស្នេហាជាតិខេត្តសុកត្រាំង បានផ្ញើសារលិខិតស្ដីពីការបង្កើនការអនុវត្តវិធានការបង្ការប្រឆាំងជំងឺ COVID-១៩ ដល់វត្តខ្មែរទាំងអស់ក្នុងខេត្ត។ ឆ្លងតាមរយៈនោះ ព្រះចៅអធិការគណៈកម្មការវត្ត និងអ្នកមានប្រជាប្រិយក្នុងជនរួមជាតិខ្មែរ ជំរុញការផ្សព្វផ្សាយ ដើម្បីមាមីងខ្មែរលើកកម្ពស់ស្មារតី គោរពយ៉ាងម៉ឺងម៉ាត់នូវវិធានការបង្ការ ប្រឆាំងជំងឺរាតត្បាតរបស់ភូមិភាគ និងអនុវត្តយ៉ាងម៉ឺងម៉ាត់សារ ៥K។ បងស្រីលីធីធូហៀង នៅសង្កាត់ ១០ ក្រុងសុកត្រាំង ឱ្យដឹង៖ “ខ្ញុំយល់ច្បាស់ពីកម្រិតគ្រោះថ្នាក់នៃជំងឺ COVID-១៩ ម្ល៉ោះហើយ អនុវត្តម៉ឺងម៉ាត់នូវវិធានការបង្ការ ប្រឆាំងជំងឺរាតត្បាតតាមសេចក្ដីកំណត់។ បុណ្យសែនដូនតាឆ្នាំនេះ ខ្ញុំវេចនំដូចសព្វដង និងរៀបចំបាយស្ពកសែនដល់ដូនតាតាមប្រពៃណី។ ពិតមែន តែខ្ញុំមិនទៅវត្តបោះបាយបិណ្ឌ តែខ្ញុំបានរៀបចំបាយបិណ្ឌផ្ញើមេវេនយកទៅបោះនៅវត្ត។ ទន្ទឹមនឹងនោះ ក៏រៀបចំម្ហូបអាហារផ្ញើមេវេនយកទៅប្រគេនព្រះសង្ឃក្នុងថ្ងៃភ្ជុំ”។

ព្រះឧបជ្ឈាយ៍ តាំងណោ ប្រធានគណៈអភិបាលពុទ្ធសាសនាវៀតណាមខេត្ត អនុប្រធានសមាគមព្រះសង្ឃសាមគ្គីស្នេហាជាតិខេត្តសុកត្រាំង មានថេរដីកា៖ “ទំនៀមទម្លាប់ក្នុងឱកាសបុណ្យសែនដូនតា តែងបានវត្តអារាមនិងមាមីងពុទ្ធបរិស័ទប្រារព្ធធ្វើជាធម្មតា ប៉ុន្តែ ដោយទ្រង់ទ្រាយតូច។ ការយកចង្ហាន់ទៅវត្ត ប្រគេនព្រះសង្ឃក៏ចែកជាក្រុមវេន ដើម្បីកាត់បន្ថយការប្រមូលផ្ដុំគ្នាច្រើន។ ចំពោះការបោះបាយបិណ្ឌវិញ ក៏បានធ្វើឡើងតាមការរៀបចំរបស់មេវេនដែរ។ យោងទៅតាមការរៀបចំរបស់វត្តនីមួយៗ គឺមាមីងពុទ្ធបរិស័ទ ប្រារព្ធពិធីបុណ្យសែនដូនតាតាមទំនៀមទម្លាប់ផង និងអនុវត្តយ៉ាងម៉ឺងម៉ាត់នូវការងារបង្ការ ប្រឆាំងជំងឺ COVID-១៩ ផង មិនជួបជុំគ្នាច្រើន ដើម្បីការពារសុខភាពខ្លួនឯង គ្រួសារ និងសហគមន៍៕

លីធាន-ពេជ្រសឿន

ចែករំលែកអត្ថបទ

ពាក្យគន្លឹះ