ចេញពីចំណង់ចំណូលចិត្ត និងសេចក្តីស្រឡាញ់ចំពោះទឹកដមសម្លេង ចង្វាក់រាំ និងល្ខោនប្រពៃណីរបស់ជនរួមជាតិខ្មែរ យុវតី ស៊ើង ធីយីវ នៅភូមិភឿកធ្វឹង ឃុំធ្វឹងហ្វា ទីក្រុងកឹងធើ បានខិតខំប្រឹងប្រែងរៀនសូត្រ និងហ្វឹកហាត់ដើម្បីក្លាយជាស្នូលក្នុងចលនាវប្បធម៌ សិល្បៈរបស់ភូមិភាគ។ មិនត្រឹមតែសម្រេចបានស្នាដៃខ្ពស់ៗ ជាច្រើននៅក្នុងការប្រឡងមហោស្រព និងក្នុងសមោសរប៉ុណ្ណោះទេ បងស្រី នៅទាំងបានបង្កើតក្លឹបវប្បធម៌សិល្បៈ ដើម្បីផ្ទេរបន្តដល់យុវជនជំនាន់ក្រោយ រួមចំណែកថែរក្សា និងសាយភាយនូវតម្លៃវប្បធម៌ប្រពៃណីរបស់ជនជាតិទៀតផង។
បងស្រី ស៊ើង ធីយីវ ណែនាំសមាជិកក្បាច់រាំ។
កើតនិងធំដឹងក្តីក្នុងគ្រួសារកសិករ តាំងពីតូចបងស្រី យីវ តែងបានឪពុកម្តាយនាំទៅមើលល្ខោននៅតាមវត្តអារាម និងភូមិស្រុក ដូច្នេះទើបមានចំណង់ចំណូលចិត្ត។ ផ្ដើមពីចិត្តស្រឡាញ់នោះ ពេលត្រឡប់មកផ្ទះ បងស្រី យីវ តែងតែស្វ័យហ្វឹកហាត់ និងសម្តែងជូនឪពុកម្តាយមើល ហើយនៅពេលវត្តព្រះបួនព្រះភ័ក្ត្រ មានចាត់តាំងកម្មវិធីវប្បធម៌សិល្បៈ បងស្រីក៏ចូលរួមច្រៀង និងរាំ។ បងស្រី យីវ បានរំលឹកឱ្យដឹង៖ “កាលនៅជាសិស្ស ខ្ញុំបានចូលរួមយ៉ាងសកម្មក្នុងក្រុមសិល្បៈរបស់សាលា និងចំណាយពេលជាច្រើនដើម្បីស្វ័យសម្តែង រៀនច្រៀង និងរៀនរាំតាមទូរទស្សន៍។ ហើយនៅពេលធំដឹងក្តី ខ្ញុំកាន់តែស្រឡាញ់តម្លៃវប្បធម៌ សិល្បៈ ម្ល៉ោះហើយខ្ញុំតែងចិញ្ចឹមក្តីស្រមៃចង់បានសម្តែងនៅលើឆាក”។ ចេញពីទឹកចិត្តស្រឡាញ់ ក្រៅពីការស្វ័យសិក្សា បងស្រីក៏ស្វែងរកជួបសិល្បករ សិល្បការិនីក្នុងក្រុមសិល្បៈខ្មែររបស់ទីក្រុង ដើម្បីរៀនរាំ និងច្រៀង។ ឆ្នាំ ២០១៨ បងស្រី ក៏បានប្រមូលប្អូនៗជាច្រើនដែលមានចិត្តស្រឡាញ់វប្បធម៌ សិល្បៈ ដើម្បីបង្កើតក្លឹបវប្បធម៌សិល្បៈវត្តព្រះបួនព្រះភ័ក្ត្រ ក្លឹបមានសមាជិកចំនួន ៣៥ រូប ដោយបងស្រីធ្វើជាប្រធាន និងណែនាំរបៀបរាំ ច្រៀង។ តាំងពីនោះ ឱ្យតែពេលណាស្រុកភូមិចាត់តាំងកម្មវិធីសិល្បៈ ឬមហោស្រព បងស្រីតែងតែចុះឈ្មោះចូលរួម។ ដោយមិនមានលក្ខណៈសិក្សារៀនសូត្រត្រឹមត្រូវ បងស្រីព្យាយាមរៀនសូត្រពីសិល្បករនានាជំនាន់មុន មើលឡើងវិញនូវឈុតសម្តែងផ្សេងៗ ហើយក៏ស្វ័យហ្វឹកហាត់រាល់កាយវិការរាំ និងតួអង្គនីមួយៗនៅលើឆាកសម្តែង។
ដោយការខិតខំប្រឹងប្រែងឥតឈប់ឈរ បងស្រីបានចូលរួមជាច្រើនលើកនៅក្នុងការប្រឡងមហោស្រព មហោស្រពសិល្បៈមហាជន និងសមោសរសិល្បៈសម្តែងល្ខោននានា តាំងពីថ្នាក់ស្រុក ថ្នាក់ទីក្រុង រហូតដល់ថ្នាក់តំបន់ និងទទួលបានរង្វាន់ខ្ពស់ៗជាច្រើន។ ពិសេស គឺនៅសមោសរចម្រៀងប្រជាប្រិយខ្មែរតំបន់វាលរាបទន្លេគីវឡុង លើកទី ១ ឆ្នាំ ២០១៨ នៅខេត្តសុកត្រាំងចាស់ បច្ចុប្បន្នជាទីក្រុងកឹងធើ បងស្រី យីវ មានភាពជឿជាក់យ៉ាងខ្លាំងក្នុងការសម្តែង។ ដោយមានទឹកដមសម្លេងដ៏ពិរោះរណ្ដំ ទេពកោសល្យសម្តែងដោយភាពជឿជាក់ និងទាក់ទាញ បងស្រី បានឈ្នះបេក្ខជនរាប់រយរូបរួចក៏ដណ្តើមបានរង្វាន់លេខ ៣។ បងស្រី យីវ ចែករំលែក៖ “នេះជាលើកដំបូងខ្ញុំជាមួយសមាជិកក្លឹបចូលរួមប្រឡង ម៉្លោះហើយខ្ញុំក៏ជ្រើសរើសរឿង “ម៉ាក់ថឺងលក់ប្រេងម្សៅ” ហើយខ្ញុំដើរតួឯក។ សម្លៀកបំពាក់ របាំអមនិងការតុបតែងខ្លួន គឺខ្ញុំជាអ្នកដឹកនាំរឿង និងហៅសមាជិកក្លឹបមកហ្វឹកហាត់។ នៅពេលសម្តែង ខ្ញុំខិតខំបង្ហាញឱ្យអស់ពីសមត្ថភាព ទើបតម្រូវចិត្តពីគណៈមេប្រយោគ នោះហើយក៏ជាកម្លាំងជំរុញឱ្យខ្ញុំកាន់តែមានភាពជឿជាក់ក្នុងការសម្តែងឱ្យកាន់តែច្រើនថែមទៀត”។
បងស្រី ស៊ើង ធីយីវ កំពុងស្រាវជ្រាវក្បាច់រាំ ដើម្បីផ្ទេរបន្តដល់សមាជិកក្នុងក្លឹប។
បណ្តាស្នាដៃទាំងនោះ មិនត្រឹមតែបញ្ជាក់ពីទេពកោសល្យ និងការខិតខំប្រឹងប្រែងហ្វឹកហាត់ផ្ទាល់ខ្លួនប៉ុណ្ណោះទេ ថែមទាំងរួមចំណែកផ្សព្វផ្សាយនូវសម្រស់វប្បធម៌ខ្មែរទៅកាន់មហាជនជាច្រើនទៀតផង។ ដើម្បីមានបទពិសោធន៍បន្ថែម ឆ្នាំ ២០១៩ បងស្រី យីវ ចុះឈ្មោះចូលរួមថ្នាក់រៀនរបាំប្រពៃណី ដែលចាត់តាំងដោយមន្ទីរវប្បធម៌ កីឡា និងទេសចរណ៍ខេត្តសុកត្រាំងចាស់ បច្ចុប្បន្នជាទីក្រុងកឹងធើ។ ក្រៅពីនោះ បងស្រីនៅទាំងស្វែងយល់អំពីកម្មវិធីឈុតរបាំនានា ដែលបង្កើតដោយសិល្បករប្រជាជន ស៊ើងលឿង និងសិល្បករឆ្នើម ឡឹមវិញភឿង ដើម្បីរៀនពីរាល់កាយវិការ ដៃ ជើង ស្មា ចង្កេះ និងកែវភ្នែក រួចផ្ទេរបន្តដល់ប្អូនៗក្នុងក្លឹប។ បងស្រី បានឱ្យដឹង៖ “របាំ និងសម្តែងល្ខោន គឺសុទ្ធតែពិបាកទាំងអស់ តម្រូវឱ្យមានទេពកោសល្យ និងចិត្តស្រឡាញ់ពិតប្រាកដទើបរៀនបាន។ ដៃ ជើង និងរាងកាយត្រូវតែទន់ភ្លន់ កែវភ្នែកត្រូវមានមន្តស្នេហ៍ រូបរាងត្រូវតែសមសួន និងរាំត្រូវតែល្វតល្វន់។ បំផុតគឺការសម្តែងល្ខោន ត្រូវតែសម្តែងទៅតាមសម្លេងតន្ត្រី និងតួអង្គត្រូវមានភាពបត់បែនក្នុងការសម្តែង ហើយសម្លេងច្រៀង សម្តីនិយាយក៏ត្រូវតែជាក់ច្បាស់ផងដែរ។ ដូច្នេះហើយ មានតែអ្នកដែលមានចិត្តស្រឡាញ់ពិតប្រាកដ ទើបអាចសម្តែងបានល្អ។ ខ្លួនខ្ញុំផ្ទាល់មានមោទនភាពណាស់ នៅពេលមានគ្រប់រាល់កត្តា ដើម្បីសម្តែងទាំងការច្រៀង របាំ និងសម្តែងល្ខោន”។
ដោយមានចិត្តស្រឡាញ់ ការលះបង់ និងស្មារតីទទួលខុសត្រូវខ្ពស់ បងស្រី យីវ កំពុងតែស្ងៀមស្ងាត់បំផុសឡើងនូវអណ្តាតភ្លើងនៃក្តីស្រឡាញ់វប្បធម៌ប្រពៃណីក្នុងចិត្តរបស់យុវជនជំនាន់ក្រោយ។ បណ្តារង្វាន់ដែលបងស្រីសម្រេចបាន គឺជារង្វាន់កត់សម្កាល់ចំពោះទេពកោសល្យ រីឯក្លឹបដែលបងស្រីបានផ្តួចផ្តើមឡើង គឺជាភស្តុតាងដ៏រស់រវើកចំពោះក្តីប្រាថ្នាចង់ថែរក្សា និងពង្រីកអត្តសញ្ញាណជនជាតិខ្មែរ។ ដើម្បីរួមចំណែកផ្សព្វផ្សាយឱ្យកាន់តែទូលំទូលាយ បងស្រី តែងតែដឹកនាំសមាជិកក្លឹបចូលរួមសម្តែងនៅតាមការប្រឡង មហោស្រពនៅខេត្ត ក្រុងនានាមានដូច៖ ទីក្រុងហូជីមិញ ហាណូយ បេនត្រែ...។ល។ និងទទួលបានរង្វាន់ខ្ពស់ៗជាច្រើន; ចូលរួមសម្តែងល្ខោន ដើម្បីបម្រើជូនមាមីងតាមភូមិស្រុក ទីក្រុង ក្នុងឱកាសពិធីបុណ្យទានប្រពៃណីរបស់ជនជាតិ។ ទាំងពីសកម្មភាពដ៏មានអត្ថន័យទាំងនោះ បងស្រី កំពុងរួមចំណែកនាំយកក្បាច់រាំប្រពៃណី របាំ ល្ខោននិងតម្លៃវប្បធម៌ប្រពៃណីឱ្យរីកសាយភាយក្នុងជីវភាពរបស់ជនរួមជាតិខ្មែរ។ ប្អូន ថាច់ ធីង៉ុកស៊ាង សមាជិកក្លឹបបានឱ្យដឹង៖ “ខ្ញុំស្គាល់បងស្រី យីវ តាមរយៈប៉ុស្តិ៍ទូរទស្សន៍ភាសាខ្មែរVTV និងកឹងធើ ៣ និងបណ្តាញសង្គមហ្វេសប៊ុក។ នៅពេលប្អូនបានចូលរួមក្នុងក្លឹប បងស្រី បានបង្រៀនអស់ពីចិត្ត ចាប់តាំងពីកាយវិការដៃ ជើង រហូតដល់ទឹកមុខឱ្យបានត្រឹមត្រូវ និងត្រូវតាមចង្វាក់នៃរបាំប្រជាប្រិយ សិល្បៈល្ខោន របាំ។ ជាង ៨ ឆ្នាំចូលរួមក្នុងក្លឹប ប្អូនក៏បានទៅសម្តែងនៅខេត្ត ក្រុងជាច្រើនក្នុងប្រទេស បំផុតគឺបានចូលរួមសម្តែងក្នុងកម្មវិធីផ្សាយផ្ទាល់លើរលកធាតុអាកាស VTV និង កឹងធើ ៣ ប្អូនមានមោទនភាព និងសប្បាយរីករាយណាស់។ ប្អូននឹងខិតខំរួមដំណើរជាមួយក្លឹប ដើម្បីផ្ទេរបន្តអណ្តាតភ្លើងនៃក្តីស្រឡាញ់នេះដល់ប្អូនៗតូចៗ”។ ប្អូន ថាច់ ថាញទ្វឹង ឱ្យដឹងបន្ថែម៖ “ប្អូនចូលរួមក្លឹបតាំងពីថ្ងៃបង្កើតរហូតដល់ពេលនេះ ម៉្លោះហើយចម្រៀង របាំឆៃយុំា លេងភ្លេងពិណពាទ្យ និងសម្តែងល្ខោន...។ល។ គឺចេះទាំងអស់។ បងស្រី យីវ គឺជាអ្នកពូកែខាងបង្រៀនច្រៀង រាំ ឱ្យប្អូនៗឆាប់យល់ និងស្រឡាញ់ប្អូនៗដូចជាកូនបង្កើតក្នុងគ្រួសារ។ ប្អូនមានមោទនភាពណាស់ដែលបានក្លាយជាសិស្សរបស់បងស្រី ហើយតែងតែរួមដំណើរក្នុងការនាំយកទឹកដមសម្លេង ក្បាច់រាំប្រពៃណីរបស់ជនជាតិខ្មែរ ជូនទៅជនរួមជាតិទូទាំងប្រទេស”។
តាមបងស្រីយីវ ការអភិរក្សវប្បធម៌មិនត្រឹមតែឈប់ត្រឹមការរក្សាទុកនូវតម្លៃចាស់ៗប៉ុណ្ណោះទេ ប៉ុន្តែអ្វីដែលសំខាន់ជាងនេះ គឺធ្វើឱ្យវប្បធម៌បន្តរស់ក្នុងជីវភាពសព្វថ្ងៃ បានយុវវ័យស្រឡាញ់ពេញចិត្ត អនុវត្តផ្ទាល់ និងមានមោទនភាពក្នុងការថែរក្សាទើបល្អ។ នោះក៏ជាវិធីជាក់ស្តែង ដើម្បីអត្តសញ្ញាណវប្បធម៌ខ្មែរ បានផ្ទេរបន្តពីជំនាន់មួយទៅជំនាន់មួយ រួមចំណែកអភិរក្សបេតិកភណ្ឌដ៏មានតម្លៃរបស់ជនជាតិ និងធ្វើឱ្យកាន់តែសំបូរបែបថែមទៀតនូវអត្តសញ្ញាណវប្បធម៌វៀតណាម ក្នុងដំណាក់កាលសមាហរណកម្ម និងអភិវឌ្ឍន៍។ បងស្រី យីវ សំណេះសំណាល៖ “សព្វថ្ងៃ ខ្ញុំមានមោទនភាពណាស់ ដោយសម្រេចក្តីស្រមៃគឺបង្កើតបានក្លឹប ដើម្បីផ្ទេរបន្តវប្បធម៌ជនជាតិជូនដល់យុវជនជំនាន់ក្រោយ រួមចំណែកថែរក្សាវប្បធម៌របស់ជនជាតិ ហើយទាំងបានសម្តែងល្ខោននៅលើឆាក និងរបាំ... ជូនដល់មាមីងខ្មែរទៀតផង”៕
យ្វីអាញ់ - មេងលី
នាយក៖ ហ្វិញហ្វាងម៉េន
លិខិតអនុញាតលេខ ៧៨៩/GP- BTTTTអាស្រ័យក្រសួងព័ត៌មាននិងសារគមនាគមន៍ផ្តល់នូវថ្ងៃទី០២-១២-២០២១។លេខ២៤ ត្រឹងវ៉ាំងហ្វាយ សង្កាត់និញកេវ ក្រុងកឹងធើ - ទូរស័ព្ទ: (០២៩២) ៣៨៣០០៩៨
ទូរសារ: (០២៩២) ៣៨៣០៥៦១។ អ៊ីម៉ែល: toasoan@baocantho.com.vn
ទំនាក់ទំនងផ្សាយពាណិជ្ជកម្ម: quangcao@baocantho.com.vn
សរសេរច្បាស់ប្រភព "សារព័ត៌មានអេឡិចត្រូនិកកឹងធើ" នៅពេលផ្សាយបន្តពី websiteនេះ។
អភិវឌ្ឍន៍ដោយ:
ពាក្យគន្លឹះ