មហាសាមគ្គីជនជាតិ គំរូក្នុងសហគមន៍

18/11/2024 - 15:53

៣៨ឆ្នាំផ្សារភ្ជាប់នឹងការបង្រៀនអក្សរខ្មែរ

ជាង ៣៨ ឆ្នាំកន្លង លោកគ្រូគៀងម៉ួង តែងយកអស់ពីកម្លាំងកាយចិត្តក្នុងការបង្ហាត់បង្រៀនអក្សរសាស្រ្តខ្មែរដល់កូនចៅខ្មែរ និងព្រះសង្ឃនៅវត្តប្រខុប ឃុំង៉ូវឡាក។ មកទល់ពេលនេះ មានសិស្សជាច្រើនរបស់លោកគ្រូ មានវ័យវឌ្ឍនាការនិងសម្រេចជោគជ័យ ប៉ុន្តែគាត់នៅតែបន្តការងាររបស់ខ្លួន គឺបណ្តុះពន្លកសិស្សជំនាន់ថ្មី។

លោកគ្រូគៀងម៉ួង សិក្សាស្រាវជ្រាវបន្ថែម ដើម្បីជំនួយដល់ការបង្ហាត់បង្រៀននៅវត្តប្រខុប។

លោកគ្រូគៀងម៉ួង នៅភូមិប្រខុប ឃុំង៉ូវឡាក ស្រុកយ្វៀងហាយ ខេត្តត្រាវិញ ជាសមាជិកគណៈកម្មការវត្តប្រខុប និងជាអ្នកមានប្រជាប្រិយនៅតំបន់ជនរួមជាតិខ្មែរ។ លោកគ្រូគៀងម៉ួង ឱ្យដឹង៖ “បានឈរក្នុងថ្នាក់បង្ហាត់បង្រៀន ដើម្បីផ្ទេរចំណេះដឹងដល់កូនចៅខ្មែរនិងព្រះសង្ឃមកសិក្សានៅវត្តប្រខុប គឺជាក្តីមោទនៈរបស់ខ្ញុំ។ ខ្ញុំចាប់ផ្តើមបង្ហាត់បង្រៀនតាំងពីឆ្នាំ ១៩៨៦ រហូតមកដល់សព្វថ្ងៃ គោលបំណងរបស់ខ្ញុំចង់ជួយឱ្យព្រះសង្ឃ សិស្សានុសិស្សចេះអក្សរសាស្រ្តរបស់ជនជាតិខ្លួននិងរួមចំណែកអភិរក្សនិងពង្រីកវប្បធម៌ខ្មែរ”។

លោកគ្រូគៀងម៉ួង (ខាងឆ្វេង) កំពុងដោះដូរយោបល់ជាមួយនឹងព្រះចៅអធិការ
និងគណៈកម្មការវត្តប្រខុប។

ច្រើនឆ្នាំកន្លង លោកគ្រូគៀងម៉ួង តែងយកចិត្តទុកដាក់ក្នុងការបង្ហាត់បង្រៀនដល់សមណសិស្ស ដោយគ្មានបំណងចង់បានអ្វីឡើយ បំណងធំបំផុតដែលគាត់ទន្ទឹងចង់បាននោះគឺ ភាពជោគជ័យរបស់សិស្ស លោកគ្រូចង់ជួយឱ្យកូនចៅចេះភាសា អក្សរសាស្រ្តជាតិខ្លួនឯង និងដឹងពីវប្បធម៌របស់ជនរួមជាតិ ដើម្បីអភិរក្សនិងអភិវឌ្ឍ។ ភាពជោគជ័យរបស់សិស្ស គឺជារង្វាន់ដ៏មានតម្លៃបំផុតចំពោះគ្រូៗគ្រប់រូប រីឯលោកគ្រូគៀងម៉ួងក៏ដូច្នោះដែរ។ ប្រការគួរឱ្យគោរពបំផុត គឺគាត់តស៊ូព្យាយាមជាមួយនឹងការបង្ហាត់បង្រៀន ទោះបីស្ថានភាពគ្រួសារមានពេលខ្លះជួបលំបាក ហើយសុខភាពគាត់ថយចុះក៏ដោយ។ ប៉ុន្តែជាមួយនឹងការប្តេជ្ញាចិត្តនិងការលើកទឹកចិត្តរបស់ភរិយា លោកគ្រូគៀងម៉ួង បានបន្តនូវការងារនិងបំពេញកាតព្វកិច្ចរបស់ខ្លួនជាមួយនឹងការបង្ហាត់បង្រៀនសម្រេចបន្ទុកជាមួយនឹងសង្គម។

ព្រះតេជព្រះគុណ ថាច់រឿន ព្រះចៅអធិការវត្តប្រខុប មានថេរដីកា៖ “លោកគ្រូគៀងម៉ួង រស់នៅសាមញ្ញ មានបន្ទុកជាមួយនឹងសង្គម និងជាគ្រូបង្រៀនមួយរូបពោរពេញដោយការប្តូរផ្តាច់។ គាត់តែងយកចិត្តទុកដាក់យ៉ាងហ្មត់ចត់ដល់ការសិក្សារបស់ព្រះសង្ឃ និងជីវភាពរបស់មាមីងពុទ្ធបរិស័ទក្នុងចំណុះជើងវត្ត។ ទន្ទឹមនឹងនោះ គាត់នៅទាំងចលនាមាមីងខ្មែររស់នៅគោរពតាមច្បាប់ គិតគូរអភិវឌ្ឍសេដ្ឋកិច្ចគ្រួសារនិងចលនាកុមារទៅសាលារៀន។ល។ ម្ល៉ោះហើយ មាមីងពុទ្ធបរិស័ទ និងរដ្ឋអំណាចភូមិភាគតែងគោរពស្រឡាញ់រាប់អានគាត់”។

លោក ថាច់កុសល ប្រធានការិយាល័យជនជាតិស្រុកយ្វៀងហាយ ឱ្យដឹង៖ “លោកគ្រូគៀងម៉ួង ជាគ្រូបង្រៀនមួយរូបមានចំណេះដឹងជ្រៅជ្រះ។ ខ្ញុំក៏ធ្លាប់ជាកូនសិស្សរបស់គាត់។ គាត់តែងយកចិត្តទុកដាក់យ៉ាងហ្មត់ចត់ដល់ការសិក្សារបស់ព្រះសង្ឃនៅក្នុងវត្ត និងយកចិត្តទុកដាក់ដល់ជីវភាពរបស់មាមីងពុទ្ធបរិស័ទ ហេតុនោះតែងបានព្រះសង្ឃនិងពុទ្ធបរិស័ទគោរពរាប់អាន”៕

សើុងម៉ាល័យ - វិមាន

ចែករំលែកអត្ថបទ

ពាក្យគន្លឹះ