ព្រឹត្តិការណ៍ - នយោបាយ ព្រឹត្តិការណ៍

23/07/2026 - 22:12

លិខិតរបស់លោកអគ្គលេខាបក្ស ប្រធានរដ្ឋ តូឡឹម ផ្ញើជូនក្នុងឱកាសខួបអនុស្សារវរីយ៍៧៩ឆ្នាំ ទិវាយុទ្ធជនពិការ-ពលី

លោកអគ្គលេខាបក្ស ប្រធានរដ្ឋ តូឡឹម មានបិយវាចាគោរពដឹងគុណយ៉ាងជ្រាលជ្រៅចំពោះវីរយុទ្ធជន យុទ្ធជនពិការនិងគ្រួសារយុទ្ធជនពលីក្នុងឱកាសខួបអនុស្សារវរីយ៍៧៩ឆ្នាំ ទិវាយុទ្ធជនពិការ-ពលី ថ្ងៃទី២៧ ខែកក្កដា ឆ្នាំ២០២៦។

លោកអគ្គលេខាបក្ស ប្រធានរដ្ឋ តូឡឹម អុជធូបគោរពវិញ្ញាណក្ខន្ធសម្តែងការដឹងគុណបណ្តាវីរយុទ្ធជនពលី។ រូបថត៖ (ថុងញឹក/TTXVN)

ស្របក្នុងឱកាសខួបអនុស្សាវរីយ៍៧៩ឆ្នាំ ទិវាយុទ្ធជនពិការ-ពលី ដោយទឹកចិត្តគោរពដឹងគុណយ៉ាងជ្រាលជ្រៅ ខ្ញុំគោរពផ្ញើជូននូវវាចាសួរសុខទុក្ខដល់វីរមាតាវៀតណាម វីរកងកម្លាំងប្រដាប់អាវុធប្រជាជន វីរពលកម្ម យុទ្ធជនពិការ យុទ្ធជនជំងឺ គ្រួសារយុទ្ធជនពលី អតីតយុទ្ធជន អតីតនគរបាលប្រជាជន អតីតយុទ្ធជនឈានមុន អ្នកចូលរួមតស៊ូប្រយុទ្ធនិងទូទាំងប្រជាជនដែលមានសគុណចំពោះប្រទេសជាតិ នូវបិយវាចាសួរសុខទុក្ខប្រកបដោយមនោសញ្ចេនាតយ៉ាងជ្រាលជ្រៅនិងសម្តែងនូវការគោរពដឹងគុណដ៏ស្មោះត្រង់ជាទីបំផុត។

ឆ្លងកាត់រាប់ពាន់ឆ្នាំនៃការកសាងនិងការពារប្រទេស ដីមួយតឹកៗរបស់ទឹកដីវៀតណាម សុទ្ធតែទទឹកជោកដោយញើស ឈាម ឆន្ទៈនិងបំណងប្រាថ្នាជានិច្ចកាលរបស់កូនចៅវៀតណាមគ្រប់ជំនាន់។ ប្រជាជាតិវៀតណាមតែងចងចាំជានិច្ចនូវគុណូបការៈ ការពលី ការលះបង់របស់បុព្វការីជន គោរពរំលឹកវិញ្ញាណក្ខន្ធលោកប្រធានហូជីមិញដ៏មហិមា យុទ្ធជនបដិវត្តន៍ជំនាន់ដើម វីរយុទ្ធជនពលីនិងបណ្តាកុលបុត្រឆ្នើមរបស់ប្រជាជាតិដែលបានលះបង់វ័យក្មេង សុភមង្គលផ្ទាល់ខ្លួន មួយផ្នែករាងកាយនិងជីវិតរបស់ខ្លួនដើម្បីឯករាជ្យរបស់មាតុប្រទេស សេរីភាពរបស់ប្រជាជន ដើម្បីឧត្តមគតិប្រសើរឧត្តុង្គឧត្តមរបស់បក្សនិងអនាគតជានិច្ចនិរន្តរបស់ប្រជាជាតិ។

ជិតមួយសតវត្សរ៍ក្រោមទង់ជ័យដ៏ត្រចះត្រចង់របស់បក្សកុម្មុយនីស្តវៀតណាម សមមិត្តនិងជនរួមជាតិពីជំនាន់មួយទៅជំនាន់មួយមិនញញើតចំពោះគុក ច្រវ៉ាក់ គ្រាប់បែក ការលំបាកនិងការលះបង់ដោយភាពអត់ធ្មត់ជម្នះរាល់ការសាកល្បងយ៉ាងឃោរឃៅបំផុតនៃប្រវត្តិសាស្ត្រ។ មានអ្នកខ្លះត្រឡប់មកវិញជាមួយស្នាមរបួសជាប់ខ្លួនអស់មួយជីវិត មានអ្នកខ្លះស្លាប់លើសមរភូមិប្រយុទ្ធ កណ្តាលព្រៃភ្នំ ព្រែកទន្លេឬក្នុងរូងដី រហូតមកទល់ពេលនេះ នៅតែមិនទាន់កំណត់បានកន្លែងនៅឡើយ។ ទោះជានៅកន្លែងណាក៏ដោយ សមមិត្តទាំងអស់សុទ្ធតែបានក្លាយជាផ្នែកមួយនៃទឹកដីស្រស់ប្រិមប្រិយ ក្លាយជាតារានាំផ្លូវ បំភ្លឺផ្លូវឯករាជ្យជាតិ សង្គមនិយមកនិងបំណងប្រាថ្នាអភិវឌ្ឍរុងរឿង សុភមង្គលរបស់ប្រទេសជាតិ ជាដុំឥដ្ឋគ្រឹះធារដ៏រឹងមាំបំផុតក្នុងការកសាងកំពែងបដិវត្តន៍វៀតណាម ជាមូលដ្ឋានគ្រឹះដើម្បីប្រជាជាតិយើងមានមូលដ្ឋានធនធាន សក្កានុពល ឋានៈនិងកិត្យានុភាពលើឆាកអន្តរជាតិដូចសព្វថ្ងៃនេះ។

ការលះបង់និងបូជារបស់រៀមច្បងគ្រប់ជំនាន់ បានធ្វើឱ្យប្រវត្តិសាស្ត្រប្រជាជាតិយើងកាន់តែមានភាពត្រចះត្រចង់ ពូនជ្រំភាពអង់អាច របៀបរបបនិងកម្លាំងប្រជាជាតិវៀតណាមនៅរាល់សម័យកាល។សាច់ស្រស់ឈាមស្រស់របស់វីរយុទ្ធជនបានលាបពណ៌ទង់ជាតិកាន់តែក្រហមឆ្អិនឆ្អៅ ឈ្មោះរបស់យុទ្ធជនពលីបានចារលើផ្នូរឬមិនទាន់បានសរសេរឈ្មោះនៅឡើយ ប៉ុន្តែវិញ្ញាណក្ខន្ធ ភាពអង់អាចនិងកិត្តិនាមរបស់បណ្តាសមមិត្តស្ថិតនៅជានិច្ចជាមួយទឹកដីវៀតណាម រស់នៅជានិច្ចក្នុងទឹកចិត្តប្រជាជននិងសាយភាយក្នុងដំណើរការអភិវឌ្ឍរបស់ប្រទេសជាតិ។

បណ្តាយុទ្ធជនពិការ យុទ្ធជនជំងឺ គ្រួសារយុទ្ធជនពលីនិងអ្នកមានសគុណចំពោះប្រទេសជាតិ ជានិច្ចកាលជាផ្នែកមួយនៃសាច់ឈាមដ៏ពិសិដ្ឋ មិនអាចកាត់ផ្តាច់របស់ប្រជាជាតិនិងរបស់បុព្វហេតុបដិវត្តន៍។ ការដឹងគុណ គឺជាសីលធម៌ពាន់ឆ្នាំរបស់ប្រជាជាតិវៀតណាម ជាភារកិច្ចនយោបាយ ជាបទបញ្ជាចេញពីបេះដូងនិងជាកិត្តិយសរបស់ប្រជាជនវៀតណាមគ្រប់រូប។ ប្រការដែលមានអត្ថន័យបំផុត ដើម្បីរំលឹកគុណចំពោះអ្នកដែលបានបូជានិងលះបង់ គឺបន្តរក្សាសមិទ្ធផលបដិវត្តន៍ កសាងប្រទេសវៀតណាមមួយដែលមានសន្តិភាព ឯករាជ្យ ប្រជាធិបតេយ្យ សម្បូរសប្បាយ រុងរឿង ស៊ីវិល័យ សុភមង្គលនិងបោះជំហានរឹងមាំឆ្ពោះទៅរកសង្គមនិយម។ នោះជាពាក្យសច្ចាដ៏ស្មោះត្រង់របស់ជំនាន់បច្ចុប្បន្នសម្រាប់ជំនាន់មុនៗ ដើម្បីឱ្យការបូជានិងលះបង់របស់សមមិត្តនិងជនរួមជាតិ សាយភាយជានិច្ចលើផ្ទៃមេឃនៃមាតុភូមិ បំភ្លឺផ្លូវឱ្យប្រជាជាតិវៀតណាមឈានទៅមុខរឹងមាំក្នុងយុគសម័យអភិវឌ្ឍថ្មី។

ស្របក្នុងឱកាសនេះ ខ្ញុំសូមស្ងើចសរសើរចំពោះកម្មាភិបាល យុទ្ធជន អតីតយុទ្ធជន អ្នកជំនាញ អ្នកវិទ្យាសាស្ត្រ សាក្សីប្រវត្តិសាស្ត្រ គ្រប់ថ្នាក់ គ្រប់ផ្នែក ភូមិភាគនិងជនរួមជាតិទូទាំងប្រទេសដែលកំពុងខិតខំប្រឹងប្រែងទាំងថ្ងៃទាំងយប់ក្នុងការស្វែងរក ប្រមូល កំណត់អត្តសញ្ញាណអដ្ឋិធាតុយុទ្ធជនពលី។ "យុទ្ធនាការ៥០០ថ្ងៃយប់ ជំរុញការស្វែងរក ប្រមូលនិងកំណត់អត្តសញ្ញាណអដ្ឋិធាតុយុទ្ធជនពលី" គឺជាបទបញ្ជាពីបេះដូង គឺជាការប្រតិបត្តិការយោធាក្នុងសម័យសន្តិភាព ដើម្បីស្វែងរកអ្នកបង្កើតសន្តិភាព និងជាការបន្តនូវសីលធម៌"ផឹកទឹកនឹកប្រភព","តបស្នងសងគុណ"របស់ប្រជាជាតិ។ ខ្ញុំថ្លែងអំណរគុណប្រជាជនទូទាំងប្រទេស សូមស្ងើចសរសើរនិងវាយតម្លៃខ្ពស់ចំពោះស្មារតីទទួលខុសត្រូវ ការអស់ពីចិត្តនិងលទ្ធផលជំហានដំបូងរបស់កងកម្លាំងចូលរួមក្នុងយុទ្ធនាការ។ ខ្ញុំសង្ឃឹមថា សមមិត្តទាំងឡាយនឹងរក្សារឹងមាំនូវឆន្ទៈ ទំនុកចិត្តនិងភារកិច្ច ជម្នះការលំបាក បញ្ជូនយុទ្ធជនពលីជាច្រើនទៀតត្រឡប់មកកាន់មាតុប្រទេស គ្រួសារនិងមិត្តរួមកង។

ខ្ញុំសំណូមពរដល់គណៈកម្មាធិការបក្ស រដ្ឋអំណាច រណសិរ្សមាតុភូមិវៀតណាមគ្រប់លំដាប់ថ្នាក់ សហគមន៍អាជីវកម្មនិងប្រជាជន បន្តរួមដំណើរអនុវត្តការងារគោរពដឹងគុណ ដោយការឧបត្ថម្ភនិងអនុវត្តគោលនយោបាយអាទិភាពជាក់ស្តែង ផ្តោតការយកចិត្តទុកដាក់លើការបណ្តុះបណ្តាលវិជ្ជាជីវៈ បង្កការងារធ្វើ បង្កើនប្រាក់ចំណូលលំនឹងដោយចីរភាព ជួយយុទ្ធជនពិការ យុទ្ធជនជំងឺ គ្រួសារយុទ្ធជនពលីនិងអ្នកមានសគុណ បន្តការឈានឡើងធ្វើមានផ្ទាល់ខ្លួន សម្រាប់គ្រួសារនិងសង្គម។

គោរពជូនពរដល់វីរមាតាវៀតណាម វីរយុទ្ធជន យុទ្ធជនពិការ យុទ្ធជនជំងឺ គ្រួសារយុទ្ធជនពលី អតីតយុទ្ធជន អ្នកមានសគុណចំពោះបដិវត្តន៍ ព្រមទាំងគ្រួសារមានសុខភាពល្អនិងសុភមង្គល។ សូមជូនពរកម្មាភិបាល យុទ្ធជន កងកម្លាំងនិងប្រជាជនចូលរួម"យុទ្ធនាការ៥០០ថ្ងៃយប់"រក្សាភាពសាមគ្គី ជម្នះការលំបាក អនុវត្តសម្រេចឆ្នើមភារកិច្ច៕

ដោយមេត្រី

តូឡឹម
អគ្គលេខាគណៈប្រតិបត្តិការមជ្ឈិមបក្សកុម្មុយនីស្តវៀតណាម
ប្រធានរដ្ឋសាធារណរដ្ឋសង្គមនិយមវៀតណាម

យោង៖ទីភ្នាក់ងារសារព័ត៌មានវៀតណាម-មុនី

ចែករំលែកអត្ថបទ

ពាក្យគន្លឹះ