គោលនយោបាយ -ការរស់នៅ គោលនយោបាយ

21/07/2026 - 22:47

ភាពពុះពោរនៃសកម្មភាពគោរពដឹងគុណក្នុងទិវាយុទ្ធជនពិការ - ពលី ថ្ងៃទី២៧ ខែកក្កដា

រយៈពេលកន្លង គណៈកម្មាធិការបក្ស និងរដ្ឋអំណាចទីក្រុងកឹងធើ តែងតែយកចិត្តទុកដាក់អនុវត្តល្អនូវប្រពៃណី “តបស្នងសងគុណ” ផ្តោតការយកចិត្តទុកដាក់គិតគូរចំពោះយុទ្ធជនពិការ យុទ្ធជនជំងឺ ញាតិសន្តានយុទ្ធជនពលី គ្រួសារគោលនយោបាយ និងអ្នកមានសគុណចំពោះបដិវត្តន៍។ តាមរយៈនោះ បានបញ្ជាក់ពីសីលធម៌ដ៏ល្អប្រពៃរបស់ប្រជាជាតិ “ផឹកទឹកនឹកប្រភព”។

កម្មាភិបាល សមាជិកសមាគម និងយុវជនសង្កាត់សុកត្រាំង អុជធូប ដាក់ផ្កា និងបោសសម្អាតបរិវេណទីបញ្ចុះសពយុទ្ធជនពលីសុកត្រាំង។

ដល់ខែកក្កដាជារៀងរាល់ឆ្នាំ ទៀនអុជគោរពរំលឹកគុណនៅតាមទីបញ្ចុះសពយុទ្ធជនពលីលើភូមិឋានទីក្រុងកឹងធើ បានអុជបំភ្លឺឡើងក្នុងបរិយាកាសស្ងប់ស្ងាត់ និងពិសិដ្ឋ។ នៅខាងមុខផ្នូរទាំងអស់ យើងបានអុជធូប ដាក់ផ្កា រួមនឹងទឹកចិត្តគោរពដឹងគុណយ៉ាងជ្រាលជ្រៅ។ នេះជាឱកាសដើម្បីបុគ្គលម្នាក់ៗ យល់កាន់តែស៊ីជម្រៅអំពីតម្លៃនៃឯករាជ្យ និងសេរីភាព ដែលបានប្តូរដោយឈាមស្រស់ សាច់ស្រស់ និងយុវវ័យរបស់បុព្វបុរសយើងជាច្រើនជំនាន់។ ដោយយល់ដឹងស៊ីជម្រៅអំពីប្រការនេះ គណៈប្រចាំការនៃគណៈកម្មាធិការរណសិរ្សមាតុភូមិវៀតណាមសង្កាត់សុកត្រាំង បានសហការជាមួយបណ្តាអង្គការនយោបាយ-សង្គម រៀបចំចេញដំណើរធ្វើអនាម័យបរិស្ថាន កែលម្អបរិវេណទីបញ្ចុះសពយុទ្ធជនពលីសុកត្រាំង។ សកម្មភាពនេះទាក់ទាញកម្មាភិបាល សមាជិកសម្ព័ន្ធយុវជន សមាជិកសមាគម និងយុវជនចំនួន ១២០ នាក់ចូលរួម ដើម្បីសម្ដែងនូវការគោរពដឹងគុណយ៉ាងជ្រាលជ្រៅចំពោះគុណបំណាច់ដ៏ធំធេងរបស់បណ្តាវីរយុទ្ធជនពលី ដែលបានលះបង់ជីវិតដើម្បីឯករាជ្យ សេរីភាព។ ទន្ទឹមនឹងនោះ អប់រំប្រពៃណីស្នេហាជាតិដល់កម្មាភិបាល សមាជិកនិងប្រជាជន ព្រមទាំងជំនាន់ក្មេងៗ។

លោកថាច់បឺវតឹង អនុលេខាសម្ព័ន្ធយុវជនឃុំមីហឿង ជូនអំណោយដល់គ្រួសារអ្នកពិការ និងអ្នកមានសគុណលើភូមិឋានឃុំ។

"ឆ្ពោះដល់ការរំលឹកខួបអនុស្សាវរីយ៍ ៧៩ ឆ្នាំ ទិវាយុទ្ធជនពិការ - ពលី (២៧/៧/១៩៤៧ - ២៧/៧/២០២៦) សម្ព័ន្ធយុវជនឃុំមីហឿង បានអនុវត្តព្រមៗគ្នានូវសកម្មភាពជាក់ស្តែង និងមានអត្ថន័យជាច្រើន ដើម្បីគោរពដឹងគុណបណ្តាវីរយុទ្ធជនពលី យុទ្ធជនពិការ យុទ្ធជនជំងឺ អ្នកម្តាយវៀតណាមវីរភាព គ្រួសារគោលនយោបាយ និងអ្នកមានសគុណចំពោះបដិវត្តន៍ ដោយមានអំណោយចំនួន ១១០ ចំណែក រួមមានអង្ករនិងគ្រឿងឧបភោគបរិភោគ" - បងថាច់បឺវតឹង អនុលេខាសម្ព័ន្ធយុវជនឃុំមីហឿង បានឱ្យដឹងដូច្នោះ។ អំណោយទាំងនេះ ទោះបីតម្លៃសម្ភារៈមិនធំដុំ ប៉ុន្តែបានបង្ហាញការយកចិត្តទុកដាក់ ចែករំលែក ជាប្រភពកម្លាំងលើកទឹកចិត្តដ៏ធំធេង ជួយឱ្យគ្រួសារទាំងនេះជម្នះការលំបាក បន្តពង្រីកប្រពៃណីបដិវត្តន៍ ធ្វើជាគំរូក្នុងជីវភាព។

សម្ព័ន្ធយុវជនឃុំថាញ់ថើយអាង សហការពិនិត្យជំងឺ ផ្ដល់ថ្នាំពេទ្យដោយឥតគិតថ្លៃ និងជូនអំណោយដល់មុខសញ្ញាគោលនយោបាយ គ្រួសារមានការលំបាកលើភូមិឋានឃុំ។

ទន្ទឹមនឹងនោះ កម្មវិធីពិនិត្យជំងឺ ផ្តល់ពិគ្រោះពីសុខភាព និងផ្តល់ថ្នាំពេទ្យដោយឥតគិតថ្លៃ ក៏បានអនុវត្តនៅឃុំថាញ់ថើយអាង ទីក្រុងកឹងធើ។ មុខសញ្ញាគោលនយោបាយ អ្នកវ័យចាស់ និងអ្នកមានស្ថានភាពលំបាករាប់រយនាក់ បានក្រុមគ្រូពេទ្យពិនិត្យ ផ្តល់ពិគ្រោះពីការថែទាំសុខភាព និងផ្តល់ថ្នាំដោយឥតគិតថ្លៃ រួមចំណែកលើកកម្ពស់គុណភាពថែទាំសុខភាពសហគមន៍ និងរីកសាយភាយស្មារតីចែករំលែក ទទួលខុសត្រូវដើម្បីជីវភាពសហគមន៍របស់យុវជន។ តាមលោកង្វៀងយ្វីខឿង លេខាសម្ព័ន្ធយុវជនឃុំថាញ់ថើយអាង បានឱ្យដឹងថា សម្ព័ន្ធយុវជនឃុំបានសហការជាមួយមហាវិទ្យាល័យឱសថសាស្ត្រ មន្ទីរពេទ្យពហុព្យាបាលសុកត្រាំង មន្ទីរពេទ្យភ្នែក VISI និងពេទ្យធ្មេញសាយហ្គងតឹមឌឹក ចាត់តាំងពិនិត្យជំងឺ ផ្តល់ថ្នាំពេទ្យដោយឥតគិតថ្លៃ ព្រមទាំងជូនអំណោយចំនួន ១០០ ចំណែកដល់គ្រួសារមានស្ថានភាពលំបាកលើភូមិឋាន។

អាចអះអាងថា រាល់ការងារ រាល់សកម្មភាពរំលឹកដឹងគុណ មិនត្រឹមតែរួមចំណែកធ្វើឱ្យរីកសាយភាយតម្លៃល្អប្រសើរ ពូនជ្រំស្មារតីស្នេហាជាតិប៉ុណ្ណោះទេ ថែមទាំងជួយឱ្យបុគ្គលម្នាក់ៗពិនិត្យមើលខ្លួនឯងឡើងវិញនាពេលបច្ចុប្បន្ន ដើម្បីរំលឹកខ្លួនឯងឱ្យរស់នៅមានការទទួលខុសត្រូវខ្ពស់ជាងចំពោះប្រទេសជាតិ និងសហគមន៍។ ទឹកចិត្តដឹងគុណ ពេលបានផ្សព្វផ្សាយនិងបន្តវេនត្រឹមត្រូវ នឹងក្លាយជាតម្លៃចីរភាព រួមចំណែកបង្កជាកម្លាំងផ្ទៃក្នុងរបស់ប្រជាជាតិ ក្នុងដំណើរការកសាងនិងការពារមាតុភូមិ៕

ថាញវ៉ាង - ថាច់ធី

ចែករំលែកអត្ថបទ

ពាក្យគន្លឹះ