ព្រឹត្តិការណ៍ - នយោបាយ ព្រឹត្តិការណ៍

08/07/2026 - 22:16

អនុវត្តបណ្តាកម្មវិធីទិសដៅជាតិធានាមានប្រសិទ្ធភាព ទាន់ពេល ចំគោលដៅ និងចំមុខសញ្ញា

(អ.ឡ) - នាព្រឹកថ្ងៃទី៨ ខែកក្កដា លោកត្រឹងវ៉ាំងហ្វៀង អនុលេខាគណៈកម្មាធិការបក្សទីក្រុងកឹងធើ និងលោកវឿងក្វឹកណាម អនុប្រធានគណៈកម្មាធិការប្រជាជនទីក្រុងកឹងធើ បានធ្វើការជាមួយការិយាល័យសម្របសម្រួលបណ្តាកម្មវិធីទិសដៅជាតិទីក្រុង និងបណ្តាមន្ទីរ គណៈ ផ្នែកពាក់ព័ន្ធ អំពីស្ថានភាពអនុវត្តបណ្តាកម្មវិធីទិសដៅជាតិក្នុងរយៈពេល ៦ ខែដើមឆ្នាំ និងទិសដៅ ភារកិច្ចក្នុងពេលខាងមុខ។

ទិដ្ឋភាពនៃកិច្ចប្រជុំ។

យោងតាមការិយាល័យសម្របសម្រួលបណ្តាកម្មវិធីទិសដៅជាតិទីក្រុង ច្បាមតាមកិច្ចចង្អុលការរបស់មជ្ឈិម ការងារអនុវត្តបណ្តាកម្មវិធីទិសដៅជាតិបានអនុវត្តយ៉ាងប្រញាប់ប្រញាល់ ជាជំហានៗធ្វើឱ្យសុក្រឹតមូលដ្ឋានគតិយុទ្ធ និងយន្តការចាត់តាំងអនុវត្ត។ មកដល់ពេលនេះ មានកម្មវិធីចំនួន ២ ក្នុងចំណោម ៥ នៃកម្មវិធីទិសដៅជាតិ បានប្រកាសផែនការអនុវត្តដំណាក់កាល ២០២៦-២០៣០ និងឆ្នាំ ២០២៦ រួមមាន៖ កម្មវិធីទិសដៅជាតិកសាងជនបទថ្មី បន្ថយភាពក្រីក្រដោយចីរភាព និងអភិវឌ្ឍន៍សេដ្ឋកិច្ច - សង្គម តំបន់ជនជាតិភាគតិចនិងតំបន់ភ្នំ ដំណាក់កាល ២០២៦-២០៣៥ កម្មវិធីទិសដៅជាតិបង្ការនិងប្រឆាំងគ្រឿងញៀន រហូតដល់ឆ្នាំ ២០៣០។ បណ្តាកម្មវិធីទិសដៅជាតិអំពីការអភិវឌ្ឍវប្បធម៌ ដំណាក់កាល ២០២៦-២០៣៥ កម្មវិធីទិសដៅជាតិធ្វើទំនើបកម្ម លើកកម្ពស់គុណភាពអប់រំនិងបណ្តុះបណ្តាល ដំណាក់កាល ២០២៦-២០៣៥ និងកម្មវិធីទិសដៅជាតិអំពីការថែទាំសុខភាពនិងចំនួនប្រជាជន ដំណាក់កាល ២០២៦-២០៣៥ កំពុងប្រញាប់ប្រញាល់ធ្វើឱ្យសុក្រឹតផែនការអនុវត្តតាមបទប្បញ្ញត្តិ។

លោកវឿងក្វឹកណាម អនុប្រធានគណៈកម្មាធិការប្រជាជនទីក្រុងកឹងធើ មានប្រសាសន៍នៅក្នុងកិច្ចប្រជុំ។

ទីក្រុងបានធ្វើឱ្យសុក្រឹតគណៈចង្អុលការបណ្តាកម្មវិធីទិសដៅជាតិ លក្ខន្តិកៈសកម្មភាព និងបែងចែកភារកិច្ចដល់សមាជិកម្នាក់ៗ។ ទីក្រុងក៏បានធ្វើការបែងចែកក្រុមឃុំ ក្នុងឆ្នាំ ២០២៦ នេះ ខិតខំមានហោចណាស់ ៦ ឃុំ ជាសាវន្តសម្រេចក្រមលក្ខឋានឃុំជនបទថ្មី ដំណាក់កាល ២០២៦-២០៣០ យោងលើមូលដ្ឋានឃុំចំនួន ៩ ដែលបានចុះឈ្មោះខិតខំសម្រេចបទដ្ឋាន។

ទន្ទឹមនឹងនោះ ទីក្រុងបានប្រមូលផ្តុំអនុវត្តបណ្តាបទប្បញ្ញត្តិរបស់មជ្ឈិមអំពីបទដ្ឋានក្រីក្រ ពហុវិមាត្រ ដំណាក់កាល ២០២៦-២០៣០ ឧបត្ថម្ភអភិវឌ្ឍការផលិត ធ្វើពិពិធកម្មមុខរបរចិញ្ចឹមជីវិត និងលើកកម្ពស់សមត្ថភាពជូនប្រជាជន។ ទីក្រុងបានសម្រេចការកំណត់តំបន់ជនជាតិភាគតិច ដំណាក់កាល ២០២៦-២០៣០ និងការបោះឆ្នោតជ្រើសរើសអ្នកមានប្រិយភាពក្នុងជនជាតិភាគតិច សម្រាប់ឆ្នាំ ២០២៦។

បណ្តាអ្នកតំណាងមានមតិយោបល់ក្នុងកិច្ចប្រជុំ។

នគរបាលទីក្រុងបន្តអនុវត្តគម្រោងបង្កើនការងារបង្ការ បង្រ្កាបបទល្មើសគ្រឿងញៀន ខិតខំដល់ឆ្នាំ ២០៣០ មាន ៥០% ឃុំ សង្កាត់ គ្មានគ្រឿងញៀន។ ផ្នែកវប្បធម៌ កីឡា និងទេសចរណ៍ បន្តអនុវត្តបណ្តាភារកិច្ចអំពីការអភិរក្ស ជួសជុល និងពង្រីកតម្លៃបេតិកភណ្ឌវប្បធម៌ អភិវឌ្ឍន៍ប្រព័ន្ធស្ថាប័នវប្បធម៌ កីឡាមូលដ្ឋាន។ មន្ទីរសុខាភិបាលបានម្ចាស់ការពិនិត្យឡើងវិញនូវស្ថានភាពជាក់ស្តែងនៃប្រព័ន្ធសុខាភិបាលមូលដ្ឋាន សរុបតម្រូវការវិនិយោគលើសម្ភារៈបរិក្ខារ និងឧបករណ៍វេជ្ជសាស្ត្រ។ មន្ទីរអប់រំនិងបណ្តុះបណ្តាល បន្តអនុវត្តភារកិច្ចលើកកម្ពស់គុណភាពអប់រំលើគ្រប់ជ្រុងជ្រោយ អភិវឌ្ឍន៍កងជួរគ្រូបង្រៀននិងកម្មាភិបាលគ្រប់គ្រងអប់រំ ព្រមទាំងធ្វើទំនើបកម្មសម្ភារៈបរិក្ខារជាជំហានៗ។

ទន្ទឹមនឹងលទ្ធផលសម្រេចបាន ការអនុវត្តបណ្តាកម្មវិធីទិសដៅជាតិនៅជួបប្រទះការលំបាក អន់ថយមួយចំនួនដែលត្រូវប្រមូលផ្តុំដោះស្រាយ។ ជាក់ស្តែង គឺការធ្វើឱ្យសុក្រឹតយន្តការ និងគោលនយោបាយរបស់ទីក្រុងតាមតម្រូវការវិមជ្ឈការនៅមានភាពយឺតយ៉ាវ កិច្ចសហការរវាងគណៈកម្មាធិការបក្ស រដ្ឋអំណាច និងស្ថាប័នពាក់ព័ន្ធក្នុងការចាត់តាំងអនុវត្ត ពេលខ្លះមិនទាន់ព្រមៗគ្នា ការងារគ្រប់គ្រងនិងផ្តល់ផ្ទេរប្រភពទុនមិនទាន់ឆ្លើយតបតាមតម្រូវការនៅឡើយ...។

លោកត្រឹងវ៉ាំងហ្វៀង អនុលេខាគណៈកម្មាធិការបក្សទីក្រុងកឹងធើ មានប្រសាសន៍ចង្អុលការក្នុងកិច្ចប្រជុំ។

មានប្រសាសន៍ចង្អុលការក្នុងកិច្ចប្រជុំ លោកត្រឹងវ៉ាំងហ្វៀង បានសង្កត់ធ្ងន់៖ បណ្តាកម្មវិធីទិសដៅជាតិមានអត្ថន័យមនុស្សសាស្ត្រយ៉ាងជ្រាលជ្រៅ ហេតុនេះត្រូវកំណត់ថា ការអនុវត្តកម្មវិធីទាំងនេះគឺជាភារកិច្ចស្នូលមួយរបស់ទីក្រុងក្នុងដំណាក់កាល ២០២៦-២០៣០។ បណ្តាស្ថាប័ន អង្គភាព គប្បីបង្កើនការទទួលខុសត្រូវរបស់អ្នកដឹកនាំក្នុងការដឹកនាំ ចង្អុលការ ចាត់តាំងអនុវត្ត និងដាក់បញ្ចូលខ្លឹមសារនេះទៅក្នុងកម្មវិធីត្រួតពិនិត្យ និងឃ្លាំមើលរបស់គណៈកម្មាធិការបក្ស និងគណៈកម្មាធិការត្រួតពិនិត្យគ្រប់ថ្នាក់។ ទន្ទឹមនឹងនោះ គប្បីពង្រីកតួនាទីរបស់រណសិរ្សមាតុភូមិ បណ្តាអង្គការនយោបាយ-សង្គម សហគមន៍អាជីវកម្ម និងប្រជាជន ដើម្បីបង្កជាកម្លាំងចម្រុះ នាំយកបណ្តាកម្មវិធីទិសដៅជាតិនៅលើភូមិឋានទីក្រុងសម្រេចបានប្រសិទ្ធភាពខ្ពស់បំផុតតាមទិសដៅដែលបានដាក់ចេញ។

អនុលេខាគណៈកម្មាធិការបក្សទីក្រុង បានសំណូមពរគណៈកម្មាធិការប្រជាជនទីក្រុងចង្អុលការប្រញាប់ប្រកាសដាក់ចេញនូវក្រមលក្ខឋាន ផែនការ និងយន្តការអនុវត្តបណ្តាកម្មវិធីទិសដៅជាតិ។ ទន្ទឹមនឹងនោះ គប្បីជំរុញការធ្វើវិមជ្ឈការ វិសហមជ្ឈការ និងផ្តល់ផ្ទេរប្រភពធនធានដល់ភូមិភាគ។ ទន្ទឹមនឹងនោះ គប្បីបំពេញឱ្យបានពេញលេញនូវស្ថាប័ន គោលនយោបាយ និងលក្ខខណ្ឌនានាដើម្បីបណ្តុះបណ្តាល បំប៉ន និងណែនាំផ្ទាល់ដល់កងជួរកម្មាភិបាលដែលទទួលបន្ទុកវិស័យនេះ។ បណ្តាស្ថាប័នដឹកនាំត្រូវពិនិត្យឡើងវិញ ធ្វើឱ្យសុក្រឹតផែនការអនុវត្តកម្មវិធីទិសដៅជាតិនីមួយៗ ក្នុងនោះធ្វើឱ្យច្បាស់នូវកិច្ចការដែលបានប្រកាសដាក់ចេញ កំពុងដាក់ជូន ឬនៅមានភាពយឺតយ៉ាវ មូលហេតុ ការទទួលខុសត្រូវ និងពេលវេលាសម្រេច។ មន្ទីរហិរញ្ញវត្ថុសហាការជាមួយការិយាល័យសម្របសម្រួលបង្កើតតារាងវឌ្ឍនភាពរួម ដើម្បីតាមដាន រំលឹក និងរាយការណ៍ជាប្រចាំជូនគណៈប្រចាំការនៃគណៈកម្មាធិការបក្សទីក្រុង និងគណៈកម្មាធិការប្រជាជនទីក្រុង។ ជំរុញការផ្តល់ផ្ទេរទុន ប្រើប្រាស់ប្រភពធនធានឱ្យចំគោលដៅ និងមានប្រសិទ្ធភាព។ មន្ទីរហិរញ្ញវត្ថុដឹកនាំពិនិត្យឡើងវិញនូវប្រភពទុន ភារកិច្ចចំណាយ និងគម្រោងនីមួយៗ និងខិតខំផ្តល់ផ្ទេរទុនសម្រេច ១០០% នូវរាល់ប្រភពទុនដែលមានលក្ខខណ្ឌគ្រប់គ្រាន់៕

ត្វៀកទិ្រញ - សុផន

ចែករំលែកអត្ថបទ

ពាក្យគន្លឹះ