មហាសាមគ្គីជនជាតិ គំរូក្នុងសហគមន៍

24/07/2026 - 14:19

ព្រះតេជព្រះគុណគឹមធឿង គំរូល្អនៅតំបន់ឆ្នេរសមុទ្រឃុំឡាយហ្វា

នៅតំបន់ឆ្នេរសមុទ្រឃុំឡាយហ្វា ទីក្រុងកឹងធើ មានព្រះចៅអធិការវត្តខ្មែរមួយព្រះអង្គ តែងតែខិតខំអស់ពីព្រះទ័យដើម្បីបម្រើព្រះពុទ្ធសាសនា និងសាងអំពើល្អជួយសង្គម។ ព្រះអង្គ គឺព្រះតេជព្រះគុណគឹមធឿង ព្រះចៅអធិការវត្តឈូងធំ។

ក្នុងដំណើរចុះទៅឃុំឡាយហ្វា យើងខ្ញុំបានចូលវត្តឈូងធំ ស្របពេលវត្តកំពុងបើកថ្នាក់បង្រៀនអក្សរខ្មែរនាឱកាសវិស្សមកាល បរិវេណវត្តមានភាពអ៊ូអរដោយសារសិស្សានុសិស្សរាប់រយនាក់មករៀនសូត្រ។ តាមការសំណេះសំណាលជាមួយព្រះសង្ឃជាគ្រូបង្រៀន ថ្នាក់រៀននេះតែងបើកជារៀងរាល់ឆ្នាំ និងរីកចម្រើនជាលំដាប់ អាស្រ័យព្រះចៅអធិការវត្តតែងតែយកព្រះទ័យទុកដាក់ពិសេសដល់ការអប់រំភាសា និងអក្សរសាស្ត្រជនជាតិ។ ក្នុងជួបសន្ទនាជាមួយយើងខ្ញុំនៅក្នុងកុដិ ព្រះតេជព្រះគុណគឹមធឿង បានរាប់អានយ៉ាងស្និទ្ធស្នាលនិងរាក់ទាក់ ញ៉ាំងឱ្យយើងខ្ញុំបានយល់ពីទឹកចិត្តមេត្តាធម៌នៃអ្នកបួស។ នៅពេលសាកសួរអំពីការបើកថ្នាក់បង្រៀនអក្សរខ្មែរ ព្រះតេជព្រះគុណគឹមធឿង មានព្រះថេរដីកា៖ “តាំងពីដើមមក វត្តយើងបានកំណត់ការងារសំខាន់៣យ៉ាងដែលត្រូវយកចិត្តទុកដាក់អនុវត្ត៖ ទីមួយគឺការអប់រំបណ្តុះបណ្តាល ទីពីរគឺកិច្ចការព្រះពុទ្ធសាសនានិងកិច្ចការសង្គមនិងទីបីគឺការកសាងជួសជុលវត្តអារាម។ ក្នុងចំណោមនោះ ការអប់រំបណ្តុះបណ្តាល គឺជាកត្តាសំខាន់បំផុត ដែលវត្តតែងតែយកចិត្តទុកដាក់ជាចម្បង។ ដូចយើងបានដឹងស្រាប់ហើយថា នៅលើទឹកដីវៀតណាម មាន ៥៤ ជនជាតិ ជនជាតិនីមួយៗតែងតែមានវប្បធម៌ ប្រពៃណី និងភាសារៀងៗខ្លួន។ ហេតុនេះ បន្ទាប់ពីកុមារឈប់សម្រាកវិស្សមកាលពីសាលាសាកល វត្តតែងតែបើកថ្នាក់បង្រៀនអក្សរខ្មែរជូនកុមារក្នុងភូមិស្រុក ដើម្បីឱ្យក្មួយៗបានយល់ដឹងពីភាសានៃជនជាតិខ្លួន”។

ព្រះតេជព្រះគុណ គឹមធឿង បានសួរសុខទុក្ខនិងពិនិត្យស្ថានភាពរៀនអក្សរខ្មែររបស់កុមារតូចៗ នាឱកាសវិស្សមកាល។

ក្រៅពីការយកព្រះទ័យទុកដាក់ដល់ការសិក្សា និងការអភិរក្សវប្បធម៌ប្រពៃណីដ៏ល្អផូរផង់របស់ជនរួមជាតិ ព្រះតេជព្រះគុណ គឹមធឿង ជាគំរូឆ្នើមក្នុងសកម្មភាពពង្រឹងសុខុមាលភាពសង្គមនៅភូមិភាគ។ ព្រះអង្គតែងប្រកាន់ខ្ជាប់ទស្សនៈ "ការងារសាសនានិងការងារសង្គម" តែងផ្សារភ្ជាប់ជាមួយគ្នា ហើយការជួយសម្រាលទុក្ខលំបាកជូនប្រជាជន ជាសកម្មភាពជាក់ស្តែងបំផុតក្នុងការអនុវត្តធម៌មេត្តារបស់ព្រះពុទ្ធសាសនា។ តាមរយៈប្រិយភាពនិងព្រះទ័យសប្បុរសធម៌ ព្រះតេជព្រះគុណ គឹមធឿង បានកៀរគរសប្បុរសជន និងពុទ្ធបរិស័ទជិតឆ្ងាយ រួមវិភាគទានកសាងសមិទ្ធផលជាច្រើន។ ជាក់ស្តែង ព្រះអង្គបានចលនាសាងសង់និងជួសជុលផ្ទះជូនគ្រួសារក្រីក្រ ព្រមទាំងជួសជុលផ្លូវគមនាគមន៍ជនបទ ដោយចំណាយថវិកាសរុបជិត ៤០០ លានដុង។ ក្នុងកំឡុងពេលផ្ទុះជំងឺ COVID-១៩ ព្រះអង្គបានសហការជាមួយរដ្ឋអំណាចភូមិភាគ ឧបត្ថម្ភអំណោយជាគ្រឿងឧបភោគបរិភោគរាប់ពាន់កញ្ចប់ ជូនដល់មណ្ឌលដាក់ឱ្យនៅដោយឡែក នៅទីរួមខេត្តវិញចូវ (ខេត្តសុកត្រាំងចាស់)។ ចំពោះសកម្មភាពទាំងនេះ មិនត្រឹមតែបង្ហាញពីមេត្តាធម៌នៃព្រះពុទ្ធសាសនាប៉ុណ្ណោះទេ ថែមទាំងជាគំរូល្អក្នុងការរស់នៅ “ល្អទាំងផ្លូវលោកនិងផ្លូវធម៌” ទៀតផង។ ព្រះតេជព្រះគុណ គឹមធឿង មានថេរដីកា៖ "កន្លងមក អាត្មាភាពបានកៀរគរថវិកាសាងសង់ផ្ទះចំនួន ៤ ខ្នង ជូនប្រជាជនក្រីក្រដែលលំបាកខាងលំនៅឋាន។ ដោយសង់ផ្ទះថ្មរឹងមាំ ដំបូលស័ង្កសីជូនពួកគាត់។ ក្នុងការជួយសង្គ្រោះ វត្តគ្មានការរើសអើង ឬទីកន្លែងរស់នៅ មិនថានៅក្នុងនិងក្រៅភូមិឋានឡើយ ឱ្យតែមានការលំបាកមកពឹងវត្តជួយទាំងអស់"។

ក្រៅពីការបើកថ្នាក់បង្រៀននាឱកាសវិស្សមកាល ព្រះតេជព្រះគុណ គឹមធឿង និងគណៈកម្មការវត្ត បានរួមចំណែកយ៉ាងធំធេងក្នុងបុព្វហេតុអប់រំនៅភូមិភាគទៀតផង។ ជាក់ស្តែង វត្តបានស្ម័គ្រចិត្តបរិច្ចាគដីទំហំជាង ៤.០០០ ម៉ែត្រការ៉េ ជូនរដ្ឋអំណាចកសាងសាលារៀនដ៏ស្អាតបាត នៅក្បែរបរិវេណវត្ត។ ការលះបង់នេះកាន់តែធ្វើឱ្យលេចធ្លោនូវគុណធម៌ដ៏ខ្ពង់ខ្ពស់របស់ព្រះសង្ឃ ដែលខិតខំអស់ពីព្រះទ័យដើម្បីផលប្រយោជន៍រួម។ ទន្ទឹមនឹងនោះ ព្រះតេជព្រះគុណ គឹមធឿង យកព្រះទ័យទុកដាក់យ៉ាងខ្លាំងដល់ការបណ្តុះបណ្តាលធនធានមនុស្ស។ រយៈពេលកន្លង ព្រះអង្គតែងលើកទឹកចិត្តព្រះសង្ឃក្នុងវត្ត ឱ្យចូលរួមសិក្សាកម្រិតមធ្យមសិក្សាចំណេះទូទៅ តាមរយៈនោះ មានព្រះសង្ឃជាច្រើនអង្គបានប្រឡងជាប់សញ្ញាបត្រវិទ្យាល័យ ហើយបន្តសិក្សានៅកម្រិតអនុមហាវិទ្យាល័យ និងមហាវិទ្យាល័យ។ ព្រះសង្ឃនៅពេលនិមន្តទៅសិក្សា នឹងទទួលបានការឧបត្ថម្ភថ្លៃសិក្សាស្ទើរតែទាំងស្រុងពីព្រះតេជព្រះគុណ និងគណៈកម្មការវត្ត តាំងពីចាប់ផ្តើមរហូតដល់បញ្ចប់វគ្គសិក្សា។ ព្រះតេជព្រះគុណ តាំងត្រាយ ជាព្រះចៅអធិការរងវត្តឈូងធំ ដែលកំពុងសិក្សាមហាវិទ្យាល័យ ឯកទេសទំនាក់ទំនងសាធារណៈជន នៅសាកលវិទ្យាល័យង្វៀងតឹកថាញ់ ទីក្រុងហូជីមិញ ក៏ជាព្រះសង្ឃមួយអង្គ ក្នុងចំណោមព្រះសង្ឃដែលទទួលបានការឧបត្ថម្ភ ពីព្រះតេជព្រះគុណ គឹមធឿង ផងដែរ។ ព្រះតេជព្រះគុណ តាំងត្រាយ មានថេរដីកា៖ “រយៈពេលកន្លង ព្រះតេជព្រះគុណ គឹមធឿង តែងតែយកព្រះទ័យទុកដាក់លើកទឹកចិត្ត និងបង្កលក្ខណៈងាយស្រួលឱ្យព្រះសង្ឃបន្តការសិក្សានៅកម្រិតអនុមហាវិទ្យាល័យ និងមហាវិទ្យាល័យ។ ព្រះអង្គតែងតែរំលឹក និងលើកទឹកចិត្តព្រះសង្ឃឱ្យខិតខំរៀនសូត្រ។ បច្ចុប្បន្ន វត្តមានព្រះសង្ឃ ៣ អង្គ កំពុងសិក្សាមហាវិទ្យាល័យ និង ២ អង្គ ត្រៀមចូលរៀនអនុមហាវិទ្យាល័យ ព្រមទាំង ៨ អង្គទៀត កំពុងសិក្សានៅសាលាមធ្យមសិក្សាបំពេញវិជ្ជាបាលីណាមបូ។ ព្រះអង្គតែងតែជួយឧបត្ថម្ភថ្លៃសិក្សា ដើម្បីឱ្យព្រះសង្ឃកាត់បន្ថយការក្តីបារម្ភ ខិតខំរៀនសូត្របង្កើនចំណេះដឹង បម្រើការងារសាសនា និងសង្គមឱ្យកាន់តែប្រសើរ”។

ប្អូនៗជាគ្រួសារក្រីក្រ ទទួលអំណោយសប្បុរសធម៌ តាមរយៈការចលនារបស់ព្រះតេជព្រះគុណ គឹមធឿង។ រូបថត៖ ផ្តល់ជូនដោយព្រះសង្ឃក្នុងវត្ត

ផ្ដើមពីបណ្តាអំពើល្អ ដែលប្រកបដោយមនុស្សធម៌ និងការលះបង់ដោយស្ងៀមស្ងាត់ទាំងនោះ ប្រិយភាពរបស់ព្រះតេជព្រះគុណ គឹមធឿង កាន់តែល្បីសុះសាយ និងដក់ជាប់ក្នុងបេះដូងរបស់ប្រជាជនភូមិស្រុកនៅទីនេះ។ ចំពោះមាមីងជនរួមជាតិខ្មែរឃុំឡាយហ្វា ព្រះអង្គមិនត្រឹមតែជាមន្រ្តីសង្ឃស្នូលប៉ុណ្ណោះទេ ថែមទាំងជាមជ្ឈមណ្ឌលនៃកម្លាំងសាមគ្គីភាព។ តាមរយៈនោះ ប្រជាជនក្នុងភូមិស្រុកតែងតែជឿជាក់លើការដឹកនាំរបស់ព្រះអង្គ រួមចំណែកពង្រឹងស្មារតីសាមគ្គីក្នុងជនរួមជាតិ និងរឹតបន្តឹងចំណងសាមគ្គីភាពស្អិតរមួតរវាងបណ្តាជនជាតិបងប្អូន កិញ - ខ្មែរ - ហ្វា នៅលើភូមិឋានទៀតផង៕

ថាញហ៊ុង - ថាច់ធី

ចែករំលែកអត្ថបទ

ពាក្យគន្លឹះ