គោលនយោបាយ -ការរស់នៅ ការរស់នៅ

21/07/2026 - 21:31

ឃុំកូវកែ ចលនាប្រភពធនធានកសាងជនបទថ្មី

ពង្រីកស្មារតីសាមគ្គី ឯកភាពក្នុងប្រជាជន ឃុំកូវកែ ខេត្តវិញឡុង បានខិតខំចលនាប្រភពធនធានក្នុងសង្គម គួបផ្សំជាមួយប្រភពទុនរបស់រដ្ឋ ដើម្បីអនុវត្តនូវលក្ខឋានកសាងជនបទថ្មី។ ភូមិភាគមិនត្រឹមតែវិនិយោគលើហេដ្ឋារចនាសម្ព័ន្ធប៉ុណ្ណោះទេ ថែមទាំងផ្តោតសំខាន់លើការអភិវឌ្ឍសេដ្ឋកិច្ច កាត់បន្ថយភាពក្រីក្រ លើកកម្ពស់ជីវភាពប្រជាជន ក្នុងនោះផ្តោះសំខាន់លើជនរួមជាតិខ្មែរ។

រដ្ឋអំណាចភូមិភាគនិងអង្គការមហាជន ចុះពិនិត្យការដំឡើងអំពូលភ្លើង
ថាមពលព្រះអាទិត្យ។

រួមជាមួយនឹងការវិនិយោគលើហេដ្ឋារចនាសម្ព័ន្ធ ឃុំក៏បានជំរុញការផ្សព្វផ្សាយនិងចលនាប្រជាជន អង្គការនិងសប្បុរសជនរួមចំណែកកសាងសំណង់សុខុមាលភាពសង្គម។ ទន្ទឹមនឹងនោះ ភូមិភាគក៏ផ្តោតលើការបង្វែររចនាសម្ព័ន្ធការផលិត បណ្តុះបណ្តាលវិជ្ជាជីវៈ ផ្ទេរវិទ្យាសាស្ត្រនិងបច្ចេកវិទ្យា ជួយបង្កការងារធ្វើនិងកាត់បន្ថយភាពក្រីក្រដោយចីរភាព។ រហូតមកដល់ពេលនេះ ឃុំបានបង្កការងារធ្វើជូនពលករ ១.២២២ នាក់ ក្នុងនោះមានពលករ ៣២ នាក់កំពុងធ្វើការនៅបរទេសតាមកិច្ចសន្យាការងារ។

លោកហ្វិញមិញត្វឹង ប្រធានគណៈការងាររណសិរ្សភូមិសមលើង ឱ្យដឹង៖ “បច្ចុប្បន្ន ភូមិសមលើងមាន ៣៩៩ គ្រួសារដោយមានចំនួនប្រជាជនជាង ១.៦០០នាក់ ក្នុងនោះជនរួមជាតិខ្មែរស្រូបអត្រាជាង ៩៤%។ រាល់ពេលដែលភូមិភាគផ្សព្វផ្សាយអនុវត្តសំណង់សាធារណៈមាមីងតែងចូលរួមគាំទ្រ ហើយគ្រួសារជាច្រើនស្ម័គ្រចិត្តបរិច្ចាគដីនិងកាប់ដើមឈើដែលប៉ះពាល់ ដើម្បីសំណង់បានអនុវត្តស្របតាមល្បឿនដំណើរការ។ អាស្រ័យដោយការឯកភាពនិងការចូលរួមនោះ ទើបសំណង់ស្ពាន ផ្លូវជាច្រើនត្រូវបានកសាងរួចរាល់ រួមចំណែកតភ្ជាប់ផ្លូវចរាចរណ៍ និងបង្កលក្ខណ:ងាយស្រួលសម្រាប់ការអភិវឌ្ឍសេដ្ឋកិច្ច-សង្គមនៅភូមិភាគ។

អ្នកស្រី ថាច់ធីស៊ុមវណ្ណា អនុប្រធានគណៈកម្មាធិការប្រជាជនឃុំកូវកែ មានប្រសាសន៍៖ “ការលើកកម្ពស់គុណភាពលក្ខឋានជនបទថ្មី បានរួមចំណែកជំរុញការអភិវឌ្ឍសេដ្ឋកិច្ច-សង្គម រក្សាខ្ជាប់ការការពារជាតិ សន្តិសុខ និងលើកកម្ពស់ជីវភាពប្រជាជន។ ក្នុងដំណើរការកសាងជនបទថ្មី ជនរួមជាតិខ្មែរបានចូលរួមយ៉ាងសកម្មក្នុងការបរិច្ចាគដីនិងកម្លាំងពលកម្មកសាងស្ពាននិងផ្លូវគមនាគមន៍។ នៅភូមិសមលើង ប្រជាជនបានស្ម័គ្រចិត្តបរិច្ចាគដីសម្រាប់កសាងស្ពានឆ្លងកាត់ប្រឡាយកម្រិត II រួមចំណែកជួយសម្រួលការធ្វើដំណើរនិងការដឹកជញ្ជូនទំនិញ។ ចំណែកនៅភូមិអូរទទឹង B ប្រជាជនបានរួមវិភាគទានប្រមាណ ១៤០លានដុង ដើម្បីដំឡើងបង្គោលភ្លើងថាមពលព្រះអាទិត្យ ៧០ ដើម រួមចំណែកធានាសុវត្ថិភាពចរាចរណ៍ រក្សាសន្តិសុខសណ្តាប់ធ្នាប់ និងបង្កើនសោភណភាពជនបទ”។

តាមរយៈប្រភពទុនកសាងជនបទថ្មី ឃុំកូវកែបានវិនិយោគកសាងផ្លូវជនបទថ្មីនៅភូមិសមលើងកាន់តែស្រស់ស្អាត។

រហូតមកដល់បច្ចុប្បន្ន ឃុំកូវកែ មានផលិតផល OCOP ១៨ មុខ សម្រេចបទដ្ឋានផ្កាយ ៣ ដែលនៅមានសុពលភាព។ អត្រាគ្រួសារដែលសម្រេចកិត្តិនាមគ្រួសារវប្បធម៌ ៩៩,១១%។ ភូមិទាំង១៩/១៩ របស់ឃុំ សម្រេចបទដ្ឋានជនបទថ្មី ក្នុងនោះមានភូមិចំនួន៥ សម្រេចបទដ្ឋានជនបទថ្មីគំរូ។

ក្នុងប៉ុន្មានខែចុងឆ្នាំ២០២៦ ឃុំកូវកែ នឹងបន្តផ្តោតលើការអភិវឌ្ឍកសិកម្មតាមទិសដៅទំនើប ពង្រីកទម្រង់ផលិតដែលមានប្រសិទ្ធភាព លើកកម្ពស់គុណភាពលក្ខឋានជនបទថ្មី និងខិតខំធ្វើយ៉ាងណាគ្មាននៅគ្រួសារក្រីក្រ លើកលែងតែករណីដែលស្ថិតក្នុងគោលនយោបាយគាំពារសង្គម។ ដោយការចូលរួមនៃទូទាំងប្រព័ន្ធនយោបាយ និងការឯកភាពរបស់ប្រជាជន ជាពិសេសគឺជនរួមជាតិខ្មែរ ឃុំកូវកែ កំពុងតែកសាងទិដ្ឋភាពតំបន់ជនបទកាន់តែស្រស់ស្អាត ទំនើប បង្កជាមូលដ្ឋានដ៏រឹងមាំសម្រាប់ការអភិវឌ្ឍប្រកបដោយចីរភាពនាពេលខាងមុខ៕

ម៉ាល័យ - ពេជ្រសឿន

ចែករំលែកអត្ថបទ

ពាក្យគន្លឹះ