គោលនយោបាយ -ការរស់នៅ ការរស់នៅ

21/07/2026 - 08:58

ឃុំវិញហាយ អនុវត្តកម្មវិធីគោលនយោបាយមានប្រសិទ្ធភាពដល់តំបន់ជនជាតិភាគតិច

ដោយមានលក្ខណៈពិសេសដោយឡែកជាភូមិភាគនៅជាប់មាត់សមុទ្រ មានជនរួមជាតិខ្មែររស់នៅប្រមាណ ៧២% ឃុំវិញហាយបានផ្តុំកម្លាំងអនុវត្តព្រមៗគ្នានូវកម្មវិធី គោលនយោបាយដល់តំបន់ជនជាតិភាគតិច រួមចំណែកលើកកម្ពស់ជីវភាពសម្ភារៈ និងស្មារតីរបស់ប្រជាជន បង្កកម្លាំងជំរុញដើម្បីអភិវឌ្ឍសេដ្ឋកិច្ច - សង្គមដោយចីរភាពនៅភូមិភាគ។

មាមីងនៅភូមិដំបូក កំពុងថែដំណាំខ្ទឹមក្រហម។

អនុវត្តកម្មវិធីទិសដៅជាតិ ឃុំវិញហាយបានប្រមូលផ្តុំទូទាំងប្រព័ន្ធនយោបាយ អនុវត្តព្រមៗ គ្នានូវគម្រោងអនុគម្រោង សមស្របជាមួយនឹងលក្ខណៈជាក់ស្តែងរបស់ភូមិភាគ។ តាមរយៈនោះ សំណង់ហេដ្ឋារចនាសម្ព័ន្ធសំខាន់ៗជាច្រើនបានវិនិយោគ ជីវភាពរបស់ប្រជាជនបានកែលម្អជាលំដាប់ រួមចំណែកបន្ថយភាពក្រីក្រដោយចីរភាព និងកសាងផែនមហាសាមគ្គីជនជាតិ។ សមមិត្ត គីមថាញ់ទ្រុក ប្រធានការិយាល័យវប្បធម៌ - សង្គមឃុំវិញហាយ ឱ្យដឹង៖ “ឃុំបានផ្សព្វផ្សាយអនុវត្តហ្មត់ចត់ម៉ឺងម៉ាត់នូវវិធានការពន្លឿនការផ្តល់ផ្ទេរទុនវិនិយោគរបស់រដ្ឋឆ្នាំ ២០២៥ នៅលើភូមិឋានឃុំ ដូចជាអនុវត្តគម្រោងវិនិយោគរបស់រដ្ឋចំនួន ៥ គម្រោង មានប្រភពទុនបានផ្តល់ផ្ទេរសរុបចំនួន ៤,៥៨០ ពាន់លានដុង មកដល់ពេលនេះរំសាយទុនបាន ៤,១២៧ ពាន់លានដុង។ បន្តសហការជាមួយនឹងការិយាល័យជំនាញ ចង្អុលការដល់គណៈប្រជាជនភូមិនានា ត្រួតពិនិត្យ និងស្នើជួសជុលលូបង្ហូរទឹកមួយចំនួន និងជីកស្តារប្រឡាយធារាសាស្ត្រ ដើម្បីបម្រើតម្រូវការផលិតរបស់ប្រជាជន”។

ទន្ទឹមនឹងនោះ ឃុំបានយកចិត្តទុកដាក់វិនិយោគ បង្កើនកម្រិតប្រព័ន្ធផ្លូវគមនាគមន៍ជនបទ អគ្គិសនី ទឹកស្អាតប្រើប្រាស់ សាលារៀន និងសំណង់បម្រើជីវភាពប្រជាជននៅតាមភូមិដែលមានជនរួមជាតិខ្មែររស់នៅកុះករ។ ផ្តើមពីនោះ អនុវត្តមានប្រសិទ្ធភាពនូវគោលនយោបាយឧបត្ថម្ភសង់ផ្ទះ ការរកស៊ីចិញ្ចឹមជីវិត បណ្តុះបណ្តាលរបរ ដោះស្រាយការងារធ្វើ បង្កលក្ខណៈដើម្បីប្រជាជនអភិវឌ្ឍការផលិត បង្កើនប្រាក់ចំណូល។ គ្រួសារអ្នកមីងង៉ោធីថូន នៅភូមិដំបូក ឃុំវិញហាយ ឱ្យដឹង៖ “ពីមុនផ្ទះខ្ញុំមានភាពទ្រុឌទ្រោមខ្លាំងណាស់ ពេលមានភ្លៀងខ្យល់ម្តងៗ តែងទៅផ្ទះអ្នកជិតខាងជ្រកបណ្ដោះអាសន្ន ដោយសារបានរដ្ឋអំណាចភូមិភាគឧបត្ថម្ភសាងសង់ផ្ទះតាមកម្មវិធីទិសដៅជាតិ មានតម្លៃ ៦០ លានដុង ខ្ញុំសូមថ្លែងអំណរគុណចំពោះបក្សនិងរដ្ឋយ៉ាងក្រៃលែង ហើយខ្ញុំនឹងខិតខំបង្កបង្កើនផលដើម្បីចាកផុតពីភាពក្រីក្រដោយចីរភាព”។

លើវិស័យអភិវឌ្ឍសេដ្ឋកិច្ច ឃុំបានជំរុញការផ្សព្វផ្សាយ ណែនាំប្រជាជនអនុវត្តវិទ្យាសាស្ត្រ បច្ចេកវិទ្យាក្នុងការផលិតកសិកម្ម វារីវប្បកម្ម ពង្រីកឧត្តមភាពរបស់ភូមិភាគ ទន្ទឹមនឹងនោះ លើកទឹកចិត្តមាមីងបង្វែររចនាសម្ព័ន្ធពូជដំណាំ សត្វចិញ្ចឹម សមស្របជាមួយនឹងលក្ខណៈប្រែប្រួលអាកាសធាតុ។ គ្រួសារជនជាតិភាគតិចជាច្រើន បានមោះមុតវិនិយោគអភិវឌ្ឍផលិត ឈានឡើងលំនឹងជីវភាពជាបណ្តើរៗ។ ទន្ទឹមនឹងនោះ នៅទាំងយកចិត្តទុកដាក់ដល់គុណភាពអប់រំ ថែទាំសុខភាពប្រជាជន អភិរក្សនិងពង្រីកអត្តសញ្ញាណវប្បធម៌ប្រពៃណីរបស់ជនរួមជាតិខ្មែរ។ គោលនយោបាយសុខុមាលភាពសង្គមបានអនុវត្ត គ្រប់គ្រាន់ ទាន់ពេលវេលា; ការគិតគូរដល់គ្រួសារក្រីក្រ គ្រួសារក្បែរក្រ គ្រួសារគោលនយោបាយ និងអ្នកមានប្រិយភាពក្នុងជនជាតិភាគតិចបានអនុវត្តជាប្រចាំ។

នៅពេលខាងមុខ ឃុំវិញហាយនឹងបន្តពង្រីកប្រសិទ្ធភាពប្រភពធនធានពីកម្មវិធីទិសដៅជាតិ ផ្តុំកម្លាំងអនុវត្តវិធានការបន្ថយភាពក្រីក្រដោយចីរភាព អភិវឌ្ឍការរកស៊ីចិញ្ចឹមជីវិត លើកកម្ពស់គុណភាពប្រភពធនធានមនុស្ស កសាងហេដ្ឋារចនាសម្ព័ន្ធព្រមៗគ្នា រួមចំណែកលើកកម្ពស់ជីវភាពសម្ភារៈ និងស្មារតីរបស់ជនជាតិភាគតិច បង្កជាមូលដ្ឋានគ្រឹះរឹងមាំដើម្បីភូមិភាគអភិវឌ្ឍដោយចីរភាព៕

ដាលីន - វិមាន

ចែករំលែកអត្ថបទ

ពាក្យគន្លឹះ