គោលនយោបាយ -ការរស់នៅ ការរស់នៅ

08/10/2025 - 08:04

ឃុំឡុងភូ ពង្រីកប្រសិទ្ធភាពកម្មវិធីទិសដៅជាតិអភិវឌ្ឍសេដ្ឋកិច្ច-សង្គមតំបន់ជនជាតិភាគតិច

ក្នុងប៉ុន្មានឆ្នាំកន្លង ដោយការផ្សព្វផ្សាយអនុវត្តប្រកបដោយប្រសិទ្ធភាពនូវកម្មវិធីទិសដៅជាតិអភិវឌ្ឍសេដ្ឋកិច្ច-សង្គមតំបន់ជនជាតិភាគតិចនិងតំបន់ភ្នំដំណាក់កាល ២០២១-២០២៥ ទើបជីវភាពសេដ្ឋកិច្ចរបស់មាមីងខ្មែរនៅឃុំឡុងភូ ទីក្រុងកឹងធើកាន់តែរីកចម្រើន។

គ្រួសារលោកគឹមវិត នៅភូមិទឹកប្រៃ២ ឃុំឡុងភូ ទីក្រុងកឹងធើ ទទួលបានការឧបត្ថម្ភគោមេបន្តពូជ។

ឃុំឡុងភូ មានចំនួនប្រជាជនជិត ៦០% ជាជនរួមជាតិខ្មែរ។ រយៈពេល ៥ ឆ្នាំកន្លង ឃុំឡុងភូបានផ្ដុំកម្លាំងផ្សព្វផ្សាយប្រភពទុនដើម្បីអនុវត្តកម្មវិធីទិសដៅជាតិអភិវឌ្ឍសេដ្ឋកិច្ច-សង្គម តំបន់ជនជាតិភាគតិចនិងតំបន់ភ្នំ ដំណាក់កាលទី ១ (២០២១ - ២០២៥) (ហៅកាត់ថា កម្មវិធី) ជាពិសេសគឺគម្រោងទី ១ (ដោះស្រាយស្ថានភាពខ្វះដីធារផ្ទះសង់លំនៅឋាន ដីផលិត ទឹកស្អាតប្រើប្រាស់ និងផ្លាស់ប្តូរមុខរបរ) និងគម្រោងទី ៣ (អភិវឌ្ឍផលិតកសិ-រុក្ខកម្មប្រកបដោយចីរភាព ពង្រីកសក្តានុភាពនិងឧត្តមភាពនៃតំបន់នីមួយៗដើម្បីផលិតមុខទំនិញទៅតាមតម្លៃ) បាននាំមកនូវប្រសិទ្ធភាពជាក់ស្តែង។ យោងតាមរបាយការណ៍អំពីលទ្ធផលនៃការអនុវត្តកម្មវិធី ប្រភពទុនបែងចែកដល់ឃុំឡុងភូ ជិត៦០ ពាន់លានដុង ក្នុងនោះ ថវិការដ្ឋជិត ៥០ ពាន់លានដុង ក្រៅពីនោះ គឺ ជាថវិកាបដិភាគរបស់ភូមិភាគ។

ចំពោះគម្រោងទី ១ ឃុំឡុងភូឧបត្ថម្ភសាងសង់ផ្ទះជូនគ្រួសារក្រីក្រនិងគ្រួសារក្បែរក្របាន ១៥០ ខ្នង ឧបត្ថម្ភ ៨០ គ្រួសារទទួលបានប្រភពទឹកស្អាតប្រើប្រាស់ និងជិត ២០០ គ្រួសារបានឧបត្ថម្ភផ្លាស់ប្តូរមុខរបរ។ ទទួលបានប្រាក់ឧបត្ថម្ភ ១០ លានដុងពីគោលនយោបាយសម្រាប់ផ្លាស់ប្ដូរមុខរបរ អ្នកមីង ថាច់ធីហេង នៅភូមិទឹកប្រៃ ២ ឱ្យដឹងដោយក្ដីរីករាយ៖ “អាស្រ័យកម្មវិធីឧបត្ថម្ភ ទើបខ្ញុំទិញបានម៉ាស៊ីនបាញ់ថ្នាំនិងម៉ាស៊ីនព្រោះស្រូវ។ បន្ទាប់ពីមានឧបករណ៍ឯកជនទាំងនេះ ការធ្វើស្រែកាន់តែងាយស្រួល ប្រិតសំចៃបានថ្លៃជួល ទិន្នផលស្រូវក៏មានភាពនឹងនរ។ កូនខ្ញុំអាចទៅស៊ីឈ្នួលបាញ់ថ្នាំ រកប្រាក់ចំណូលបន្ថែមសម្រាប់ផ្គត់ផ្គង់ជីវភាព។ ខ្ញុំដឹងគុណយ៉ាងខ្លាំងចំពោះការយកចិត្តទុកដាក់របស់រដ្ឋ”។

ទន្ទឹមនឹងនោះ ឃុំឡុងភូនៅទាំងផ្សព្វផ្សាយ ប្រកបដោយប្រសិទ្ធភាពនូវទម្រង់ឧបត្ថម្ភគោមេបន្តពូជ ចំណុះគម្រោងទី៣នៃកម្មវិធីទៀតផង គ្រួសារនីមួយៗទទួលបានគោ ២ ក្បាល។ នេះបានចាត់ទុកជាទិសដៅចីរភាព ជួយប្រជាជនមានមុខរបររកស៊ីយូរអង្វែង។ គ្រួសារលោក គឹមវិត នៅភូមិទឹកប្រៃ ២ ជាគ្រួសារគំរូ។ លោកវិត មានប្រសាសន៍ទាំងក្ដីរីករាយ៖ “នៅឆ្នាំ ២០២២ គ្រួសារខ្ញុំចំណុះគ្រួសារក្បែរក្រ ម្ល៉ោះហើយបានទទួលការឧបត្ថម្ភគោសម្រាប់ចិញ្ចឹម២ក្បាល។ ខ្ញុំប្រឹងប្រែងថែទាំ រហូតមកទល់ពេលនេះ ហ្វូងគោបានកើនឡើង ៤ ក្បាល។ ដោយសារមានហ្វូងគោ ទើបខ្ញុំមិនសូវបារម្ភក្នុងចិត្ត ដ្បិតអី គ្រួសារមានមុខរបររកស៊ីកាន់តែធូរធារ ជីវភាពក៏មិនសូវលំបាក”។

តាមប្រសាសន៍លោកយឿងថាញត្វង អនុលេខាប្រចាំការនៃគណៈកម្មាធិការបក្សឃុំឡុងភូ ឱ្យដឹងថា ក្នុងដំណាក់កាល ២០២១ - ២០២៥ ផ្អែកលើស្ថានភាពជាក់ស្តែង ភូមិភាគបានផ្សព្វផ្សាយ ៦/១០ គម្រោងចំណុះកម្មវិធី។ “ចាប់តាំងពីពេលនោះមក មានគ្រួសារជាច្រើនមានលក្ខណៈរស់នៅសុខសាន្ត ផលិតមានភាពងាយស្រួល ជីវភាពបានកែលម្អជាបណ្ដើរៗ។ រយៈពេលខាងមុខ ឃុំនឹងបន្តពិនិត្យឡើងវិញនូវតម្រូវការជាក់ស្តែង រួមផ្សំប្រភពទុន ជំរុញកម្លាំងផ្ទៃក្នុងរបស់ប្រជាជន ដើម្បីបង្កមុខរបររកស៊ីដោយចីរភាព រួមចំណែកកសាងជនបទថ្មីកម្រិតខ្ពស់” - លោកត្វង បានបញ្ជាក់ដូច្នោះ។

ជាពិសេស ដោយសារផ្សព្វផ្សាយកម្មវិធីប្រកបដោយប្រសិទ្ធភាព ក្នុងខែសីហា ឆ្នាំ២០២៥ គណៈកម្មាធិការប្រជាជនឃុំឡុងភូ មានកិត្តិយសបាននាយករដ្ឋមន្រ្តីនៃរដ្ឋាភិបាល ជូនប័ណ្ណសរសើរ ព្រោះមានស្នាដៃឆ្នើមក្នុងការអនុវត្តកម្មវិធីទិសដៅជាតិអភិវឌ្ឍសេដ្ឋកិច្ចសង្គមតំបន់ជនជាតិភាគតិចនិងតំបន់ភ្នំ ដំណាក់កាល ២០២១ - ២០២៥។ នេះជាការទទួលស្គាល់ចំពោះការខិតខំប្រឹងប្រែងមិនចេះនឿយហត់របស់រដ្ឋអំណាច និងប្រជាជននៅភូមិភាគ៕

ហុងទើ-ថាច់ធី

ចែករំលែកអត្ថបទ

ពាក្យគន្លឹះ