មហាសាមគ្គីជនជាតិ ភូមិស្រុកផ្លាស់ថ្មី

09/06/2025 - 15:14

ធ្វើមានអាស្រ័យទម្រង់ដាំផ្កាអង្គាសីលចន្លោះដើមដូង

ដោយសារអនុវត្តវិទ្យាសាស្ត្រ - បច្ចេកទេសជឿនលឿនក្នុងការផលិត ពូថាច់មុាំង នៅភូមិគិញស៊ុយ ឃុំថាញម៉ី ស្រុកចូវថាញ់ ខេត្តត្រាវិញ អនុវត្តទម្រង់ដាំផ្កាអង្គាសីល ចន្លោះដើមដូងរកបានប្រាក់ចំណូលលំនឹង។

ពូថាច់ម៉ាំង កំពុងថែទាំផ្កាអង្គាសីល ផ្សាំមែកឱ្យចេញផ្កាច្រើនសម្រាប់ផ្គត់ផ្គង់ទីផ្សារ។

ពូថាច់មុាំង ឱ្យដឹង៖ “មកពីចូលចិត្តដើមឈើលម្អ ឆ្នាំ ២០២០ ខ្ញុំសម្រេចចិត្តលើកចម្ការ ៥,៥ កុងដី ដែលធ្វើស្រែផ្តល់ទិន្នផលទាបងាកមកដាំដូងវិញ ដោយប្រើប្រាស់អស់លទ្ធភាពនូវដីទំនេរតាមចន្លោះដើមដូង និងដីទំនេរជុំវិញផ្ទះខ្ញុំដាំផ្កាអង្គាសីល។ ផ្កាអង្គាសីលដែលខ្ញុំជ្រើសរើសដាំមានទាំងដើមតូចធំ ទំហំចាប់ពី ២០- ៥០ សង់ទីម៉ែត្រ។ បច្ចុប្បន្ន ចម្ការផ្កាអង្គាសីលរបស់ខ្ញុំមានប្រមាណ ៤០០ ដើម តម្លៃជាង ៤០០ លានដុង។ ដោយសារស្វែងយល់បទពិសោធន៍ដាំផ្កាអង្គាសីលតាមរយៈសៀវភៅ កាសែត និងបទពិសោធន៍ពីមិត្តភក្តិដែលដាំផ្កាអង្គាសីល ក្នុងដំណាក់កាលនៃការតាក់តែងដើម ខ្ញុំធ្វើដោយខ្លួនឯង កាត់បន្ថយបានប្រាក់ចំណាយ។ ជាមួយទម្រង់ដាំផ្កាអង្គាសីលចន្លោះដើមដូង រៀងរាល់ឆ្នាំ ខ្ញុំរកចំណេញបានជិត ២០០ លានដុង”។

ក្រៅពីទម្រង់ដាំផ្កាអង្គាសីលចន្លោះដើមដូង ពូថាច់មុាំង ទើបទិញផ្កាអង្គាសីលប្រមាណ ១២០ ដើម ទំហំជាមធ្យមចាប់ពី ៣០-៦០ សង់ទីម៉ែត្រ សរុបទឹកប្រាក់ប្រមាណ ១២៥ លានដុង យកមកផ្សាំមែកដើម្បីឱ្យចេញផ្កាច្រើនសម្រាប់ផ្គត់ផ្គង់ទីផ្សារបុណ្យចូលឆ្នាំវៀតណាមឆ្នាំ២០២៦។ ជាមួយទម្រង់ផ្សាំមែកផ្កាអង្គាសីល ដើម្បីលក់នៅផ្សារនាឱកាសចូលឆ្នាំវៀតណាមប៊ិញង៉ ឆ្នាំ២០២៦។ ពូថាច់មុាំង សង្ឃឹមថានឹងរកបានប្រាក់ចំណេញ ១០០ លានដុង។

ក្រៅពីអនុវត្តទម្រង់ខាងលើ ពូថាច់មុាំង ឱ្យដឹងបន្ថែម៖ “ដើម្បីលើកកម្ពស់ថ្វីដៃនិងមានការងារធ្វើ ដើម្បីបង្កើនប្រាក់ចំណូល កន្លងហើយខ្ញុំបានចូលរួមជាសមាជិកសហករណ៍កសិកម្ម - ពាណិជ្ជកម្ម - សេវាកម្មដាយថាញ់ផាក នៅទីប្រជុំជនចូវថាញ់ ស្រុកចូវថាញ់ ខេត្តត្រាវិញផងដែរ។ សហករណ៍នេះជំនាញផ្នែកខាងវិស័យផ្កាលម្អនិងឈើដំណាំ ម្ល៉ោះហើយ សមស្របនឹងរបរដាំផ្កាអង្គាសីលរបស់ខ្ញុំផ្ទាល់តែម្តង។ ចូលសហករណ៍បានចូលរួមវគ្គហ្វឹកហាត់អំពីការដាំផ្កាលម្អដែលសហករណ៍បានសហការជាមួយផ្នែកជំនាញរៀបចំឡើង ថ្វីដៃរបស់ខ្ញុំត្រូវបានលើកកម្ពស់ពីមួយថ្ងៃទៅមួយថ្ងៃ។ ក្រៅពីនេះ នៅពេលសហករណ៍បានចុះកិច្ចសន្យាថែទាំផ្កាលម្អនៅតាមស្ថាប័ន អង្គភាព ឯកជន៘ ខ្ញុំក៏បានចូលរួមថែទាំក្នុងមួយថ្ងៃរកបានប្រាក់ចំណូលចាប់ពី៣០០.០០០ - ៣៥០.០០០ដុង/ថ្ងៃ ខ្ញុំត្រេកអរណាស់”។

លោកង្វៀងជីហ៊ីប ប្រធានគណៈកម្មាធិការប្រជាជនឃុំថាញម៉ី ឱ្យដឹង៖ “ប៉ុន្មានឆ្នាំកន្លង ភូមិភាគតែងជំរុញទឹកចិត្តមាមីង ឱ្យកែប្រែចម្ការស៊ុបទ្រុប ផ្តល់ទិន្នផលទាប ងាកមកដាំឆ្លាស់គ្នា ឬដាំប្រភេទដំណាំដែលផ្តល់ទិន្នផលខ្ពស់និងគុណភាពល្អ។ តួយ៉ាងដូចគ្រួសារពូថាច់មុាំង ជាគ្រួសារមួយដែលព្យាយាមស៊ូទ្រាំលំបាករៀនសូត្រ អនុវត្តវិទ្យាសាស្ត្រ - បច្ចេកទេសជឿនលឿនក្នុងការផលិត ហើយក៏ជាគំរូឈានមុខក្នុងភូមិភាគ ប្តូរពីដីផ្តល់ទិន្នផលទាប ងាកមកដាំផ្កាអង្គាសីល ចន្លោះដើមដូងមានប្រសិទ្ធភាព រកបានប្រាក់ចំណូលខ្ពស់លើផ្ទៃដីវប្បកម្មតែមួយ”៕

សើុងម៉ាល័យ- លីសៀ

ចែករំលែកអត្ថបទ

ពាក្យគន្លឹះ