មហាសាមគ្គីជនជាតិ ភូមិស្រុកផ្លាស់ថ្មី

26/05/2025 - 12:53

ភាពផ្លាស់ថ្មីនៅតំបន់ជនបទ

បច្ចុប្បន្ន ឃុំនានាដែលមានជនរួមជាតិខ្មែររស់នៅកុះកររបស់ខេត្តសុកត្រាំង តែងសម្រេចបទដ្ឋានជនបទថ្មី ជនបទថ្មីកម្រិតខ្ពស់ និងជនបទថ្មីគំរូ។ ផ្តើមពីនោះ ធ្វើឱ្យមុខមាត់ជនបទកាន់តែមានភាពស្រស់បំព្រង ជឿនលឿនមិនខុសពីទីក្រុងឡើយ។

ដងផ្លូវចូលទៅឃុំឡឹមតឹង ត្រូវបានក្រាលកៅស៊ូយ៉ាងសមរម្យ។

ក្នុងរយៈកាល ១០ ឆ្នាំកសាងជនបទថ្មីកម្រិតខ្ពស់ ឃុំឡឹមតឹង ស្រុកថាញ់ទ្រី បានវិនិយោគទុនជាង ១៣១ ពាន់លានដុង។ សព្វថ្ងៃ ដងផ្លូវជនបទក្នុងឃុំទាំងអស់ត្រូវបានក្រាលក្រួសចាក់បេតុងជាង៩១%; ប្រាក់ចំណូលមធ្យមភាគលើមនុស្សម្នាក់សម្រេច ៧២,៧៥ លានដុង/ឆ្នាំ; អត្រាគ្រួសារក្រីក្រពហុវិមាត្រកាត់បន្ថយនៅ ២% ។ល។ ចំណាប់អារម្មណ៍ចំពោះជនបទផ្លាស់ថ្មី លោកលីចៀង នៅឃុំឡឹមតឹង មានប្រសាសន៍៖ “ឡឹមតឹង ជាឃុំស្ថិតនៅតំបន់ឆ្ងាយដាច់ស្រយាល ពីមុនមាមីងត្រូវការទៅណាមកណាម្ដងៗ ភាគច្រើនគឺប្រើប្រាស់ទូកបីស្លឹកនិងដើរថ្មើរជើង។ រីឯសព្វថ្ងៃ ដងផ្លូវនានាត្រូវបានក្រាលបេតុងតភ្ជាប់ទៅដល់ឃុំនិងភូមិនានា យានយន្តបើកដល់ផ្ទះ។ តាមដងផ្លូវជនបទដាក់អំពូលភ្លើងបំភ្លឺផ្លូវសងខាងផ្លូវដាំផ្កាលម្អ; ទូទាំងភូមិឃើញសុទ្ធតែផ្ទះឥដ្ឋសមរម្យ មាមីងមានមធ្យោបាយសព្វគ្រប់សម្រាប់ការធ្វើដំណើរនិងប្រើប្រាស់ប្រជុំជីវភាព។ ពិសេស មាមីងខ្មែរចេះធ្វើអាជីវកម្ម ជួញដូរនិងអនុវត្តវិទ្យាសាស្ត្របច្ចេកទេសក្នុងការបង្កបង្កើនផល ជំរុញសេដ្ឋកិច្ចរីកចម្រើន រកបានប្រាក់ចំណូលលំនឹង ជីវភាពត្រូវបានកើនឡើង ធ្វើឱ្យមុខមាត់ជនបទមានភាពផ្លាស់ថ្មី”។

ប្រព័ន្ធធារាសាស្ត្រត្រូវបានវិនិយោគសម្រេចជាស្ថាពរ ធានាមានទឹកសាបគ្រប់គ្រាន់ មាមីងខ្មែរនៅឃុំថាញ់ភូដាំដំណាំបានខួបប្រាំងវស្សា ដើម្បីបង្កើនប្រាក់ចំណូល។

ចំណែកលោក ត្រឹងថាញប៊ិញ នៅភូមិព្រែកអណ្តើក ឃុំថាញ់ភូ ស្រុកមីស្វៀង ឱ្យដឹង៖ “ឥឡូវនេះ មាមីងខ្មែរយល់ដឹងយ៉ាងច្បាស់ការកសាងជនបទថ្មីគឺបម្រើផលប្រយោជន៍ប្រជាជន ដូច្នេះ មាមីងស្របគំនិតអនុវត្ត។ ត្រេកអរបំផុតសព្វថ្ងៃនេះនៅគ្រប់ភូមិទាំងអស់សុទ្ធតែមានសាលារៀនសមរម្យ ម៉្លោះហើយ កូនចៅមាមីងខ្មែរបានទៅរៀនគ្រប់គ្នា។ មានចំណេះដឹងមាមីងខ្មែរប្រកបរបរជួញដូរ ធ្វើអាជីវកម្ម ចេះអនុវត្តវិទ្យាសាស្ត្របច្ចេកទេសក្នុងការដាំដុះ ចិញ្ចឹមសត្វប្រកបដោយប្រសិទ្ធភាព ផ្តល់ប្រាក់ចំណូលខ្ពស់។ ឥឡូវ មាមីងខ្មែរនៅតំបន់ជនបទមានជីវភាពល្អប្រសើរ ភូមិ ស្រុកកាន់តែស្រស់បំព្រង”។

មកទល់ពេលនេះ ទូទាំងខេត្តសុកត្រាំងមាន ៧៥ ឃុំសម្រេចបទដ្ឋានជនបទថ្មី ក្នុងនោះ មានឃុំជនបទថ្មីកម្រិតខ្ពស់ចំនួន ៣០ ឃុំជនបទថ្មីគំរូ ចំនួន ៣ និងមានអង្គភាពថ្នាក់ស្រុកចំនួន ៥ ត្រូវបានទទួលស្គាល់សម្រេចបទដ្ឋាន និងអនុវត្តសម្រេចភារកិច្ចកសាងជនបទថ្មី។ តាមប្រសាសន៍លោក វឿងក្វឹកណាម អនុប្រធានគណៈកម្មាធិការប្រជាជនខេត្តសុកត្រាំង លទ្ធផលសម្រេចបានក្នុងការកសាងជនបទថ្មីកម្រិតខ្ពស់ គឺជាដំណាក់ការកៀរគរ រាល់ប្រភពកម្លាំងរបស់ទូទាំងប្រព័ន្ធនយោបាយ ជាពិសេស គឺថ្នាក់មូលដ្ឋាននិងទទួលការគាំទ្រយ៉ាងពេញទំហឹងពីសំណាក់ប្រជាជន។ បច្ចុប្បន្ន ប្រព័ន្ធហេដ្ឋារចនាសម្ព័ន្ធត្រូវបានវិនិយោគសព្វគ្រប់; ប្រព័ន្ធធារាសាស្ត្រធានាមានទឹកសាបគ្រប់គ្រាន់សម្រាប់បម្រើការផលិតរបស់ប្រជាជន; សាលារៀន ដំណាក់សុខាភិបាល អគ្គិសនី ទឹកស្អាត។ល។ ត្រូវបានវិនិយោគសម្រេចជាស្ថាពរ។ ផ្តើមពីនោះ ជំរុញការអភិវឌ្ឍសេដ្ឋកិច្ចតំបន់ជនបទ សំខាន់បំផុតគឺនៅតំបន់ដែលមានជនរួមជាតិខ្មែររស់នៅកុះករ៕

យ្វីអាញ-មុនី

ចែករំលែកអត្ថបទ

ពាក្យគន្លឹះ