រៀងរាល់ឆ្នាំ ស្ថានីយវិទ្យុនិងទូរទស្សន៍សុកត្រាំង តែងសហការជាមួយនឹងមន្ទីរអប់រំនិងបណ្តុះបណ្តាលខេត្ត រៀបចំពានរង្វាន់បាល់ទាត់កុមារ- ដណ្តើមពានទូរទស្សន៍សុកត្រាំង (STV)។ នេះក៏ជាទីលានកម្សាន្តដ៏ត្រឹមត្រូវមានប្រយោជន៍ និងជាឱកាសសម្រាប់សិស្សានុសិស្សលេងកម្សាន្ត លម្ហែអារម្មណ៍ក្នុងរដូវវិស្សមកាល។
![ទីលានកម្សាន្តមានប្រយោជន៍សម្រាប់កុមារ](https://baocantho.com.vn/image/fckeditor/upload/2024/20240723/images/khmer/85.jpg)
ពានរង្វាន់បាល់ទាត់កុមារ - ដណ្តើមពាន STV គឺជាទីលានកម្សាន្តមានប្រយោជន៍
សម្រាប់កុមារក្នុងរដូវវិស្សមកាល។
ពានរង្វាន់បាល់ទាត់កុមារ - ដណ្តើមពាន STV លើកទី៦ មានក្រុមបាល់ទាត់ចូលរួមចំនួន២២ក្រុម មកពីអង្គភាពស្រុក ទីរួមខេត្ត ក្រុងចំនួន១១។ ពានរង្វាន់នេះ សំដៅលើកកម្ពស់សុខភាពកាយសម្បទា និងបង្កជាទីលានកម្សាន្តដ៏មានប្រយោជន៍ លើកទឹកចិត្តដល់ចលនាប្រកួតវិញ្ញាសាកីឡាបាល់ទាត់សម្រាប់កុមារក្នុងរដូវវិស្សមកាល។ នេះក៏ជាឱកាសដើម្បីសិស្សនៅតាមអង្គភាពសាលាបឋមសិក្សានានាលើភូមិសាស្រ្តខេត្តចូលរួមប្រកួត ដោះដូរនិងរៀនសូត្របទពិសោធន៍ទៅវិញទៅមក ឈរលើស្មារតី “សប្បាយរីករាយ សុខភាពល្អ រៀនសូត្រល្អ”។
បច្ចុប្បន្ន ចលនាបាល់ទាត់កុមារតែងបានសាលានានាយកចិត្តទុកដាក់និងអភិវឌ្ឍន៍ពីមួយថ្ងៃទៅមួយថ្ងៃ និងបង្កើតទីលានកម្សាន្តមានប្រយោជន៍ដល់សិស្សានុសិស្សក្នុងរដូវវិស្សមកាល។ លោកគ្រូថាច់សារឿន គ្រូបង្វឹកក្រុមបាល់ទាត់ទីរួមខេត្តវិញចូវ ឱ្យដឹង៖ “ប្អូនៗបឋមសិក្សាចូលចិត្តលេងបាល់ទាត់ណាស់ ម្ល៉ោះហើយពេលហៅប្រមូលហ្វឹកហាត់ ដើម្បីចូលរួមប្រកួតបាល់ទាត់កុមារ - ដណ្តើមពាន STV អ្នកណាក៏ត្រេកអរ។ ផ្តើមពីនោះ ឱ្យតែដល់ម៉ោងគឺប្អូនៗតែងមានវត្តមាន ខ្នះខ្នែងហ្វឹកហាត់ គោរពលក្ខការណ៍និងមានស្មារតីសាមគ្គីជាមួយមិត្តរួមក្រុមខ្ពស់។ ពាន រង្វាន់ពិតជាបង្កើតភាពរីករាយដល់ប្អូនៗកម្សាន្តសប្បាយតាមចំណង់ចំណូលចិត្តចំពោះវិញ្ញាសាកីឡាបាល់ទាត់ដែលប្អូនៗចូលចិត្ត ជាទីលានកម្សាន្តមានប្រយោជន៍ក្នុងរដូវវិស្សមកាល”។ ប្អូនថាច់យ៉ាហ្វី អង្គភាពទីរួមខេត្តវិញចូវ ឱ្យដឹង៖ “ពេលដឹងថា សាលាជ្រើសប្អូនចូលរួមហ្វឹកហាត់ ដើម្បីប្រកួតដណ្តើមពានរង្វាន់ ប្អូនមានសេចក្តីត្រេកអរក្រៃលែង! ពីព្រោះប្អូនចូលចិត្តកីឡាបាល់ទាត់ណាស់។ ក្រោយពីហ្វឹកហាត់ជាង១ខែ ប្អូនដឹងពីរបៀបលេង និងក្តាប់បានច្បាប់លេងបាល់ទាត់ ម្ល៉ោះហើយសហការគ្នាបានល្អជាមួយមិត្ត រួមក្រុមលេងអស់ពីលទ្ធភាពដើម្បីដណ្តើមជ័យជម្នះជូនក្រុម”។ ចំណែកប្អូនលីគីមបាំង អង្គភាពក្រុងសុកត្រាំង ឱ្យដឹង៖ “ក្នុងរដូវវិស្សមកាល បានលេងបាល់ទាត់គឺស្កប់ចំណង់ចំណូលចិត្តរបស់ប្អូនហើយ។ ចូលក្រុមបាល់ទាត់មិនត្រឹមតែលត់ដំសុខភាពប៉ុណ្ណោះទេ ប្អូននៅទាំងចេះពីបច្ចេកទេសលេងបាល់បន្ថែមទៀតផង។ ក្នុងពេលហ្វឹកហាត់និងប្រកួត ពួកប្អូនតែងស្តាប់តាមគ្រូបង្វឹកនិងអាជ្ញាកណ្តាល ដើម្បីសម្រេចបានស្នាដៃខ្ពស់បំផុត។ ពិសេស ចូលរួមពានរង្វាន់គឺប្អូនបានឆ្លងកាត់បទពិសោធន៍រដូវវិស្សមកាលពោរពេញដោយភាពសប្បាយរីករាយ និងសុភមង្គល”។
ពានរង្វាន់បាល់ទាត់កុមារ - ដណ្តើមពាន STV លើកទី៦ - ២០២៤ បានក្លាយជាទីលានកម្សាន្តមានប្រយោជន៍ និងគួរឱ្យចាប់អារម្មណ៍ដល់កុមារក្នុងរដូវវិស្សមកាល។ ពានរង្វាន់ក៏ជាមូលដ្ឋានជួយឱ្យភូមិភាគយកចិត្តទុកដាក់អភិវឌ្ឍវិស័យកីឡាបាល់ទាត់ នេះក៏ជាទីតាំងដែលប្រទះឃើញនិងជ្រើសរើសកីឡាករមានទេពកោសល្យសម្រាប់កីឡាបាល់ទាត់របស់ខេត្តផងដែរ៕
យ្វីអាញ-វិមាន