សុខភាព - អប់រំ អប់រំ

24/12/2018 - 15:29

ឆន្ទៈឆ្លងកាត់លំបាករបស់យុវតីនិស្សិត

រង្វាន់ KOVA លើកទី១៦ ឆ្នាំ២០១៨ យុវតីត្រាធីសុជាតា ជានិស្សិតសាកលវិទ្យាល័យកឹងធើ បានយកឈ្នះលើបេក្ខជនដទៃទៀតនៃសាកលវិទ្យាល័យរដ្ឋ(ប្រព័ន្ធរៀបរយ) ទូទាំងប្រទេសដើម្បីក្លាយជានិស្សិតម្នាក់ក្នុងចំណោមនិស្សិតទាំង១៥១នាក់ ទទួលបាន” អាហារូបករណ៍ឆន្ទៈឈានឡើង”។ នេះជារង្វាន់ដ៏សក្តិសមសម្រាប់យុវតីនិស្សិតខ្មែរក្រីក្ររៀនពូកែ។

ត្រាធីសុជាតា

ត្រាធីសុជាតា មានភូមិកំណើតនៅឃុំវិញហាយ ក្រុងវិញចូវ ខេត្តសុកត្រាំង ជានិស្សិតជំនាន់ទី៤១ ផ្នែកអក្សរសាស្រ្តនៃសាកលវិទ្យាល័យកឹងធើ។ សុជាតារ៉ាយ រ៉ាប់៖ “គ្រួសារប្អូនមានដីតែ៥០០ម២ សម្រាប់ដាំខ្ទឹមក្រហមនិងធ្វើស្រែ។ល។ រៀងរាល់ឆ្នាំរកបានចំណូលតែបន្តិចបន្តួច។ ឪពុកខ្ញុំធ្វើស្រែបណ្តើរធ្វើការឈ្នួលបណ្តើរ រីឯម្តាយនៅផ្ទះចិញ្ចឹមសត្វ។ ថ្វីបើជីវភាពគ្រួសារលំបាកខ្លាំងក៏ពិតមែន ប៉ុន្តែឪពុកម្តាយប្អូនតែងជំរុញឲ្យកូនៗរៀនសូត្រជានិច្ច”។

ជ្រាបច្បាស់ពីស្ថានភាពគ្រួសារ ម្ល៉ោះហើយសុជាតា តែងខិតខំប្រឹងប្រែងសិក្សារៀនសូត្រ។ រយៈពេល១២ឆ្នាំរៀនសូត្រ លទ្ធផលសិក្សារបស់សុជាតាសម្រេចនិទ្ទេសពូកែរៀងរាល់ឆ្នាំ ចំណែកលទ្ធផលពិន្ទុមធ្យមភាគសន្សំប្រចាំមុខវិជ្ជារៀននៅសាកលវិទ្យាល័យកឹងធើ សព្វថ្ងៃក៏ជាប់ជានិទ្ទេសពូកែផងដែរ។ មិនតែប៉ុណ្ណោះ ចាប់ពីឆ្នាំសិក្សាទី២ ពេលធ្លាប់នឹងជីវភាពនិស្សិតសុជាតា ក៏បានបែងចែកពេលវេលារៀនសូត្រផងនឹងចូលរួមសកម្មភាពចលនាយុវជនវិស្សមកាលស្ម័គ្រចិត្ត សប្តាហ៍បៃតង។ល។ ត្រាធីសុជាតា បានរ៉ាយរ៉ាប់៖ ឆ្នាំដំបូង ប្អូនដើរពីអន្តេវាសិកដ្ឋានទៅបន្ទប់រៀន។ ឆ្នាំសិក្សាទី២ ឪពុកម្តាយគាត់ទិញកង់ឲ្យប្អូន។ មានមធ្យោបាយជិះទៅមក ប្អូនបានសូមអនុញ្ញាតឪពុកម្តាយចេញនៅផ្ទះសំណាក់ខាងក្រៅ ដើម្បីរៀនបណ្តើរ រកការងារធ្វើបណ្តើរ រួចក៏បានឪពុកម្តាយយល់ព្រម។ ប្អូនសុំធ្វើបុគ្គលិកបម្រើពិធីស៊ីលៀង ថ្វីបើប្រាក់រកបានមិនច្រើនក៏ពិតមែន ប៉ុន្តែអាចមានប្រាក់បន្ថែមសម្រាប់ផ្គត់ផ្គង់ការចាយវាយរៀនសូត្រ។ ឪពុកម្តាយឡើងមកឃើញខ្ញុំជិះកង់ទៅធ្វើការឆ្ងាយលំបាកពេក ទើបទិញម៉ូតូឲ្យខ្ញុំ។ ដឹងដែរថា នេះជាទឹកប្រាក់ដែលឪពុកម្តាយខិតខំពលកម្មដោយលំបាកទើបបានមក ម្ល៉ោះហើយប្អូនមិនធ្វេសប្រហែសក្នុងការរៀនសូត្រឡើយ”។

មានថ្ងៃមួយ ចៃដន្យបានអានសេចក្តីប្រកាសរបស់សាលាអំពីរង្វាន់ KOVA ត្រាធីសុជាតា បានផ្ញើសំណុំបែបបទ ចុះឈ្មោះចូលរួម”អាហារូបករណ៍ឆន្ទៈឈានឡើង”។ ថ្វីបើដូច្នោះក្តី លក្ខន្តិកៈរបស់អាហារូបករណ៍នេះ មានភាពតឹងតែងខ្លាំងណាស់៖ គឺសម្រាប់និស្សិតសាកលវិទ្យាល័យរដ្ឋទូទាំងប្រទេសមានកម្រិតសិក្សាពូកែឡើងទៅ មានសីលធម៌ល្អ និងឋិតក្នុងក្របខ័ណ្ឌគ្រួសារក្រីក្រ គ្រួសារប្រកៀកបន្ទាត់ក្រីក្រ។ល។ រាល់សំណុំបែបបទដែលពាក់ព័ន្ធសុទ្ធតែបានសាលារៀនឬភូមិភាគធ្វើសេចក្តីបញ្ជាក់ទាំងអស់។ ព្រោះហេតុនោះ ទទួលបាន”អាហារូបករណ៍”គឺជាក្តីរីករាយ និងជាកិត្តិយសយ៉ាងធំចំពោះត្រាធីសុជាតា។ ចាប់ពីថ្ងៃ២២ដល់២៤ ខែវិច្ឆិកា ប្អូនបានទៅរដ្ឋធានីហាណូយទទួលអាហារូបករណ៍និងចូលរួមសកម្មភាពអាស្រ័យគណៈចាត់តាំងរៀបចំឡើង។ល។ ទឹកប្រាក់អាហារូបករណ៍ ប្អូនទុកសម្រាប់គិតគូរក្នុងការសិក្សាឆ្នាំបញ្ចប់នេះ។ ប្អូនចូលចិត្តរៀនអក្សរខ្មែរណាស់ដែរ សព្វថ្ងៃប្អូនចេះអាន ចេះសរសេរបានល្អបង្គួរបានជាប្អូនមានបំណងចង់បន្តសិក្សាថ្នាក់អនុបណ្ឌិត ខាងអក្សរសាស្រ្តខ្មែរ។ ចំពោះមុខនៅពេលរៀនចប់ប្អូនរកការងារធ្វើមុនសិន ដើម្បីជួយឪពុកម្តាយ ចិញ្ចឹមប្អូន២នាក់រៀនសូត្រឲ្យបានចប់ចុងចប់ដើម” ត្រាធីសុជាតា រ៉ាយរ៉ាប់មកដូច្នេះ៕

ថាញ់ឡុង-ធី

ចែករំលែកអត្ថបទ

ពាក្យគន្លឹះ