កំសាន្ត រឿងពីនេះពីនោះ

24/10/2026 - 07:37

គន្លឹះសាមញ្ញៗកម្ចាត់ស្នាមប្រឡាក់រឹងរូសគ្រប់ប្រភេទដើម្បីឱ្យអាវសស្អាតបាត

សម្លៀកបំពាក់មានស្នាមប្រឡាក់ដែលពិបាកបោកជម្រះ ធ្វើឱ្យអ្នកខ្វល់ចិត្តជាខ្លាំង ពិសេសគឺសម្លៀកបំពាក់ពណ៌ស ប៉ុន្តែគ្រាន់តែប្រើវិធីសាមញ្ញៗទាំងនេះ ស្នាមប្រឡាក់ទាំងអស់នឹងលែងមានទៀត

ក្រមួនផ្កាយមាស

ពេលសម្លៀកបំពាក់ប្រឡាក់ថ្នាំលាប អ្នកកុំបារម្ភឡើយ។ អ្នកយកក្រមួនផ្កាយមាសលាបលើកន្លែង ដែលប្រឡាក់ថ្នាំលាប សារធាតុក្នុងក្រមួនផ្កាយមាសនឹងរំលាយថ្នាំលាប បន្ទាប់មកអ្នកបោកសម្អាតឡើងវិញដោយទឹកនិងសាប៊ូ។

ស្នាមប្រឡាក់លើសម្លៀកបំពាក់ពណ៌សនឹងលែងជាការបារម្ភទៀត ដោយគ្រាន់តែប្រើវិធីសាមញ្ញៗ។ ប្រភព៖ Sohu

សណ្តែកបណ្តុះ

អាកាសធាតុសំណើម ធ្វើឱ្យសម្លៀកបំពាក់ដែលបោកហើយងាយដុះផ្សិតណាស់ ពិសេសសម្លៀកបំពាក់ពណ៌ស។ មានវិធីជាច្រើនដើម្បីដោះស្រាយស្នាមផ្សិតទាំងនេះ ក្នុងនោះអាចរាប់បញ្ចូលទាំងការ ប្រើសណ្តែកបណ្តុះ។

អ្នកអាចយកសណ្តែកបណ្តុះស្អាតដុះកកិតលើស្នាមផ្សិតទាំងនេះ កកិតខ្លាំងៗក្នុងរយៈពេល៥-១០ នាទី បន្ទាប់មកបោកសម្អាតឡើងវិញដោយទឹកស្អាត។ ស្នាមផ្សិតនឹងបាត់ភ្លាមៗ។

ទឹកអង្ករនិងសំបកក្រូចឃ្វិច

ប្រសិនបើសម្លៀកបំពាក់របស់អ្នកមានស្នាមលឿង អ្នកអាចប្រើប្រាស់ទឹកអង្ករដណ្តាំជាមួយសំបកក្រូចឃ្វិច។ ពេលទឹកល្បាយពុះ អ្នកត្រាំសម្លៀកបំពាក់ក្នុងរយៈពេលពី១៥-៣០នាទីបន្ទាប់មកបោកសម្អាតឡើងវិញដោយទឹក។ វិធីនេះមិនត្រឹមតែសាមញ្ញប៉ុណ្ណោះទេ ថែមទាំងមិនប៉ះពាល់ដល់សម្លៀកបំពាក់របស់អ្នកឡើយ។

ទឹកដាំពុះផ្សំជាមួយក្រូចឆ្មារ

ស្នាមប្រឡាក់រឹងរូសលើសម្លៀកបំពាក់ពណ៌ស ដូចជាស្នាមលឿង ស្នាមប្រឡាក់ពីភេសជ្ជៈកំពប់ គឺពិបាកសម្អាតណាស់ ប្រសិនបើជាប់ស្នាមប្រឡាក់ ហើយបោះចោលសម្លៀកបំពាក់ដែលអ្នកស្រឡាញ់ នោះគឺជារឿងគួរឱ្យស្តាយណាស់។

ពេលជួបករណីនេះ អ្នកដាំទឹកឱ្យពុះជាមួយក្រូចឆ្មារមួយចំណិត បន្ទាប់មកត្រាំសម្លៀកបំពាក់ពណ៌សក្នុងល្បាយនោះ។ អ្នកត្រាំប្រមាណពី៣០ នាទីដល់១ ម៉ោង រួចយកទៅបោកសម្អាតឡើងវិញ ហើយយកទៅហាលនៅកន្លែងមានពន្លឺថ្ងៃ។

ល្បាយទឹកខ្មេះស និងទឹក

ពេលខ្លះសម្លៀកបំពាក់មានក្លិនផ្អួរ ដោយសារអ្នកហាលមិនត្រឹមត្រូវ។ ពេលនេះ អ្នកគួរត្រាំសម្លៀក បំពាក់ដែលមានក្លិនក្នុងល្បាយទឹកខ្មេះស និងទឹកប្រមាណ១០-១៥នាទី រួចហាលសម្លៀកបំពាក់នៅ កន្លែងមានខ្យល់ល្អ។ ក្លិនផ្អួរនឹងលែងមាននៅលើសម្លៀកបំពាក់ដែលអ្នកស្រឡាញ់ទៀតហើយ។

ប្រើអាល់កុលសុខាភិបាល

ប្រសិនបើអាវសរបស់អ្នកប្រឡាក់ទឹកខ្មៅ អ្នកយកអាល់កុលសុខាភិបាលចាក់លើកន្លែងអាវប្រឡាក់ទឹកខ្មៅ។ អ្នកត្រូវចាំកុំឱ្យផ្ទៃអាវដែលបានចាក់អាល់កុលប៉ះជាមួយផ្ទៃផ្សេងទៀតនៃអាវ ដើម្បីជៀសវាងពណ៌ទឹកខ្មៅរាលដាល ដែលអាចធ្វើឱ្យប្រឡាក់ ផ្នែកផ្សេងទៀតនៃសម្លៀកបំពាក់។

ប្រើស្ករ ឬម្សៅសូដា

ពេលអ្នកចូលរួមពិធីជប់លៀង ប្រសិនបើទឹកស៊ីអ៊ីវបាញ់ប្រឡាក់សម្លៀកបំពាក់ពណ៌សរបស់អ្នក អ្នកអាចប្រើស្ករ ឬម្សៅសូដាដើម្បីសម្អាត។

វិធីទី១៖ ដំបូង អ្នកត្រាំកន្លែងប្រឡាក់ជាមួយទឹកបន្ទាប់មករោយស្ករមួយស្លាបព្រា រួចប្រើដៃកកិត។ ពេលនេះ អ្នកអាចឃើញស្នាមប្រឡាក់ទឹកស៊ីអ៊ីវមួយ ផ្នែកបានជ្រាបចូលទៅក្នុងស្ករ បន្ទាប់មកអ្នកបោកឡើងវិញដោយទឹកស្អាតនិងសាប៊ូ នោះអាចលុបស្នាមប្រឡាក់បាន។

វិធីទី២៖ បន្ទាប់ពីធ្វើឱ្យអាវសសើម លាបម្សៅសូដាលើតំបន់មានស្នាមទឹកស៊ីអ៊ីវ ក្រោយ១០នាទី បោកឡើងវិញដោយទឹកស្អាតដើម្បីលុបស្នាមប្រឡាក់៕

ប្រភព៖ vietnamnet.vn - សុផន

ចែករំលែកអត្ថបទ

ពាក្យគន្លឹះ