ព្រឹត្តិការណ៍ - នយោបាយ ព្រឹត្តិការណ៍

26/07/2026 - 21:25

គណៈទំនាក់ទំនងអតីតយុទ្ធជនកងវរសេនាធំ លេខ១-អ៊ូមិញ រំលឹកខួបអនុស្សវរីយ៍៧៩ឆ្នាំ នៃទិវាយុទ្ធជនពិការ និងយុទ្ធជនពលី

ព្រឹកថ្ងៃទី២៦ កក្កដា នៅវិហារវីរជនយុទ្ធជនពលីកងវរសេនាធំលេខ១ - អ៊ូមិញ (សង្កាត់ហ៊ឹងភូ ទីក្រុងកឹងធើ) គណៈទំនាក់ទំនងអតីតយុទ្ធជនកងវរសេនាធំលេខ១-អ៊ូមិញ បានចាត់តាំងពិធីរំលឹកខួបអនុស្សាវរីយ៍៧៩ឆ្នាំ ទិវាយុទ្ធជនពិការនិងយុទ្ធជនពលី(២៧/៧/១៩៤៧-២៧/៧/២០២៦)។

តំណាងទាំងឡាយចូលរួមពិធីរំលឹកខួបអនុស្សាវរីយ៍៧៩ឆ្នាំ ទិវាយុទ្ធជនពិការនិងយុទ្ធជនពលី(២៧/៧/១៩៤៧-២៧/៧/២០២៦) អាស្រ័យគណៈទំនាក់ទំនងអតីតយុទ្ធជនកងវរសេនាធំលេខ១-អ៊ូមិញចាត់តាំង។

បណ្តាវីរជនកងកម្លាំងប្រដាប់អាវុធប្រជាជន នាយឧត្តមសេនីយ៍កងទ័ពចូលនិវត្តន៍ បណ្តាអតីតថ្នាក់ដឹកនាំនៃគណៈកម្មាធិការបក្ស អគ្គមេបញ្ជាការដ្ឋានយោធភូមិភាគ៩ និងទីក្រុងកឹងធើឆ្លងតាមសម័យកាលនីមួយៗ លោកស្រីហូធីកឹមដាវ-អនុលេខាគណៈកម្មាធិការបក្ស ប្រធានគណៈកម្មាធិការរណសិរ្សមាតុភូមិវៀតណាមទីក្រុង ព្រមទាំងថ្នាក់ដឹកនាំនៃបណ្តាស្ថាប័ន អង្គភាពនិងភូមិភាគ បានអញ្ជើញចូលរួមពិធីរំលឹកខួបអនុស្សាវរីយ៍។

តំណាងទាំងឡាយបានរួមគ្នារំលឹកឡើងវិញនូវប្រវត្តិសាស្ត្រ និងអត្ថន័យនៃទិវាយុទ្ធជនពិការ និងយុទ្ធជនពលី សម្តែងការដឹងគុណយ៉ាងជ្រាលជ្រៅចំពោះគុណូបការៈរបស់លោកប្រធានហូជីមិញ បណ្តាសមមិត្តថ្នាក់ដឹកនាំនៃបក្សនិងរដ្ឋ និងយុទ្ធជនពលីជាង៥.០០០នាក់ នៃកងវរសនាធំលេខ១ - អ៊ូមិញដែលបានពលីជីវិតដើម្បីបុព្វហេតុរំដោះជនជាតិ ឯកភាពប្រទេសជាតិ និងបំពេញភារកិច្ចអន្តរជាតិដ៏ខ្ពង់ខ្ពស់។

លោកឧត្តមសេនីយ៍ទោ ត្រឹងវិញក្វាង-ប្រធានគណៈទំនាក់ទំនងអតីតយុទ្ធជនកងវរសេនាធំលេខ១ - អ៊ូមិញរំលឹកឡើងវិញនូវប្រវត្តិសាស្ត្រ និងអត្ថន័យនៃទិវាយុទ្ធជនពិការ និងយុទ្ធជនពលី។

លោកឧត្តមសេនីយ៍ទោ ត្រឹងវិញក្វាង-ប្រធានគណៈទំនាក់ទំនងអតីតយុទ្ធជនកងវរសេនាធំលេខ១ - អ៊ូមិញបានឲ្យដឹងថា កន្លងមក តំណាងគណៈទំនាក់ទំនងតែងចាត់តាំងសកម្មភាពតបស្នងសងគុណវីរជនពលីយ៉ាងទៀងទាត់។ ពិសេស ក្នុងរយៈពេលជិត១០ឆ្នាំកន្លងមកនេះ លោកវូយ៉ងទុង-អនុប្រធានគណៈទំនាក់ទំនងអតីតយុទ្ធជនកងវរសេនាធំលេខ១ - អ៊ូមិញ (ទទួលបន្ទុកតំបន់ភាគខាងជើង) រួមជាមួយមិត្តរួមកងមួយចំនួនបានចាត់តាំងគណៈប្រតិភូចូលទៅខេត្តភាគខាងត្បូងជាច្រើនលើកច្រើនសា ដើម្បីស្វែងរក និងកំណត់អត្តសញ្ញាណអដ្ឋិធាតុយុទ្ធជនពលី ព្រមទាំងបានចូលរួមយកគំរូពីផ្នូរយុទ្ធជនពលីចំនួន២៩៣ ដើម្បីធ្វើកោសល្យវិច័យ ADN។ ជាលទ្ធផល គឺបានកំណត់អត្តសញ្ញាណយុទ្ធជនពលីចំនួន៥៧រូប។

លោកស្រីហូធីកឹមដាវ-អនុលេខាគណៈកម្មាធិការបក្សទីក្រុង ប្រធានគណៈកម្មាធិការរណសិរ្សមាតុភូមិវៀតណាមទីក្រុងថ្លែងការណ៍ក្នុងពិធីរំលឹកខួបអានុស្សាវរីយ៍។

តំណាងឱ្យគណៈកម្មាធិការបក្សទីក្រុង ក្រុមប្រឹក្សាប្រជាជន គណៈកម្មាធិការប្រជាជន គណៈកម្មាធិការរណសិរ្សមាតុភូមិវៀតណាមក្រុងកឹងធើ លោកស្រីហូធីកឹមដាវបានសម្តែងនូវការដឹងគុណយ៉ាងជ្រាលជ្រៅចំពោះវីរជនពលីដែលបានពលីជីវិតក្នុងសម័យកាលតស៊ូ ការពារព្រំដែនមាតុប្រទេស និងបំពេញភារកិច្ចអន្តរជាតិជួយប្រទេសមិត្តកម្ពុជា។

ប្រធានគណៈកម្មាធិការរណសិរ្សមាតុភូមិវៀតណាមទីក្រុង បានជម្រាបជូនអំពីការងារ "តបស្នងសងគុណ" និង "យុទ្ធនាការ៥០០ថ្ងៃយប់ ជំរុញការស្វែងរក ប្រមូលផ្ដុំ និងកំណត់អត្តសញ្ញាណអដ្ឋិធាតុយុទ្ធជនពលី" របស់ក្រុងកឹងធើ ក្នុងពេលកន្លងមក។ ទន្ទឹមនឹងនោះ ក៏បានស្នើដល់គណៈកម្មាធិការបក្ស រដ្ឋអំណាច និងបណ្តាគណៈ ផ្នែក អង្គការមហាជនភូមិភាគ បន្តអនុវត្តការងារគោលនយោបាយ និងគិតអានដល់គ្រួសារយុទ្ធជនពលី យុទ្ធជនពិការឱ្យបានល្អប្រសើរ ព្រមទាំងពង្រឹងការងារអប់រំប្រពៃណីវីរជនរបស់ស្រុកកំណើតកឹងធើ និងប្រពៃណីវីរជននៃកងវរសេនាធំលេខ១-អ៊ូមិញ ដើម្បីរួមចំណែកលត់ដំស្មារតីលះបង់ ប្តេជ្ញាកសាងនិងការពារមាតុប្រទេសជូនដល់យុវជនជំនាន់ក្រោយនាពេលបច្ចុប្បន្ន៕