គោលនយោបាយ -ការរស់នៅ ច្បាប់

24/07/2026 - 09:17

រឹតបន្តឹងក្រឹត្យក្រម កសាងវប្បធម៌ចរាចរណ៍សុវត្ថិភាព

រយៈពេលកន្លង ការងារធានាសណ្តាប់ធ្នាប់ សុវត្ថិភាពចរាចរណ៍លើភូមិឋានទីក្រុងកឹងធើ សម្រេចបានលទ្ធផលវិជ្ជមានជាច្រើន គ្រោះថ្នាក់ចរាចរណ៍បានកាត់បន្ថយជាបណ្តើរៗ។ ដើម្បីរក្សាលទ្ធផលដែលសម្រេចបាន គណៈកម្មាធិការប្រជាជនទីក្រុង បានដាក់ឱ្យប្រើផែនការ លេខ ២៧១/KH-UBND ស្តីពីការបន្តផ្សព្វផ្សាយអនុវត្តអំពីឯកសារចង្អុលការរបស់បក្ស នាយករដ្ឋមន្ត្រីនៃរដ្ឋភិបាល ក្រសួងនគរបាល អំពីការងារធានាសណ្តាប់ធ្នាប់ សុវត្ថិភាពចរាចរណ៍។

កងកម្លាំងប៉ូលិសចរាចរណ៍នគរបាលទីក្រុងកឹងធើ ផ្សព្វផ្សាយ ចលនាប្រជាជនគោរពអនុវត្តម៉ឺងម៉ាត់តាមបទប្បញ្ញត្តិអំពីសណ្តាប់ធ្នាប់សុវតិ្ថភាពចរាចរណ៍។ រូបថត៖ សហការី

ការដាក់ចេញផែនការនេះ ដើម្បីផ្សព្វផ្សាយ បញ្ជ្រាបនិងអនុវត្តយ៉ាងម៉ឺងម៉ាត់ មានប្រសិទ្ធភាពនូវបទបញ្ជារបស់មជ្ឈិម អំពីការងារធានាសណ្តាប់ធ្នាប់សុវត្ថិភាពចរាចរណ៍ បង្ការទប់ស្កាត់ផលប៉ះពាល់ពីគ្រឿងស្រវឹង ធានាសុវត្ថិភាពដល់សិស្សានុសិស្សនិងសកម្មភាពអាជីវកម្មដឹកជញ្ជូន។ ទីក្រុងសំណូមពរគ្រប់មន្ទីរ គណៈ ផ្នែកនិងភូមិភាគ ពិនិត្យឡើងវិញ ប្រគល់ភារកិច្ចច្បាស់លាស់សមស្របនឹងប្រព័ន្ធចាត់តាំងថ្មីក្រោយពីរួមបញ្ចូល ធានាមិនឱ្យមានការរអាក់រអួល ឬរំលងចោលភារកិច្ចណាមួយឡើយ។ ការផ្សព្វផ្សាយត្រូវអនុវត្តយ៉ាងប្តូរផ្តាច់ និងជាក់ស្តែង ដោយយកប្រសិទ្ធភាពជាក់ស្តែង និងលទ្ធផលនៃការទប់ស្កាត់គ្រោះថ្នាក់ចរាចរណ៍ ធ្វើជាបទដ្ឋានវាយតម្លៃកម្រិតអនុវត្តសម្រេចភារកិច្ចរបស់ អ្នកដឹកនាំ។

ដើម្បីធ្វើឱ្យជាក់ស្តែងនូវទិសដៅដូចពោលខាង លើ ទីក្រុងបានដាក់ចេញនូវក្រុមភារកិច្ចនិងដំណោះស្រាយសំខាន់ៗជាច្រើនប្រកបដោយលក្ខណៈព្រមៗគ្នា។ មុនដំបូង គឺលើកកម្ពស់សុពលភាពគ្រប់គ្រងរដ្ឋ អំពីហេដ្ឋារចនាសម្ព័ន្ធនិងការចាត់តាំងចរាចរណ៍ ផ្តោតលើការពិនិត្យឡើងវិញដើម្បីបំពេញបន្ថែមផ្លាក សញ្ញាចរាចរណ៍ គំនូសបន្ថយល្បឿន ដោះស្រាយឱ្យដាច់ស្រឡះ “ចំណុចខ្មៅ” ដែលបង្កប់ហានិភ័យគ្រោះថ្នាក់ ព្រមទាំងរុះរើស្ថានភាពទន្ទ្រានរបៀងសុវត្ថិភាពផ្លូវគោក ចិញ្ចើមផ្លូវ។ ចំពោះសកម្មភាពអាជីវកម្មដឹកជញ្ជូន អង្គភាពសមត្ថកិច្ចនឹងរឹតបន្តឹង ការត្រួតពិនិត្យឧបករណ៍តាមដានការធ្វើដំណើរ ចាត់វិធានការយ៉ាងតឹងរ៉ឹងចំពោះបញ្ហា “រថយន្តគ្មានច្បាប់ គ្មានចំណត” និងរថយន្តដឹកហួសចំណុះ។ ទន្ទឹមនឹងនោះ ការងារល្បាត ត្រួតពិនិត្យនឹងបានបង្កើនជាមួយស្មារតី “គ្មានតំបន់ហាមឃាត់ គ្មានការលើកលែង” ប្តូរផ្តាច់ចាត់វិធានការពីបទប្រព្រឹត្តល្មើសកម្រិតអាល់កុល គ្រឿងញៀន បើកបរលើស ល្បឿនកំណត់និងជំរុញអនុវត្តប្រព័ន្ធកាមេរ៉ាត្រួត ពិនិត្យដើម្បីធ្វើការផាកពិន័យ។

ទន្ទឹមនឹងនោះ ផែនការបានដាក់ចេញដំណោះស្រាយអំពីការគ្រប់គ្រងកម្មាភិបាល បុគ្គលិកនិងការធានាសុវត្ថិភាពសម្រាប់សិស្សានុសិស្ស។ កម្មាភិបាល យុទ្ធជនកងកម្លាំងប្រដាប់អាវុធដែលប្រព្រឹត្តល្មើសកម្រិតអាល់កុលនឹងត្រូវផ្ញើលិខិតជូនដំណឹង ទៅកាន់ស្ថាប័នគ្រប់គ្រង ដើម្បីចាត់វិធានការយ៉ាងតឹងរ៉ឹង ប្តេជ្ញាចិត្តចាត់វិធានការរាល់សកម្មភាពអន្តរាគមន៍ក្នុងដំណើរការចាត់វិធានការរបស់កងកម្លាំងសមត្ថកិច្ច។ ដោយឡែកចំពោះសិស្សានុសិស្ស ផ្នែកអប់រំសហការជាមួយកងកម្លាំងនគរបាល បង្កើនការអប់រំបំណិនចូលរួមចរាចរណ៍សុវត្ថិភាព ពង្រីកទូលំទូលាយទម្រង់ “ខ្លោងទ្វារសាលារៀនសុវត្ថិភាពចរាចរណ៍” និងកែតម្រូវឱ្យបានម៉ឺងម៉ាត់ចំពោះស្ថាន ភាពអាណាព្យាបាលសិស្ស ប្រគល់យានយន្តឱ្យអ្នកមិនទាន់គ្រប់អាយុបើកបរ។ ដើម្បីធានាបាននូវលក្ខណៈព្រមាន ថ្នាក់ដឹកនាំទីក្រុង សំណូមពរប្រធានអង្គភាព និងប្រធានគណៈកម្មាធិការប្រជាជនភូមិភាគនានា ត្រូវទទួលខុសត្រូវទាំងស្រុងចំពោះមុខគណៈកម្មាធិការប្រជាជនទីក្រុង ប្រសិនបើបណ្តោយឱ្យកើតមាន បញ្ហាខ្វះចន្លោះ អូសបន្លាយ ឬគ្រោះថ្នាក់ចរាចរណ៍ កើនឡើងលើភូមិឋានគ្រប់គ្រង៕

ភីអៀង-មុនី

ចែករំលែកអត្ថបទ

ពាក្យគន្លឹះ